ރިސޯޓުތަކާއި ގެސްޓުހައުސްތަކާއި ޑޮލަރުން ބޮޑު އާމްދަނީއެއް ލިބޭ ވިޔަފާރިތަކުގެ އާމްދަނީގެ ބައެއް މާރުކުރަން މަޖުބޫރުކޮށްފައިވާ ބޭރު ފައިސާއާ ބެހޭ ގަވާއިދުގެ ދަށުން އެއްވެސް ގޮތަކަށް ޑޮލަރު މާރުނުކުރާ ދެ ރިސޯޓަކީ ރަހާ ރިސޯޓާއި ސައުތު ޕާމް މޯލްޑިވްސް އިން ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ބުނެފި އެވެ.
މިއީ ބޭރު ފައިސާއާ ބެހޭ ގާނޫނު ތަންފީޒުކުރަން ފެށިތާ ދޮޅު އަހަރަށް ވުރެ ގިނަ ދުވަސް ފަހުން، މި ގާނޫނަށް އަމަލުނުކޮށްގެން ވިޔަފާރިތަކެއްގެ ނަން އާންމުކުރި ފުރަތަމަ ފަހަރެވެ.
އެ ގޮތުން ނެރުނު އިއުލާނުގައި އެމްއެމްއޭއިން ވަނީ، ބޭރު ފައިސާއާ ބެހޭ ގާނޫނުގެ ދަށުން މާރުކުރަން ޖެހޭ ފަރާތްތަކުން ގާނޫނާއި ގަވާއިދާ އެއްގޮތަށް މާރުކުރުމުގެ ކަންތައްތައް ކުރިއަށް ގެންދިއުމަށް އިލްތިމާސްކޮށްފަ އެވެ. އަދި މިހާތަނަށް އެމްއެމްއޭގައި ރަޖިސްޓްރީވެފައި ނުވާ ފަރާތްތަކަށް ފަހު ފުރުސަތު ދޭކަމަށް ވެސް އެ އިދާރާއިން ބުންޏެވެ.
އެމްއެމްއޭއިން ބުނި ގޮތުގައި ގިނަ ރިސޯތުތަކުން ދަނީ ގާނޫނާ އެއް ގޮތަށް ޑޮލަރު މާރުކުރަމުންނެވެ. މަރުކަޒީ ބޭންކުން އާންމުކޮށްފައިވާ ކޮމްޕްލަޔަންސް ރިޕޯޓުން ދައްކާގޮތުން 78 ޕަސެންޓު ރިސޯޓުތަކުން ޑޮލަރު މާރުކުރުމުގެ ކަންކަން ރަނގަޅަށް ކުރިއަށް ގެންގޮސްފައި ވެ އެވެ. ނަމަވެސް، 20 ޕަސެންޓު ރިސޯޓުތަކުން އެންމެ އެކަށީގެންވާ ގޮތެއްގައި ޑޮލަރު މާރުކުރުމުގެ ކަންތައްތައް ނުކުރާ ކަމަށް އެ ރިޕޯޓުގައި ފާހަގަކޮށްފައި ވެ އެވެ.
އެމްއެމްއޭއިން ބުނީ މި 20 ޕަސެންޓުގެ ތެރެއިން ގިނަ ރިސޯޓްތަކުން އެކި ސަބަބުތަކާ ގުޅިގެން ކޮންސެޝަނެއް ދިނުމަށް އެދިފައިވާ ކަމަށެވެ. މިހެން ނަމަވެސް އެ ރިސޯތުތަކުން ވެސް ކަނޑައެޅިފައިވާ އުސޫލުން އަދާކުރަންޖެހޭ އިލްތިޒާމްތައް އަދާކުރުމަށް އެމްއެމްއޭއިން ހަނދާންކޮށްދިނެވެ.
މަރުކަޒީ ބޭންކުން އާއްމުކުރި ރިޕޯޓުގެ ކެޓަގަރީ ބީ އަށް ބަލާއިރު އެ ކެޓަގަރީގައި ރަޖިސްޓްރީވެފައިވާ ޓޫރިޒަމް އެސްޓެބްލިޝްމަންޓުގެ ތެރެއިން 48 ޕަސެންޓު ތަންތަނުން ފައިސާ މާރުކުރުމުގެ ކަންކަން ރަނގަޅަށް ކުރިއަށް ގެންގޮސްފައި ވެ އެވެ. އަދި އެންމެ އެކަށީގެންވާ ގޮތެއްގައި މާރުކުރުން ކުރިއަށް ނުގެންދަނީ 15 ޕަސެންޓު ވިޔަފާރިތަކުންނެވެ. އަދި 37 ޕަސެންޓު ތަންތަނުން އެއްވެސް ގޮތަކަށް ޑޮލަރު މާރުކޮށްފައި ނުވާ ކަމަށް ރިޕޯޓުން ދައްކަ އެވެ.
މި ތަންތަނަކީ ޖުމްލަ ގޮތެއްގައި މެދު ފަންތީގެ ވިޔަފާރިތަކަށް ވުމާއެކު މި ފަރާތްތަކަށް ގާނޫނުގެ ތެރެއިން އިތުރު ފުރުސަތުދީ ކޮމްޕްލަޔަންސް ރަނގަޅުކުރުމަށްޓަކައި އިތުރަށް ހޭލުންތެރިކުރުމުގެ މަސައްކަތްވެސް ކުރަމުންދާ ކަމަށް އެމްއެމްއޭއިން ބުންޏެވެ. ކެޓަގަރީ ބީގައި ހިމެނެނީ ގެސްޓްހައުސްތަކާއި ޓޫރިސްޓް ހޮޓާތަކާއި ސަފާރީތަކާއި ހޯމްސްޓޭ ފަދަ ތަންތަނެވެ.
ކެޓަގަރީ ސީގައި ހިމެނެނީ އަހަރެއްގެ މައްޗަށް 15 މިލިއަން ޑޮލަރަށްވުރެ ބޮޑު އާމްދަނީއެއް ލިބޭ ވިޔަފާރިތަކެވެ. މި ކެޓަގަރީގައި ހިމެނޭ ތަންތަނުގެ ތެރެއިން 38 ޕަސެންޓު ތަނުން ޑޮލަރު މާރުކުރުމުގެ ކަންކަން ރަނގަޅަށް ކުރިއަށް ގެންގޮސްފައި ވެ އެވެ. އެންމެ އެކަށީގެންވާ ގޮތެއްގައި ޑޮލަރު މާރުކުރުން ކުރިއަށް ނުގެންދަނީ 33 ޕަސެންޓު ވިޔަފާރިންނެވެ.
މި ކެޓަގަރީގައި ހިމެނޭ 29 ޕަސެންޓު ތަންތަނުން އެއްވެސް ވަރަކަށް ޑޮލަރު މާރުކޮށްފައި ނުވެ އެވެ. މި ވިޔަފާރިތަކުން ވެސް ވަނީ ކޮންސެޝަން ހޯދުމަށް އެދިފަ އެވެ. އެމްއެމްއޭއިން ވަނީ މީގެ ތެރެއިން ބައެއް ވިޔަފާރިތައް މާރުކުރަން ޖެހޭ ގިންތީގެ ތެރެއިން ބޭރުކުރަން ގާނޫނު ބަދަލުކުރަން ހުށަހަޅާފަ އެވެ. ނ
ބޭރު ފައިސާއާ ބެހޭ ގާނޫނުގެ ދަށުން މާރުކުރެވޭ ޑޮލަރުގެ 90 ޕަސެންޓު ނަގަނީ އެމްއެމްއޭ އަށެވެ. މީގެ ތެރެއިން 30 ޕަސެންޓު އެމްއެމްއޭއިން ބޭންކުތަކަށް ދޫކުރެ އެވެ. އަދި މިގޮތަށް ދޫކުރުމުގައި އިސްކަންދެނީ ދިވެހި ބޭންކުތަކަށެވެ.
