ތަކެތީގެ އަގުތައް ހިފެހެއްޓުމެއް ނެތި އުފުލެމުން އަންނާތީ "ދަތިވެއްޖެ" ނަމުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މާދަމާ ރޭ ބޭއްވުމަށް ހަމަޖެހިފައިވާ މުޒާހަރާ ކުރިއަށްދާނީ ފުލުހުން ދީފައި އޮތް ޔަގީންކަމާ އެއްގޮތަށް މަޖީދީ މަގުން ކަމަށް އެ ޕާޓީން ބުނެފި އެވެ.
އެމްޑީޕީން މަޖީދީ މަގުން މުޒާހަރާ ކުރަން ހުށަހަޅާފައިވާ ގަޑިއަކީ ބާރުބޮޑު ގަޑިއަކަށްވާތީ އެ ގަޑީގައި މުޒާހަރާ ކުރުމުގެ ފުރުސަތު ނުދެވޭނެ ކަމަށް ހޯމް މިނިސްޓަރު އަލީ އިހުސާން އިއްޔެގެ މަޖިލިސް ޖަލްސާގައި ވިދާޅުވި އެވެ. އެ ވާހަކަތައް މިއަދު ނެރުނު ބަޔާނެއްގައި އެމްޑީޕީން ވަނީ ކުށްވެރިކޮށްފަ އެވެ.
މުޒާހަރާއަށް އިއުލާން ކުރުމަށް ފަހު އިންތިޒާމު ކޮމިޓީގެ ފަރާތުން ފުލުހުންނާ ބައްދަލުކޮށްފައިވާ ކަމަށް އެމްޑީޕީން ބުނެފައިވެ އެވެ. އެ ބައްދަލުވުމުގައި މުޒާހަރާ މަޖީދީ މަގުން ކުރިއަށްގެންދިޔުމުގެ ފުރުސަތު ދޭނެކަމުގެ ޔަގީންކަން ފުލުހުން ދީފައިވާ ކަމަށް އެމްޑީޕީގެ ބަޔާނުގައި ބުނެފައިވެ އެވެ.
"މާލޭގެ މައި މަގުތަކުގައި މިވަގުތު މަރާމާތުގެ މަސައްކަތްތައް ކުރިއަށްދާތީ މަޖީދީ މަގު ފިޔަވައި މުޒާހަރާކުރުމަށް އެކަށީގެންވާ މަގެއް ނުވެސް ނެތްކަމަށާއި އެހެންވީމާ އެފަދަ މުޒާހަރާއެއް ކުރިއަށް ގެންދެވޭނީ ވެސް މަޖީދީ މަގުގައި ކަމަށް ފުލުހުން އެ ބައްދަލުވުމުގައި ވިދާޅުވި،" އެމްޑީޕީގެ ބަޔާނުގައި ބުނެފައިވެ އެވެ.
އެހެން ނަމަވެސް، މީގެ ކުރިން ފުލުހުން އަމަލުކޮށްފައިވާ ގޮތުން ފަހު ވަގުތު އެ ފުރުސަތު ނުދީފާނެކަމުގެ ކަންބޮޑުވުން އެ ކޮމިޓީގެ މެންބަރުން ފުލުހުންނާ ހިއްސާކުރެއްވި ކަމަށް އެމްޑީޕީން ބުނެފައިވެ އެވެ. އެ ބައްދަލުވުމުގައި ފުލުހުންގެ ގްރައުންޑް ކޮމާންޑަރުން 'މިފަހަރު އެހެން ނުވާނެ' ކަމަށް ވިދާޅުވި ކަމަށް އެމްޑީޕީން ބުނެފައިވެ އެވެ.
"ސުލްހަވެރިކަމާއެކު ކުރާ އިހުތިޖާޖުތަކަކީ ޑިމޮކްރެސީގެ އަސާސެކެވެ. އެ އަސާސީ ހައްގުގެ ބޭނުންކޮށް، އިހުތިޖާޖު ކުރުމުގެ ފުރުސަތު ނުދޭނޭކަމަށް މިނިސްޓަރު ވިދާޅުވި ވާހަކަފުޅަކީ، މިއީ ޑިމޮކްރެޓިކް އުސޫލުތަކަށް އިހުތިރާމު ނުކުރާ ސަރުކާރެއްކަން ހާމަކޮށް އާންމުކޮށް ކުރެއްވި އިއުލާނެކެވެ،" އެމްޑީޕީން ބުނެފައިވެ އެވެ./
މި މުޒާހަރާގެ ބައިވެރިންނަށް ރައްކާތެރިކަން ފޯރުކޮށްދީ، މުޒާހަރާކުރުމުގެ ހައްގުގެ ބޭނުން ހިފުމުގެ ފުރުސަތު ފަހި ކޮށްދިނުމަށް އެމްޑީޕީން ވަނީ ގޮވާލާފަ އެވެ.
މަޖީދީ މަގުން މުޒާހަރާ ކުރިއަށްގެންދަން އެދުނީ ގިނަ ގެތައް މަޖީދީ މަގު ސަރަހައްދުގައި ހުންނާތީ، ގިނަ އަދަދެއްގެ ރައްޔިތުންނާ ހިސާބަށް އަޑު ފޯރާވަރަށް ޝުއޫރު ފާޅުކުރުމަށް ކަމަށް އެމްޑީޕީން ބުންޏެވެ.
އެމްޑީޕީގެ މުޒާހަރާ އޮގަސްޓް 13، ވާ ބުރާސްފަތި ދުވަހުގެ ރޭ 20:30 ގައި ފެށުމަށް ހަމަޖެހިފައިވަނީ މަޖީދީ މަގު، ސޯޝަލް ސެންޓަރު ކުރިމަތިންނެވެ.
"ދަތިވެއްޖެ" ނަމުގައި މި މުޒާހާރާ ބޭއްވުމަށް ރާވަމުންދަނީ ތަކެތީގެ އަގު އިންތިހާއަށް ބޮޑުވެފައިވާތީ އެވެ. ސަރުކާރުން އާންމު ތަފާސްހިސާބުތަކަށް ބަލާއިރު، އަހަރެއްގެ ތެރޭގައި އަސާސީ ކާބޯތަކެތީގެ އަގު ވަނީ އަށް ޕަސެންޓު އުފުލިފަ އެވެ.
