ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި ރަށްތަކާއި ސިޓީ ކައުންސިލުތަކުގެ އިހުތިސާސުން ބިންތަކާއި ތަންތަން މައި ސަރުކާރުން ބޭނުން އިރެއްގައި ވަކިކޮށް، އެ ތަންތަން ސަރުކާރަށް ނެގޭ ގޮތަށް ގާނޫނަށް ގެންނަން ހުށަހެޅި އިސްލާހު ވަގުތުން އަނބުރާ ގެންދަން ލޯކަލް ކައުންސިލް އެސޯސިއޭޝަން (އެމްއެލްސީއޭ) ހިމެނޭ ގޮތަށް ހަތް ޖަމިއްޔާއަކުން މިއަދު ގޮވާލައިފި އެވެ.
މި ނޫސްބަޔާން ނެރުނީ ކައުންސިލް އެސޯސިއޭޝަންގެ އިތުރުން ޓްރާންސްޕޭރެންސީ މޯލްޑިވްސް، ޒީރޯ ވޭސްޓް މޯލްޑިވްސް، ސޭވް މޯލްޑިވްސް ކެމްޕެއިން، ޕްރޮޖެކްޓް ތިމާވެށި، މޯލްޑިވްސް ރެޒިލިއަންޓް ރީފްސް އަދި އީކޯ ކެއާ ގުޅިގެންނެވެ.
އެ ޖަމިއްޔާތަކުން ނެރުނު ނޫސް ބަޔާނުގައި ބުނީ ރައީސުލްޖުމްހޫރިއްޔާ އާއި ކެބިނެޓުގެ އިހުތިޔާރަށް ރައްޔިތުންގެ އިޖުތިމާއީ އަދި އިގްތިސާދީ ވަސީލަތްތައް އަތުލުމަށް މަގުފަހިކުރާ އިސްލާހަކީ ބާރުތައް މަރުކަޒުކޮށް މުޖުތަމައުތައް މަރުކަޒީ ސަރުކާރަށް ބަރޯސާ ކުރުވުމަށް ހިންގާ ހަރަކާތަށް އިތުރުވި އަމަލެއް ކަމަށެވެ.
"ކައުންސިލްތަކުގެ އިހުތިސާސްގައިވާ ބިމާއި، ފަޅާއި، ކަނޑުގެ ސަރަހައްދުތައް ސަރުކާރަށް ނެގޭގޮތަށް ހުށަހަޅާފައިވާ ހުށަހެޅުމަކީ ލާމަރުކަޒީ ނިޒާމް އިތުރަށް ހީނަރު ކުރުވާނެ ނިންމުމެއް. ރަށްރަށުގެ ބިމާއި، ފަޅާއި، ކަނޑުގެ ސަރަހައްދަކީ އެ ރަށްރަށުގެ އިގްތިސާދީ އަދި އިޖުތިމާއީ ދިރުމެއް،" ނޫސް ބަޔާނުގައި ބުންޏެވެ.
ސަރުކާރުގެ އިހުތިޔާރީ ނިންމުމަކުން މި ވަސީލަތްތައް އަތުލުމަކީ، ގާނޫނުއަސާސީއިން ލާމަރުކަޒީ ނިޒާމް މެދުވެރިކޮށް ރައްޔިތުންނަށް ކަށަވަރުކޮށްދީފައިވާ އަމިއްލަ ރަށުގެ ކަންކަން އަމިއްލައަށް ނިންމުމުގެ ހައްގު ނިގުޅައިގަތުން ކަމަށް ޖަމިއްޔާތަކުން ބުންޏެވެ.
ރައްޔިތުންގެ ވަސީލަތްތައް ރައްޔިތުންގެ ބަހެއްނެތި ސަރުކާރަށް ނަގާ ގޮތަށް އޮތުމުން މުޖުތަމައުގެ ކަންކަން ކުރުމަށް ބޭނުންވާ އާމްދަނީ ގެއްލި، މުޖުތަމައު ހިންގުމަށްޓަކައި މަރުކަޒީ ސަރުކާރަށް އިތުރަށް ބަރޯސާވާންޖެހޭ ގޮތަށް ނިޒާމް ތަރުތީބު ކުރެވޭނެކަން ފާހަގަކޮށް ޖަމިއްޔާތަކުން ބުނީ އެކަމުގެ އެންމެ ފަހުގެ މިސާލަކީ އައްޑޫ ސިޓީގެ އިހުތިސާސުން ސަވާހެލި އަދި ހަންކެޑެ އުނިކުރުމެވެ.
ޖަމިއްޔާތަކުން ގޮވާލީ މަރުކަޒީ ސަރުކާރުން ކައުންސިލެއްގެ އިހުތިސާސަށް ބަދަލު ގެނައުމަށް ނުވަތަ މުދަލެއް ނެގުމަށް އެދޭނަމަ އެކަމާގުޅޭ ރަށުގެ ނުވަތަ ސިޓީ ކައުންސިލާއެކު ރަސްމީކޮށް މަޝްވަރާކޮށް، އިހުތިސާސާއި ވަސީލަތްތައް ނެގުމުގައި އަމަލުކުރާނެ އުސޫލުތައް ލޯކަލް ގަވަރމަންޓް އޮތޯރިޓީ (އެލްޖީއޭ) އިން އާންމުކޮށް ޝާއިއުކުރުމެވެ.
މީގެއިތުރުން ސަރުކާރުގެ އެދުމާމެދު ގޮތެއް ނިންމުމުގެ ކުރިން، ކައުންސިލުން ރައްޔިތުންގެ ބައްދަލުވުމެއް ބާއްވައި ރައްޔިތުންގެ ހިޔާލު ހޯދުމާއި ސަރަހައްދެއް ނެގުމަކީ މުޅި ދައުލަތުގެ ނުވަތަ އާންމު މަންފާއަށްޓަކައި ކުރެވޭ ކަމެއްކަން ސަރުކާރުން ސަރީހަކޮށް ބަޔާންކޮށް ޝާއިއުކުރަން ވެސް ޖަމިއްޔާތަކުން ގޮވާލި އެވެ.
