ޖަރުމަނުވިލާތުގެ އެއާޕޯޓަކުން ގޮވާތަކެތި ހަރުކޮށްފައިވާ ޑްރޯނެއް ފެނިއްޖެ އެވެ.
ސެކްސަނީ ސްޓޭޓްގެ ފުލުހުން މައުލޫމާތު ދޭ ގޮތުގައި، ރޭގަނޑުގެ ވަގުތެއްގައި ލައިޕްޒިގް/ހާލޭ އެއާޕޯޓުގައި އޮތް ޔޫކްރެއިންގެ މުދާ އުފުލާ ބޯޓުތަކެއްގެ ކައިރިން މި ޑްރޯން ފެނުނީ އެއާޕޯޓުގެ މުވައްޒަފަކަށެވެ. އެއާއެކު، އެ ސަރަހައްދުގައި ރޮބޮޓެއް ބޭނުންކޮށްގެން ވަނީ ހަރަކާތްތެރިވާން ފަށާފަ އެވެ.
މީގެ އިތުރުން، ހަމަ އެ އެއާޕޯޓު ކައިރިން ޝައްކު ކުރެވޭ އިތުރު އެއްޗެއް މުދާ އުފުލާ ބޯޓެއްގައި ޖެހިފައިވާ ކަމަށް ވެސް ފުލުހުން ބުންޏެވެ. އެ ބޯޓު ހެނޯވާ އެއާޕޯޓަށް ޖެއްސުމަށްފަހު ބެލިއިރު، ބޯޓަށް ކުދިކުދި ގެއްލުންތަކެއް ލިބިފައިވާކަން ވަނީ ފާހަގަކުރެވިފަ އެވެ.
ޖަރުމަނުގެ އަސްކަރީ މަރުކަޒުތަކާއި، އެއާޕޯޓުތަކާއި، ހަކަތަ އުފައްދާ ތަންތަނާއި، ބަނދަރުތަކުގެ އިތުރުން ލޮޖިސްޓިކްސް ކުންފުނިތައް ފަދަ ނާޒުކު ސަރަހައްދުތަކުގެ މަތިން ފާއިތުވި މަސްތަކުގައި ހުއްދަނެތި ގިނަ އަދަދެއްގެ ޑްރޯންތައް އުދުހިފައިވާތީ، އެ ގައުމުގެ އެއާޕޯޓުތައް މިހާރު އޮތީ މަތީ އެލާޓެއްގަ އެވެ. ފުލުހުން އިންޒާރު ދީފައިވާ ގޮތުގައި މި ޑްރޯންތަކަކީ ރަޝިއާގެ އެޖެންޓުން އަޑީގައި ތިބެގެން ހިންގާ އަމަލުތަކަކަށް ވުން އެކަށީގެންވެ އެވެ.
ޖަރުމަނުގެ އިރުމަތީގައި އޮންނަ ލައިޕްޒިގް/ހާލޭ އެއާޕޯޓަކީ ޖަރުމަނުގެ އަސްކަރިއްޔާ އާއި ނޭޓޯގެ ގައުމުތަކުން އަސްކަރީ ސާމާނު އުފުލުމަށް ބޭނުންކުރާ މުހިންމު އެއާޕޯޓެކެވެ. އަދި މިއީ ޔޫކްރެއިންގެ ވައިގެ މަގުން އުފުލާ މުދަލުގެ ބޮޑު ބައެއް އުފުލާ އެ ގައުމުގެ "އެންޓޮނޯވް އެއާލައިންސް" ބޭނުންކުރާ މައި މަރުކަޒު ވެސް މެއެވެ.
މީގެ އިތުރުން، މިއީ ދުނިޔޭގެ މަޝްހޫރު ލޮޖިސްޓިކްސް ކުންފުނި، ޑީއެޗްއެލް (DHL) ގެ ވެސް މައި ހަބެކެވެ.
ފުލުހުން ވަނީ އެ ޑްރޯންގައި އިން ގޮވާ އެތީގެ ޑެޓޮނޭޓަރު ނައްތާލުމަށް ފަހު، ފަހުން އެ އެތި ކޮންޓްރޯލްޑް އެކްސްޕްލޯޝަނެއްގެ ދަށުން ގޮއްވާލާފަ އެވެ.
ސެކްސަނީގެ އިންޓީރިއާ މިނިސްޓަރު އާމިން ޝޫސްޓާ މި ހާދިސާ ސިފަކުރެއްވީ ސަލާމަތީ ގޮތުން ކުރިމަތިވި "ވަރަށް ސީރިއަސް ނުރައްކަލެއް" ގެ ގޮތުގަ އެވެ.
2024 ވަނަ އަހަރުގެ ޖުލައި މަހު ވެސް ލައިޕްޒިގް/ހާލޭ އެއާޕޯޓުގައި ޑީއެޗްއެލްގެ ބޯޓަކަށް އަރުވަން ތައްޔާރުކޮށްފައި އޮތް ޕާރުސަލެއްގައި ވަނީ ރޯވެފަ އެވެ. މިއީ އިނގިރޭސިވިލާތާއި ޔޫރަޕްގެ ގައުމުތަކަށް އަމާޒުކޮށްގެން ޕާރުސަލްތަކުގައި ރޯކޮށްލުމަށް ހިންގި ސިލްސިލާ ހަރަކާތްތަކުގެ ތެރެއިން ހިނގި ހާދިސާއެކެވެ.
އެ ހާދިސާތަކަކީ ވެސް މޮސްކޯއާ ގުޅުންހުރި ބަޔަކު ގަސްތުގައި ދިން ގެއްލުންތަކެއް ކަމަށް ވަނީ ތުހުމަތު ކުރެވިފަ އެވެ.
ނަމަވެސް، އެ ހާދިސާތަކުގައި އެއްވެސް ބައިވެރިވުމެއް އޮތް ކަމަށް ރަޝިއާއިން އެއްބަހެއް ނުވެ އެވެ.
މީގެ އިތުރުން، ލައިޕްޒިގް/ހާލޭ އެއާޕޯޓުގެ ފްލައިޓް ޝެޑިއުލްތަކާއި މުދާ އުފުލާ ގޮތުގެ މައުލޫމާތު، ޗައިނާއަށް ޖާސޫސްކޮށްދޭ މީހަކަށް ފޯރުކޮށްދިން ކަމުގެ ކުށް ސާބިތުވެ، މިދިޔަ އަހަރު ޗައިނާގެ އަންހެނަކު ވަނީ ޖަލަށް ލާފަ އެވެ.
