އިއްޔެ ކުޅުނު އޭއެފްސީ ޗެލެންޖް ލީގުގެ ޕްރިލިމިނަރީ ސްޓޭޖުގެ މެޗުތަކުން މޮޅުވެ، ބަންގްލަދޭޝްގެ ފޯޓިސް ފުޓްބޯލް ކްލަބް އާއި ބޫޓާންގެ ޕާރޯ ފުޓްބޯލް ކްލަބް މުބާރާތުގެ ގްރޫޕް ސްޓޭޖުން ޖާގަ ހޯދައިފި އެވެ.
ބަންގްލަދޭޝްގެ ފޯޓިސް އަކީ މިދިޔަ ސީޒަނުގައި އެ ގައުމުގެ ޕްރިމިއާ ލީގުގެ ތިން ވަނަ އެވެ. އެކަމަކު، ލީގުގެ ކުރިގައި އޮތް ޑާކާ އަބަހާނީ ލިިމިޓެޑާއި ބަޝުންދަރާ ކިންގްސް، ފީފާގެ އަަދަބެއް ތަންފީޒުކުރަމުން އަންނާތީވެ، ބަންގްލަފޭޝްގެ ލީގުން ޗެލެންޖް ލީގަށް ކަނޑައަޅާފައި އޮތް ޖާގަ ލިބުނީ ފޯޓިސް އަށެވެ.
ފޯޓިސް އިން އިއްޔެ، ޗެލެންޖް ލީގުގެ ކޮލިފައިންގައި ކުޅެފައިވަނީ، ކިރްގިސްތާންގެ ޕްރިމިއާ ލީގުގެ ދެ ވަނަ އަދި މިދިޔަ ސީޒަނުގެ އޭއެފްސީ ޗެލެންޖް ލީގުގެ ސެމީ ފައިނަލުގައި ވާދަކުރި މުރަސް ޔުނައިޓެޑާ އެވެ. މުރަސް ޔުނައިޓެޑް އަތުން ފޯޓިސް މޮޅުވީ 1-0 އިންނެވެ. ބަޝުންދަރާ ކިންގްސް އެެރީނާގައި ކުޅުނު މެޗުގައި ފޯޓިސްގެ ހަމައެކަނި ލަނޑު މެޗުގެ 52 ވަނަ މިނިޓްގައި ޖެހީ މުހައްމަދު އިބްރާހިމް އެވެ. މި މެޗުގައި ފޯޓިސްގެ ކީޕަރު، ސްރީ ލަންކާ ގައުމީ ޓީމުގެ ސުޖަން ޕެރެއިރާ ވަނީ މޮޅު ކުޅުމެއް ދައްކައިފަ އެވެ.
ބަންގްލަދޭޝްގެ އިން ދެން ޗެލެންޖު ލީގުގައި ކުޅުނު ބަންގްލަދޭޝް ޕޮލިސް ޓީމު ވަނީ، ސީރިއާގެ އަލް އިއްތިހާދު އަތުން 1-0 އިން ބަލިވެފަ އެވެ.
މިއީ، ފޯޓިސް އާއި ބަންގްލަދޭޝް ޕޮލިސް އިން އޭއެފްސީ މުބާރާތެއްގައި ކުޅުނު ފުރަތަމަ މެޗެވެ.
ބޫޓާންގެ ޕްރިމިއާ ލީިގުގެ ޗެމްޕިއަން، ޕާރޯ އިން ކުޅެފައިވަނީ، އަފްގާނިސްތާންގެ ޗެމްޕިއަން، އަބޫ މުސްލިމްއާ އެެވެ. އެ މެޗުން ޕާރޯ މޮޅުވެފައިވަނީ، 2-0 އިންނެވެ. އޭއެފްސީ ޗެލެންޖު ލީގުގައި ތިން ވަނަ ފަހަރަށް ކުޅެމުން އަންނަ ޕާރޯ އިން ތިމްޕޫ ސިޓީގެ ޗަންގްލިމިތަން ސްޓޭޑިއަމްގައި ކުޅުނު މެޗުގައި ލީޑުނެގީ، 18 ވަނަ މިނިޓްގައި މިޝީމާ ޖެހި ގޯލުންނެވެ. އަދި، މެޗުގެ ފުރިހަމަ ވަގުތު ހަަމަވާން ހަ މިނިޓަށް ވެފައި ވަނިކޮށް، 84 ވަނަ މިނިޓްގައި އެ ޓީމުގެ ދެ ވަނަ ލަނޑު ޖެހީ، ބަލްދޭ އެވެ.
ޗެލެންޖް ލީގުގައި މިއަދު ހަވީރު، ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނުން ކުޅޭނީ، ތަޖިކިސްތާންގެ ކަޕް ޗެމްޕިއަން، ރެގާރު ޓަޑާޒްއާ ދެކޮޅަށެވެ.
