ސްޕެއިންގެ ބާރުގެ ދަށުގައި އޮންނަ، އުތުރު އެފްރިކާގެ ސެއުޓާއަށް ހިޖުރަ ކުރާ މީހުން ވަނުން ރޭގެ ވަގުތުގައި ހުއްޓިފައިވާ ކަމަށް އެ ގައުމުން ބުނެފި އެވެ.
މިއީ މަދުވެގެން 67 މީހުން މަރުވި ބޮޑު ހާދިސާއަކަށް ފަހު، މޮރޮކޯއާ ގުޅޭ ބޯޑަރު ސަރަހައްދުގައި 500 މީޓަރުގެ ފްލޯޓިން ބެރިއަރެއް ހަރުކުރަން ފެށުމާ ގުޅިގެން އައި ބަދަލެކެވެ.
ސްޕެއިންގެ ކަމާބެހޭ ފަރާތްތަކުން ހާމަކޮށްފައިވާ ގޮތުގައި، ޔޫރަޕިއަން ޔޫނިއަން (އީޔޫ) އާއި އެފްރިކާއާ ދެމެދު އޮންނަ ހަމައެކަނި އެއްގަމު ބޯޑަރުތަކުގެ ތެރެއިން އެއް ސަރަހައްދު ކަމަށްވާ ސެއުޓާއަށް، މިދިޔަ ބުރާސްފަތި ދުވަހުން ފެށިގެން އެއްގަމާއި ކަނޑުމަގުން ގާތްގަނޑަކަށް 50،000 މީހުން ވަނީ ވަދެފަ އެވެ. މީގެ ކުރިން ދުވަހަކު ވެސް މިހާ ގިނަ އަދަދަކަށް މީހުން އެ ސަރަހައްދުން ހިޖުރަކޮށްފައެއް ނުވެ އެވެ.
މިހާ ގިނަ އަދަދެއްގެ ބަޔަކު އެއްފަހަރާ ބޯޑަރު ހުރަސްކުރުމާ ގުޅިގެން މުޅި ޔޫރަޕިއަން ޔޫނިއަންގައި ވަނީ ކަންބޮޑުވުން އުފެދިފަ އެވެ. މިކަމާ ގުޅިގެން އީޔޫގެ 22 ގައުމަކުން ވަނީ ބޭރުގެ ބޯޑަރުތައް ރައްކާތެރިކުރުމަށް ގުޅިގެން މަސައްކަތް ކުރުމަށާއި އެހެނިހެން ފިޔަވަޅުތައް އެޅުމަށް އެދި ސިޓީއެއް ފޮނުވާފަ އެވެ.
ޔޫރަޕިއަން ޔޫނިއަންގެ ރިޔާސަތު މިވަގުތު ބަލަހައްޓަމުންދާ އަޔަލޭންޑުން ބުނެފައިވަނީ، މި މައްސަލައާ ގުޅޭ ގޮތުން މަޝްވަރާ ކުރުމަށް އަންނަ އަންގާރަ ދުވަހު އިއްތިހާދުގެ ވަޒީރުންގެ ކުއްލި ވީޑިއޯ ކޮންފަރެންސް ބައްދަލުވުމެއް ބޭއްވުމަށް ގޮވާލާފައިވާ ކަމަށެވެ.
މިގޮތަށް ގިނަ ބަޔަކު ހިޖުރަކުރަން މަޖުބޫރުވީ އިގްތިސާދީ ދަތިކަމުގެ ސަބަބުންނާއި، ސޯޝަލް މީޑިއާގައި ފެތުރިފައިވާ އެކި ފޭކު ވާހަކަތަކުގެ ސަބަބުން ހިތްވަރު ލިބިގެން ކަމަށް ބެލެވެ އެވެ.
