މަޝްހޫރު ސްޓްރީޓް އާޓިސްޓް ބެންކްސީގެ ތިން ކުރެހުމެއް ސާފުކުރުމަށާއި އެ ސަރަހައްދުތަކުގެ ސަލާމަތީ ކަންކަން ބެލެހެއްޓުމަށް، އިނގިރޭސިވިލާތުގެ ޓެކްސް ފައިސާއިން މިހާތަނަށް ގާތްގަނޑަކަށް 150،000 ޕައުންޑް ހޭދަވެއްޖެ އެވެ. އަދި މި އަދަދު ކުރިއަށް އޮތް ތަނުގައި އިތުރުވާނެ ކަމަށް ބެލެވެ އެވެ.
މި ހުރިހާ ކުރެހުންތަކުގެ ތެރެއިން އެންމެ ބޮޑު ހޭދައެއް ހިނގާފައި ވަނީ 2025 ވަނަ އަހަރުގެ ސެޕްޓެމްބަރު މަހު "ރޯޔަލް ކޯޓްސް އޮފް ޖަސްޓިސް" ގެ ފާރުގައި ކުރެހި ކުރެހުމަކަށެވެ. އެ ކުރެހުން ފޮހެލުމަށާއި އެ ސަރަހައްދުގެ ސަލާމަތީ ކަންކަން ބެލެހެއްޓުމަށް މިހާތަނަށް 85،000 ޕައުންޑަށް ވުރެ ގިނަ ފައިސާ ވަނީ ހޭދަވެފަ އެވެ.
އިނގިރޭސިވިލާތުގެ މިނިސްޓްރީ އޮފް ޖަސްޓިސް (އެމްއޯޖޭ) އިން ބުނި ގޮތުގައި، ކެއަރީ ސްޓްރީޓްގައި ހުންނަ އާސާރީ ގޮތުން ރައްކާތެރިކޮށްފައިވާ އެ އިމާރާތުގެ ފާރުން ކުލަ ފޮހެލުމަށް އެކަނިވެސް 50،000 ޕައުންޑް ވަނީ ހޭދަކޮށްފަ އެވެ. މީގެ އިތުރުން، އެ ތަނުގެ ސަލާމަތީ ކަންކަމަށާއި މުވައްޒަފުންގެ އިތުރުގަޑީގެ ފައިސާގެ ގޮތުގައި 35،300 ޕައުންޑް ހޭދަވެފައިވެ އެވެ.
މި ހަރަދުތަކުގެ ތަފްސީލު ހާމަވެފައި ވަނީ މައުލޫމާތު ހޯދައި ލިބިގަތުމުގެ ހައްގުގެ ދަށުން ބީބީސީން ހުށަހެޅި ރިކުއެސްޓަކާ ގުޅިގެންނެވެ. މި މައުލޫމާތުތަކާއެކު، ބެންކްސީގެ މަސައްކަތްތަކަކީ މުދަލަށް ދޭ ގެއްލުމެއް ނުވަތަ "ވެންޑަލިޒަމް" އެއްތޯ ނުވަތަ އެއީ އަގުހުރި ފަންނީ މަސައްކަތްތަކެއްތޯ ކުރެވޭ ބަހުސް އަލުން ވަރުގަދަވާނެ ކަމަށް ބެލެވެ އެވެ.
ބެންކްސީ އަކީ 1990 ގެ އަހަރުތަކުގައި ބްރިސްޓޯލްގެ ގްރެފިޓީ މާހައުލުން ފާހަގަވާން ފެށި، މިހާރު ދުނިޔޭގެ އެންމެ މަޝްހޫރު އެއް ސްޓްރީޓް އާޓިސްޓެވެ. އޭނާގެ ކުރެހުންތަކާއި ފަންނީ އުފެއްދުންތަކަކީ ކުއްލިއަކަށް ރޭގަނޑެއްގެ ތެރޭގައި ފާޅުވާ އަދި ގިނަ އަދަދެއްގެ އާންމުންގެ ސަމާލުކަން ހުއްޓޭ މަސައްކަތްތަކެކެވެ.
