ރަށްރަށުގެ އިހުތިސާސްގައި ހިމެނޭ ބިންތައް ސަރުކާރަށް ނެގޭ ގޮތަށް ލާމަުކަޒީ ގާނޫނަށް ހުށަހަޅާފައިވާ އިސްލާހާ ދެކޮޅަށް މާލެ ސިޓީ ކައުންސިލް އިސްވެ އޮވެ، ރާއްޖޭގެ އެހެން ކައުންސިލްތަކާ ގުޅިގެން އިހުތިޖާޖުކުރަން ފާސްކޮށްފި އެވެ.
މާލެ ސިޓީ ކައުންސިލްގެ މިއަދު އޮތް ޖަލްސާއަށް އެ ހުށަހެޅުއްވުން ހުށަހެޅުއްވީ، ހުޅުމާލެ އުތުރު ދާއިރާގެ ކައުންސިލަރު، ފާތިމަތު ޒަހިއްޔާ (ޒާޔާ) އެވެ. އެ ހުށަހެޅުއްވުމަށް ތާއީދުކުރެއްވީ މާލޭގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސާ، ފާތިމަތު ސަހުލާ އެވެ.
އެ ހުށަހެޅުއްވުން، ހުށަހަޅުއްވަމުން ޒާޔާ ވިދާޅުވީ އަތޮޅު ކައުންސިލްތައް އުވާލައި ލާމަރުކަޒީ ގާނޫނުގެ ދަށުން ކައުންސިލްތަކަށް ލިބިދޭ ބާރުތައް އަތުލުމަށް ހުރިހާ މަސައްކަތެއް ސަރުކާރުން ކޮށް ނިންމިއިރު، އެކަމާ ދެކޮޅަށް ކައުންސިލްތަކަށް އެކަށީގެންވާ މަސައްކަތެއް އޭރު ކުރެވިފައި ނުވާ ކަމަށެވެ.
"ފަހަރަކު ބާރެއް އަތުލަމުން ގޮސް، ކައުންސިލްތަކަށް ލިބިފައިވާ ހުރިހާ ބާރެއް ސަރުކާރުން އަތުލާނެ. އަދި އެވަރުން ނުވެގެން ސަރުކާރުން ބޭނުންވާ ކައުންސިލްތައް އުވައިލާ ދަރަޖައަށް މިކަން ނުދާނެއެކޭ އަޅުގަނޑު ނުދަންނަވާނަން،" ޒާޔާ ވިދާޅުވި އެވެ.
އޭނާގެ ހުށަހެޅުއްވުމަށް ތާއީދުކުރައްވައި ވާހަކަދައްކަވަމުން ސަހުލާ ވިދާޅުވީ ކައުންސިލްތަކުގެ ބާރުތައް އަތުލައި ކައުންސިލްތަކުގެ އަތްފައި ބަންނަން ސަރުކާރުން މަސައްކަތް ކުރަނީ، ސަރުކާރަށް އެއްވެސް ކަމެއް ނުކުރެވޭތީ ކަމަށެވެ.
"ފިނިހަކަ ދުވެލީގައި ސަރުކާރު ހިންގުމަކީ އެއީ ކައުންސިލްތަކުގެ ކުށެއް ނޫން އިނގޭތޯ؟ ކައުންސިލްތައް އެބަދޭ މަސައްކަތް ކުރަމުން، މިފަހަރު އަޅުގަނޑުމެން، ލޯކަލް ކައުންސިލް އިންތިހާބު އެ ބޭފުޅުންނަށް ނުލިބުމަކީ ވެސް އެއީ އަޅުގަނޑުމެންގެ ކުށެއް ނޫން،" ސަހުލާ ވިދާޅުވި އެވެ.
އޭނާ ވިދާޅުވީ ތަރައްގީގެ މަޝްރޫއުތައް ހިންގުމަށް ރާއްޖޭގެ ކައުންސިލްތަކުން ސަރުކާރަށް އެއްބާރުލުންދޭ ކަމަށެވެ. އަދި، މާލޭގެ މަސް މާރުކޭޓު ތަރައްގީ ކުރުމަށް މާލެ ސިޓީ ކައުންސިލުން މި ހަފުތާގެ ތެރޭގައި ސަރުކާރަށް ދިނުމަކީ އޭގެ އަލިގަދަ ހެއްކެއް ކަމަށް ވެސް އޭނާ ވިދާޅުވި އެވެ.
އަންނަ އާދީއްތަ ދުވަހުގެ ނިޔަލަށް ދިރާސާކޮށް ނިންމަން މަޖިލީހުގެ ލާމަރުކަޒީ ކޮމިޓީން ނިންމާފައިވާ އެ ބިލު ވަގުތުން އަނބުރާ ގެންދަން ލޯކަލް ކައުންސިލް އެސޯސިއޭޝަން (އެމްއެލްސީއޭ) ހިމެނޭ ގޮތަށް ހަތް ޖަމިއްޔާއަކުން މިއަދު ވަނީ ގޮވައިލައިފަ އެވެ.
ކައުންސިލް އެސޯސިއޭޝަންގެ އިތުރުން ހަ ޖަމިއްޔާއަކުން މިއަދު ނެރުނު ބަޔާނުގައި ސޮއިކޮށްފައި ވަނީ ޓްރާންސްޕޭރެންސީ މޯލްޑިވްސް، ޒީރޯ ވޭސްޓް މޯލްޑިވްސް، ސޭވް މޯލްޑިވްސް ކެމްޕެއިން، ޕްރޮޖެކްޓް ތިމާވެށި، މޯލްޑިވްސް ރެޒިލިއަންޓް ރީފްސް އަދި އީކޯ ކެއާ އެވެ.
އެ ޖަމިއްޔާތަކުން ނެރުނު ނޫސް ބަޔާނުގައި ބުނީ ރައީސުލްޖުމްހޫރިއްޔާ އާއި ކެބިނެޓުގެ އިހުތިޔާރަށް ރައްޔިތުންގެ އިޖުތިމާއީ އަދި އިގްތިސާދީ ވަސީލަތްތައް އަތުލުމަށް މަގުފަހިކުރާ އިސްލާހަކީ ބާރުތައް މަރުކަޒުކޮށް މުޖުތަމައުތައް މަރުކަޒީ ސަރުކާރަށް ބަރޯސާ ކުރުވުމަށް ހިންގާ ހަރަކާތަށް އިތުރުވި އަމަލެއް ކަމަށެވެ.
ޖަމިއްޔާތަކުންނާއި ކައުންސިލްތަކުން އެ ބިލާމެދު ކަންބޮޑުވުން ފާޅުކުރަމުންދާއިރު، އެ ބިލަށް ޝަކުވާ ހުށަހެޅުމުގެ ސުންގަޑި މާދަމާ ހަމަ ވާނެ އެވެ.
