އޭއެފްސީ ޕްރެޒިޑެންޓްސް ކަޕްގެ ޗެމްޕިއަންކަން ތިން ފަހަރު ހޯދާފައިވާ، ތަޖިކިސްތާންގެ ރެގާރު ޓަޑާޒުން 3-0 އިން ރާއްޖޭގެ ލީގު ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް އޭއެފްސީ ޗެލެންޖު ލީގުގެ ގްރޫޕް ސްޓޭޖުގެ ޖާގައެއް ހޯދައިފި އެވެ.
މި މެޗަކީ އިއްޔެ ހަވީރު ކުޅެން އެންމެ ފުރަަތަމަ ތާވަލުކޮށްފައި އޮތް މެޗެކެވެ. އެކަމަކު، ރެގާރު އަށް ދިމާވި ދަތުރުފަތުރުގެ ލަސްވުމުގެ މައްސަލައެއްގެ ސަބަބުން، އެ ޓީމުން އޭއެފްސީ އަށް އެންގުމާ ގުޅިގެން، މިއަދު ހަވީރަށް މެޗު ފަސްކުރަން ނިންމީ އެވެ.
މާޒިޔާ އިން އޭއެފްސީ ޗެލެންޖް ލީގު ފެށި އަހަރު ގްރޫޕް ސްޓޭޖުގައި ކުޅުނެވެ. އެކަމަކު، އޭގެ ފަހުން، ދެ ފަހަރު ވެސް ޕްރިލިމިނަރީ ކޮލިފައިން ބުރުގައި ވަނީ ކަޓައިފަ އެވެ. މިދިޔަ އަހަރު ބަލިވީ ކުވެއިތުގެ އަލް އަރާބީ އަތުން 4-0 އިންނެވެ. އަލް އަރާބީ އަތުން މިދިޔަ އަހަރުގެ ޗެލެންޖް ލީގުގައި ރެގާރު ވަނީ ބަލިވެފަ އެވެ.
ގަލޮޅު ދަނޑުގައި މިއަދު ކުޅުނު މެޗު ފަށައިގެން، ރެގާރުން މެޗުގެ ކޮންޓްރޯލް ހޯދައިގެން ކުޅެން މަސައްކަތްކުރި ނަމަވެސް މާޒިޔާ އިން އެ ފުރުސަތު ނުދީ ލިބޭ ފުރުސަތުތަކުގައި ކުރިއަށް ޖެހިގެން ކުޅެން ފެށި އެވެ. ރެގާރުގެ އެޓޭކިން މިޑްފީލްޑަރު، ކައިޓޯވް އަޒީޒްބެކަށް، މާޒިޔާ އޭރިއާތެރެއިން އެ ޓީމުގެ ހައިޝަމް ހަސަން (ބިޑި) ފައުލުކުރި ކަމަށް އެޕީލް ކުރި ނަމަވެސް ރެފްރީ ނިންމީ ޕެނަލްޓީ ދޭން ޖެހޭ ފައުލެއް ނޫން ކަމަށެވެ.
ކައުންޓަ އެޓޭކުގައި މާޒިޔާ އަށް ލިބުނު ބޯޅަތަކުގައި އެ ޓީމުގެ އަބްދުﷲ ލޫތު އިބްރާހިމް (ސާނޭ) ރަނގަޅު ބޯޅަތަކެއް ކުޅުނެވެ. އެ ގޮތުން، ލޫތަށް ލިބުނު އެއް ފުރުސަތުގައި އޭރިއާތެރެއިން، ހުސްކޮށްލާފައި އެ ޓީމުގެ އަހުމަދު އައިހަމް (ފަތޯ) އަށް ދިން ޕާހަށް އަރައި، އޭނާ ޖައްސާލި ބޯޅަ ރެގާރުގެ ކީޕަރު، ކެމަރޫންގެ ސެވެރިން ޓަކަމް ވަނީ މަތަކޮށްފަ އެވެ.
މާޒިޔާގެ އިބްރާހިމް މަހުދީ (ފޭދޫ އިއްބެ) އަށް ލިބުނު ފުރުސަތެއްގައި، އޭރިއާބޭރުން ފޮނުވާލި ބޯޅައެއް ހުރަސްދަނޑިމަތިން ދިޔައިރު، އޭރިއާތެރެއަށް ހުރަސްވި ބޯޅައަކަށް ދުވެފައި އަރައި، އައިހަމް ފޮނުވާލަން މަސައްކަތްކުރި ބޯޅަ ރަނގަޅަށް ފައިގައި ލައްވާލާ ގޮތެއްނުވި އެވެ. އަދި، ފޭދޫ އިއްބެ، ޖައްސާލި ބޯޅައަކަށް އޭރިއާތެރެއަށް އެރި، މާޒިޔާގެ ސާބިއާ މިޑްފީލްޑަރު، ނިކޯލަ ވުޖިޗިޗް، ޕެނަލްޓީ އަކަށް އެޕީލްކުރި އެވެ، އެކަމަކު، މެޗުގެ ރެފްެރީ، އިންޑިއާގެ ސެންތިލްނަތަން ސެކަރަން ނިންމީ ފައުލެއް ނެތް ކަމަށެވެ.
ދެ ވަނަ ހާފު ފެށިގެން ފަސް މިނިޓް ތެރޭ ރެގާރުން ލީޑުނެގި އެވެ. މިއީ، މެޗުގެ 50 ވަނަ މިިނިޓްގައި އަރިމަތިން އަރައި، އެ ޓީމުގެ އަޒީޒްބެކް ނެގި ހުރަހަކަށް އަރައި، އެއް ފަހަރުން ގޯލުގެ ދުރު ކަނަށް ބޯޅަ ފޮނުވާލައިގެން، ޕަންޒިއޭވް އޮޒޯޑްބެކް ޖެހި ގޯލެކެވެ. އެ ލަނޑު ޖެހިތާ ހަތަރު ވަރަކަށް މިނިޓް ފަހުން، މާޒިޔާގެ އިބްރާހިމް އައިސަމް، އޭރިއާބޭރުން ފޮނުވާލި ބޯޅައެއް އަމާޒުވީ ކީޕަރު ޓަކަމް އަތަށެވެ.
އޭގެ ފަހުން، މާޒިޔާ އިން ބަދަލުތަކެއް ގެނެސްގެން ލަނޑެއް ޖެހޭތޯ މަސައްކަތްކުރަމުންދިޔަ އެވެ. ބަދަލަކަށް އެރި، ޒުވާން ފޯވާޑް، މުހައްމަދު އިލާން އިމްރާނަށް ލިބުނު ފުރުސަތެއްގައި ނަަގައިދޭން މަސައްކަތްކުރި ބޯޅަ ވީ ބްލޮކެވެ. ބަދަލަކަށް ކުޅެން އެރި، މާޒިޔާގެ ބެނިން މިޑްފީލްޑަރު، ކޮޑްޖޯ ގޯމޭޒް ފޮނުވާލި ޝޮޓެއް ކީޕަރު ޓަކަމް ވަނީ އަތަށް ނަގައިފަ އެވެ.
މާޒިޔާ އިން އެއްވަރުކުރެވޭތޯ ކުރިއަށް ޖެހިގެން ކުޅެމުން ދަނިކޮށް މެޗުގެ 88 ވަނަ މިނިޓްގައި ރެގާރުން ވަނީ ދެ ވަނަ ލަނޑު ޖަހައިފަ އެވެ. މި ލަނޑު ޖެހީ ބަދަލަކަށް ކުޅެން އެރި، ޝެރްޒޯދް މަހްމަދިއެވް އެވެ. އޭރިއާތެރެއިން ލިބުނު ފުރުސަތުގައި އޭނާ ވަނީ ގޯލުގެ މަތީ ކަނަށް ބޯޅަ އަމާޒުކޮށްލައިފަ އެވެ.
އިތުރު ވަގުތުގެ ފުރަތަމަ މިނިޓްގައި، މާޒިޔާގެ އިލާން، ރެގާރުގެ އޭރިއާތެރެއިން ފޮނުވާލި ބޯޅަ ކީޕަރު، ޓަކަމް މަތަކުރިއިރު، އެ ބޯޅައިން ކައުންޓަ އެޓޭކުގައި ތަނަވަސްކުރި ފުރުސަތުގައި ރެގާރުން ތިން ވަނަ ލަނޑު ޖެހި އެވެ. މި ލަނޑު ވެސް ޖެހީ ބަދަލަކަށް ދެ ވަނަ ހާފުގައި ކުޅެން އެރި ކުޅުންތެރިއެެކެވެ. އޭރިއާތެރެއިން ލިބުނު ފުރުސަތުގައި، ސަފަރޯވް އަމިރުދްޒޯން ވަނީ ގޯލުގެ މަތީދާގަނޑަށް ބޯޅަ ވައްދާލައިފަ އެވެ.
މާޒިޔާ ބަލިކޮށް، ރެގާރުން މި ވަނީ އެންމެ ފަހުން އެ ޓީމުން ހުރިހާ މުބާރާތެއްގައި ކުޅުނު ހަ މެޗުން ވެސް މޮޅުވެފަ އެވެ. ތަޖިކިސްތާން ލީގުގެ ދެ ވަނައިގައި މި ވަގުތު އޮތީ ރެގާރު އެވެ. އެއީ އެއް ވަނައިގައި އޮތް ހޮސީލޮތު އަށް ވުރެން އެއް މެޗު މަދުން ކުޅުނު ނަމަވެސް އެ ޓީމާ އެއްވަރަށް ޕޮއިންޓް ހޯދައިގެންނެވެ.
