އާސެނަލް ބަލިކޮށްލައި ޕީއެސްޖީން ޗެމްޕިއަންސް ލީގުގެ ތަށި ދިފާއުކޮށްފި

May 31, 2026, 12:29 AM
ޕީއެސްޖީގެ ކުޅުންތެރިން ޖެހިޖެހިގެން ދެ ވަނަ އަހަރު ޗެމްޕިއަންސް ލީގުގެ ތަށި އުފުލާލަނީ.

ޕީއެސްޖީގެ ކުޅުންތެރިން ޖެހިޖެހިގެން ދެ ވަނަ އަހަރު ޗެމްޕިއަންސް ލީގުގެ ތަށި އުފުލާލަނީ.

ބުޑަޕެސްޓް, ހަންގޭރީ (މެއި 31) - ފައިނަލުގައި ޕެނަލްޓީ ޖަހައިގެން 4-3 އިން އާސެނަލް ބަލިކޮށްލައި، ޕީއެސްޖީން ޔޫރަޕްގެ އެންމެ ބޮޑު ކްލަބް ފުޓްބޯޅަ މުބާާރާތް، ޔުއެފާ ޗެމްޕިއަންސް ލީގުގެ ތަށި ވަނީ ދިފާއުކޮށްފައި.

އާސެނަލުން މުބާރާތުގެ ފައިނަލަށް ދެ ފަހަރު ދިޔައިރު، ދެ ފަހަރު ވެސް ވަނީ ބަލިވެފަ އެވެ. މީގެ 20 އަހަރު ކުރިން، 2006 ވަނަ އަހަރުގެ ފައިނަލުގައި ވެސް އާސެނަލުން ފުރަތަމަ ލީޑުނެގި ނަމަވެސް ބާސެލޯނާ އަތުން 2-1 އިން ބަލިވީ އެވެ. މިރޭ، ޕީއެސްޖީ ކައިރީގައި ވެސް ލީޑުނެގިއިރު، މެޗު އެއްވަރުވެ، ޕެނަލްޓީގައި ވަނީ ބަލިވެފަ އެވެ. ޕީއެސްޖީން މިދިޔަ ސީޒަނުގެ ޗެމްޕިއަންސް ލީގު ކާމިޔާބުކުރީ ފައިނަލުގައި 5-0 އިން އިންޓަ މިލާން ބަލިކޮށްފަ އެވެ. 

ހަންގޭރީގެ ޕުސްކަސް އެރީނާގައި މިރޭ ކުޅުނު މެޗުގެ ފަސް ވަނަ މިނިޓްގައި އާސެނަލުން ލީޑުނެގި އެވެ. މި ލަނޑު ޖެހީ ޕީއެސްޖީގެ ޑިފެންސް ފަހަތަށް އައި ބޯޅައެއް ހިފައިގެން އޭރިއާތެރެއަށް ވަދެ ގޯލުގެ މަތީ ދާގަނޑަށް އަމާޒުކޮށްލައިގެން ޖަރުމަނުގެ ފޯވާޑް، ކައި ހަވާޓްޒް އެވެ. މިއީ، ހަވާޓްޒްގެ ކެރިއަރުގައި ޗެމްޕިއަންސް ލީގުގެ ފައިނަލެއްގައި ޖެހި ދެ ވަނަ ގޯލެވެ. މީގެ ފަސް އަހަރު ކުރިން ޗެލްސީން މެންޗެސްޓާ ސިޓީ ބަލިކޮށް ޗެމްޕިއަންސް ލީގު ކާމިޔާބުކުރި ލަނޑު ޖެހީ ހަވާޓްޒް އެވެ. 

ޗެމްޕިއަންސް ލީގުގެ ފައިނަލުގައި ލަނޑު ޖެހުމަށް ފަހު އާސެނަލްގެ ހަވާޓްޒް އުފާފާޅުކުރަނީ.
ޗެމްޕިއަންސް ލީގުގެ ފައިނަލުގައި ލަނޑު ޖެހުމަށް ފަހު އާސެނަލްގެ ހަވާޓްޒް އުފާފާޅުކުރަނީ.

ލީޑު ލިބުމާ އެކު، އާސެނަލުން ފަހަތަށް ޖެހިގެން ރަނގަޅަށް ޑިފެންސް ކުރަމުންދިޔަ އެވެ. އެ ގޮތުން، ފުރަތަމަ ހާފުގައި ޕީއެސްޖީ އަށް އާސެނަލްގެ ކީޕަރު ޑޭވިޑް ރާޔާ ޓެސްޓްކޮށްލެވޭ ވަރުގެ ރަނގަޅު ހަމަލާއެއް ފޮނުވާނުލެވުނެވެ. އެކަމަކު، ދެ ވަނަ ހާފު ފަށައިގެން ޕީއެސްޖީން ލިބޭ ފުރުސަތުތަކުގައި ކުރިއަށް ބޯޅަ ހިފައިގެން ގޮސް އާސެނަލަށް ނުރައްކާ ކުރަން ފެށި އެވެ. 

ޕީއެސްޖީން އެއްވަރުކުރީ 65 ވަނަ މިނިޓްގައި ޕެނަލްޓީ އަކުން އޮސްމާން ޑެމްބެލޭ ޖެހި ގޯލުންނެވެ. މި ޕެނަލްޓީ ދޭން ނިންމީ އާސެނަލްގެ ޑިފެންޑަރު، ކްރިސްޓިއަން މޮސްކޭރާ، އެ ޓީމުގެ އޭރިއާތެރެއިން ޕީއެސްޖީގެ ކްވިޗާ ކްވަރަޝްކޭލިއާ އަށް ކުރި ފައުލަކަށެވެ. ފައުލު ދޭން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ވެސް ބެލުމަށް ފަހު އެވެ. 

މެޗުގެ ފުރިހަަމަ ވަގުތުގެ ތެރޭގައި، މޮޅުވާން ދެ ޓީމުން ވެސް މަސައްކަތްކުރިއިރު، ޕީއެސްޖީގެ މިޑްފީލްޑަރު، ވިޓީނިއާ އޭރިއާ ރޮނގުކައިރިން ފޮނުވާލި ބޯޅަ ދިޔައީ ހުރަސްދަނޑިމަތިން ބޭރަށެވެ. އާސެނަލުން ވެސް ބަދަލުތަކެއް ގެނެސްގެން އެޓޭކަށް ބޯޅަ ހިފައިގެންދިޔަ ނަމަވެސް މާ ރަނގަޅު އެޓޭކްތަކެއް ކުރެވޭ ގޮތެއްނުވި އެވެ. 

އިތުރު ވަގުުތުގެ ދެ ހާފު ނަތީޖާ ނެރުމަށްޓަކައި ކުޅުނު ނަމަވެސް ދެ ޓީމުން ކުރެ އެއްވެސް ޓީމަކަށް ލަނޑެއް ނުޖެހި، 10 އަހަރު ފަހުން ޗެމްޕިއަންސް ލީގުގެ ފައިނަލެއް ވަނީ ޕެނަލްޓީ އަށް ގޮސްފަ އެވެ.

ޕީއެސްޖީ އަށް އެއްވަރުކޮށްދިން ޕެނަލްޓީ ޖެހުމަށް ފަހު ޑެމްބެލޭ އުފާފާޅުކުރަނީ
ޕީއެސްޖީ އަށް އެއްވަރުކޮށްދިން ޕެނަލްޓީ ޖެހުމަށް ފަހު ޑެމްބެލޭ އުފާފާޅުކުރަނީ

އެ ގޮތުން، ޕެނަލްޓީގައި، ޕީއެސްޖީގެ ގޮންޒާލޯ ރާމޯސް އާއި ޑެޒެއާ ޑުއޭ ފޮނުވާލި ޕެނަލްޓީތައް ކާމިޔާބުކުރިއިރު، އާސެނަލުން ފުރަތަމަ ޕެނަލްޓީ، ވިކްޓަ ޔޯކެރޭޝް ވައްދާލި ނަމަވެސް ދެ ވަނަ އަށް ޕެނަލްޓީ ފޮނުވާލި އެބެރޭޗީ އެޒޭ ޖެހި ޕެނަލްޓީ ދިޔައީ ދަނޑިކައިރިން ބޭރުންނެވެ. އެކަމަކު، ޖެހިގެން އައި ޕެނަލްޓީ ޕީއެސްޖީގެ ނޫނޯ މެންޑޭސް، ފޮނުވާލިއިރު، އާސެނަލްގެ ކީޕަރު ޑޭވިޑް ރާޔާ ވަނީ އެ ޕެނަލްޓީ ހުއްޓުވައިފަ އެވެ. އޭގެ ފަހުން، އާސެނަލްގެ ޑެކްލަން ރައިސް އާއި ގަބްރިއެލް މާޓިނެލީ ޕެނަލްޓީތައް ކާމިޔާބުކުރި އެވެ. އަދި، ޕީއެސްޖީން އަޝްރަފް ހަކީމީ އާއި ލޫކަސް ބެރާލްޑޯ ޕެނަލްޓީ ވައްދާލިއިރު، އާސެނަލްގެ ފަސް ވަނަ ޕެނަލްޓީ ފޮނުވާލި ގަބްރިއެލް މަގާޅައެސް އަށް ގޯލާ ސީދާކޮށް ބޯޅަ ފޮނުވާނުލެވި، އެ ޓީމު މެޗުން ބަލިވީ އެވެ. 

މިއާ އެކު، އިނގިރޭސި ޕްރިމިއާ ލީގުގެ ޗެމްޕިއަންކަން 22 އަހަރު ފަހުން މި ސީޒަނުގައި ހޯދި އާސެނަލުން އެ ކްލަބްގެ ތާރީހުގައި ފުރަތަމަ ފަހަރަށް ޗެމްޕިއަންސް ލީގެއް ހޯދަން ކުރާ އިންތިޒާރު ދިގުލީ އެވެ. މި ސީޒަނުގައި އެއްވެސް މެޗަކުން ބަލިނުވެ ފައިނަލަށް ދަތުރުކުރި އާސެނަލް މިދިޔަ އަހަރުގެ ޗެމްޕިއަންސް ލީގުން ކެޓީ ސެމީ ފައިނަލުގައި ޕީއެސްޖީ އަތުން ބަލިވެގެންނެވެ. އާސެނަލަކީ ޗެމްޕިއަންސް ލީގުގައި އެންމެ ގިނަ މެޗު ކުޅެ އެ މުބާރާތް ކާމިޔާބު ނުވެ އޮތް ހަމައެކަނި ޓީމެވެ. މިއީ، ޗެމްޕިއަންސް ލީގުގައި އާސެނަލްގެ 226 ވަނަ މެޗެވެ. 

ޕީއެސްޖީ އަކީ ޗެމްޕިއަންސް ލީގުގެ ތަށި ދިފާއުކުރި ނުވަ ވަނަ ޓީމެވެ. މީގެ ކުރިން، އެކަން ހާސިލްކުރި ޓީމުތަކަކީ، ރެއާލް މެޑްރިޑް ދެ ފަހަރަށާއި ލިވަޕޫލް، އޭސީ މިލާން، ބަޔާން މިއުނިކް، އިންޓަ މިލާން، ބެންފީކާ، އަޔަކްސް އަދި ނޮޓިންހަމް ފޮރެސްޓް އެވެ. 

ކޮމެންޓް

ފަހުގެ ޚަބަރު

ބްރޭކްތައް އަންނަ ގޮތުން "ލީގުގެ ފީލްއެއް ނީނދޭ": އާތީ

ދިވެހި ޕްރިމިއާ ލީގު މެދުކަނޑާލަން ޖެހުމުން ކުޅުންތެރިންގެ ފިޓްނަސް އާއި ޕާފޯމަންސަށް އަސަރުކޮށް، ލީގުގެ އަސްލު ފޯރި ނުލިބޭ ކަމަށް ޓީސީގެ ކޯޗު އާތީ ބުނެފި. އާތީ ފާހަގަކުރި ގޮތުގައި ގިނަ ދުވަސްތަކެއްގެ ބްރޭކްތަކުގެ ސަބަބުން ޓީމުތަކުގެ ކޮންޓިނިއުޓީ ގެއްލި، މެޗުތަކަށް ތައްޔާރުވުމުގައި ބޮޑެތި ގޮންޖެހުންތަކެއް ކުރިމަތިވޭ

ފީފާގެ އިންތިހާބުގައި އަރަބިންގެ ތާއީދު އިންފަންޓީނޯ އަށް

އަންނަ އަހަރު ބާއްވާ ފީފާގެ އިންތިހާބުގައި މިހާރުގެ ރައީސް ޖިއާނީ އިންފަންޓީނޯއަށް ތާއީދުކުރުމަށް 22 ގައުމު ހިމެނޭ އަރަބް ފުޓްބޯޅަ ޔޫނިއަން (ޔޫއޭއެފްއޭ) އިން ނިންމައިފިއެވެ. އިންފަންޓީނޯއާ އެކު ޖުމްލަ ތިން ކެންޑިޑޭޓުން ވާދަކުރާ މި އިންތިހާބުގައި، އޭޝިއާ އާއި އެފްރިކާގެ ގައުމުތަކުގެ ބޮޑު ތާއީދަކާއެކު އޭނާއަށް މަގާމު ދިފާއުކުރުމުގެ ފުރުސަތު ބޮޑުކަމަށް ބެލެވެއެވެ. ފީފާގެ އާ ރައީސަކު ހޮވުމަށް ވޯޓުލުން އޮންނާނީ އަންނަ އަހަރުގެ މާޗް މަހު މޮރޮކޯގައި ބާއްވާ ފީފާ ކޮންގްރެސްގައެވެ.

އިންޑިއާގެ ލެޖެންޑުން ފުޓްބޯޅަ ރައީސްގެ ޝަކުވާ ސަރުކާރަށް

އިންޑިއާގެ ފުޓްބޯޅަ ފެޑެރޭޝަންގެ ރައީސް ކަލްޔާން ޗޯބޭގެ އިތުބާރު ނެތްކަމުގެ މައްސަލަ، ބައިޗުން ބުޓިއާ ހިމެނޭހެން އެ ގައުމުގެ 14 ލެޖެންޑުން ސްޕޯޓްސް މިނިސްޓަރަށް ހުށަހަޅައިފި. މި ސިޓީގައި ފާހަގަކޮށްފައިވަނީ ފެޑެރޭޝަންގެ މާލީ ހާލަތު ގޯސްވެ ބަނގުރޫޓުވަމުންދާ ކަމަށް

ސުޒޭނާއި މޯހަންގެ ދުލުން: ބަދުނަސީބާއި ހައްލެއްގެ ވާހަކަ!

ސަރަހައްދުގެ އެހެން ގައުމުތަކުން ބޭރުގައި އުޅޭ އެ ގައުމުތަކުގެ ދަރިފަސްކޮޅުގެ ކުޅުންތެރިންނަށް ރަށްވެހިކަން ދީގެން ގައުމީ ޓީމުތައް ވަރުގަދަކުރަމުންދާއިރު، ރާއްޖެއަށް އެ ފުރުސަތު ކުޑަކަމަށް ކުރީގެ ކޯޗުން ފާހަގަކުރެއެވެ. މިކަމުގެ ސަބަބުން ރާއްޖޭގެ ފުޓްބޯޅައަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދުމަށް އެކަށީގެންވާ ނިޒާމެއް ނެތްކަމުގެ ކަންބޮޑުވުން ވަނީ ފާޅުކޮށްފައެވެ.

ވޭގާގެ ނަމެއް ނެތް، ފީފާ އިންތިހާބުގައި ތިން ކެންޑިޑޭޓުން!

އަންނަ އަހަރު ބާއްވާ ފީފާގެ އިންތިހާބުގައި ވާދަކުރާ ތިން ކެންޑިޑޭޓުންގެ ނަން އިއުލާނުކުރިއިރު، ކުރީގެ ކުޅުންތެރިޔާ ރަމޮން ވޭގާގެ ނަން ޝަރުތު ހަމަނުވުމުގެ ސަބަބުން ވަނީ ބާކީވެފައި. މި އިންތިހާބުގައި ވާދަކުރައްވަނީ މިހާރުގެ ރައީސް އިންފަންޓީނޯގެ އިތުރުން ފްރާންސްގެ ފިލިޕޭ ޑިއާލޯ އަދި ޖަޕާނުގެ ކޯޒޯ ޓަޝީމާ

އަނިޔާއިން ރަނގަޅުވެ އިލާން އެނބުރި އަންނަން ތައްޔާރު

ކަކުލަށް ލިބުނު އަނިޔާއަކާ ގުޅިގެން ދެ މަހެއްހާ ދުވަހު ކުޅުމާ ދުރުގައި ހުރުމަށްފަހު، މާޒިޔާގެ ފޯވާޑް މުހައްމަދު އިލާން އިމްރާން އަލުން ކުޅުމަށް އެނބުރި އަންނަން ތައްޔާރުވެއްޖެ. މި އަނިޔާގެ ސަބަބުން އިލާނަށް ސާފް ޗެމްޕިއަންޝިޕާއި ލީގުގެ މުހިންމު މެޗުތަކެއް ގެއްލުނު ނަމަވެސް، އޭނާ މިހާރު ވަނީ ފަރިތަކުރުންތަކުގައި ބައިވެރިވާން ފަށާފައި

ފީފާ އިން ނޭޕާލްގެ ސަސްޕެންޝަން އުވާލަނީ؟

ފީފާގެ އެންގުންތަކަށް ބޯނުލެނބުމުގެ ސަބަބުން ނޭޕާލް ފުޓްބޯޅަ ފެޑެރޭޝަނަށް ދީފައިވާ ސަސްޕެންޝަން، ކުރިއަށް އޮތް މަހެއްހާ ދުވަސް ތެރޭގައި އުވާލާނެ ކަމަށް ނޭޕާލުން ވަނީ ބުނެފައި. މި ސަސްޕެންޝަން އުވާލުމަށް ނޭޕާލް ސަރުކާރުގެ މަންދޫބުން ފީފާ އާއި އޭއެފްސީއާ އެކު މަޝްވަރާކޮށްފައި

Newsletter

Get the latest news delivered straight to your inbox