ބޭރު ފައިސާއާ ބެހޭ ގާނޫނުގެ ދަށުން ރިސޯޓުތަކަށް އަންނަ ކޮންމެ ޓޫރިސްޓަކަށް ބޮލަކަށް 500 ޑޮލަރު މާރުކުރަން އޮތް އިހުތިޔާރު އުވާލައި، ޖުމްލަ އާމްދަނީގެ 20 ޕަސެންޓު މާރުކުރަން މަޖުބޫކުރާ ގޮތަށް ގާނޫނު ބަދަލުކުރުމުގެ މަސައްކަތް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފަށައިފި އެވެ.
އެމްއެމްއޭއިން ބުނި ގޮތުގައި، ގާނޫނަށް މި ބަދަލުތައް ގެންނަނީ 500 ޑޮލަރު މާރުކުރެވޭ އިހުތިޔާރު އޮތުމުން މަތީ ފަންތީގެ ރިސޯޓުތަކުން މާރުކުރާ އަދަދާއި އެ ނޫން ރިސޯޓުތަކުން މާރުކުރާ އަދަދުގައި ފަރަގެއް އުޅޭތީ އެވެ.
އޭގެ އިތުރުން، ބޭރު ފައިސާ މާރުކުރުމުގެ ގާނޫނުގެގެ ދަށުން ކެޓެގަރީ "ސީ" ގައި ހިމެނޭ ޓޫރިޒަމް ނޫން ވިިޔަފާރިތަކުގެ ތެރެއިން މާރުކުރަން ޝަރުތުހަމަވާ އާމްދަނީގެ މިންގަނޑު ވެސް ދަށްކޮށްފަ އެވެ. މިހާރު ގާނޫނުގައި އޮންނަނީ އަހަރެއްގެ ތެރޭގައި 15 މިލިއަން ޑޮލަރަށް ވުރެ ގިނައިން ލިބޭ ވިޔަފާރިތަކުން 20 ޕަސެންޓު މާރުކުރަން ޖެހޭނެ ކަމަށެވެ. އެމްއެމްއޭއިން މިހާރު ބޭނުންވަނީ މި އަދަދު 25 މިލިއަން ޑޮލަރަށް މަތިކުރާށެވެ.
ކެޓަގަރީ "އޭ" ގައި ހިމެނޭ ރިސޯޓުތަކާއި ކެޓަގަރީ "ސީ" އަށް ބަދަލުތަކެއް އައި ނަމަވެސް، ގެސްޓްހައުސްތައް ހިމެނޭ ކެޓެގަރީ "ބީ" އަކަށް އެއްވެސް ބަދަލެއް ނާދެ އެވެ.
އެމްއެމްއޭގެ ތަފާސްހިސާބުތަކުން ދައްކާ ގޮތުގައި ބޭރު ފައިސާގެ ގާނޫނަށް އަމަލުކުރަން ފެށި ފުރަތަމަ އަހަރުގެ ތެރޭގައި ޓޫރިޒަމް ވިޔަފާރިތަކުން ވަނީ 1.7 ބިލިއަން ޑޮލަރު (26.2 ބިލިއަން ރުފިޔާ) ބޭންކުތަކަށް މާރުކޮށްފަ އެވެ. ބޭންކުތަކުން ވަނީ މި ފައިސާގެ ތެރެއިން 768.5 މިލިއަން ޑޮލަރު (11.8 ބިލިއަން ރުފިޔާ) އެމްއެމްއޭއަށް މާރުކޮށްފަ އެވެ.
އެމްއެމްއޭއިން ބުނާ ގޮތުގައި ބޭރު ފައިސާ މާރުކުރުުމުގެ ގާނޫނާ އެކީ އިގުތިސޯދުގެ ތެރެއަށް ވަންނަ ޑޮލަރުގެ އަދަދު ވަނީ އިތުރުކުރެވިފަ އެވެ. ރެކޯޑުތަކުން ދައްކާ ގޮތުގައި މި ގާނޫނު ތަންފީޒުކުރަން ފެށުމުގެ ކުރީ އަހަރުތަކުގައި ބޭންކުތަކަށް ވަންނަ ޑޮލަރުގެ ނިސްބަތަކީ ޖުމްްލަ އާމްދަނީގެ 15 ޕަސެންޓާއި ނުވަ ޕަސެންޓާ ދޭތެރޭގަ އެވެ. މިދިޔަ އަހަރު މި ނިސްބަތް ވަނީ 21 ޕަސެންޓަށް މަތިކޮށްފަ އެވެ.
