ވިލާ ކޮލެޖުގެ އިންސްޓިޓިއުޓް ފޯ ރިސާޗް އެންޑް އިނޮވޭޝަން (އައިއާރުއައި) އިން އިންތިޒާމުކޮށްގެން ބޭއްވި 10 ވަނަ "އިންޓަނޭޝަނަލް ކޮންފަރެންސް އޮން ސޯޝަލް ރިސަރޗް އެންޑް އިނޮވޭޝަން (އައި.ސީއެސްއާރުއައި) 2026" ކާމިޔާބުކަމާއެކު ނިންމާލައިފި އެވެ.
އޮގަސްޓު 8، އިން 9 އަށް ވިލާ ކޮލެޖުގެ ކިއުއައި ކެމްޕަހުގައި ކުރިއަށްދިޔަ މި ކޮންފަރެންސްގެ މިއަހަރުގެ ޝިއާރަކީ "ޓައިޑްސް އޮފް ޓްރާންސްފޯމޭޝަން: ޝޭޕިން ސަސްޓެއިނަބަލް ފިއުޗާސް" އެވެ.
މި ކޮންފަރެންސްގެ ނިންމުމުގެ ރަސްމިއްޔާތުގައި ކޮންފަރެންސްގެ ޗެއާ އަދި ވިލާ ކޮލެޖުގެ ޑެޕިއުޓީ ވައިސް ރެކްޓާ (ރިސާޗް އެންޑް އިނޮވޭޝަން) ޑރ. މުހައްމަދު އާދިލް ވަނީ، ފާއިތުވި ދެ ދުވަހު ކުރިއަށްދިޔަ ދިރާސާ މަޝްވަރާތަކާއި ހިޔާލު ބަދަލުކުރުންތަކަށް އަލިއަޅުއްވާލައްވާފަ އެވެ. އަދި ދިރާސާކުރުމަކީ ހަމައެކަނި ކަރުދާސް ހުށަހެޅުން ނޫން ކަމަށާއި، ދިރާސާތަކުގެ އަލީގައި މުޖުތަމައުއަށް ފައިދާހުރި ހެޔޮ ބަދަލުތަކެއް ގެނައުމުގެ މުހިންމުކަން އޭނާ ފާހަގަކުރެއްވި އެވެ.
ދެ ދުވަހަށް ދެމިގެންދިޔަ މި ކޮންފަރެންސްގައި ތިން ކީނޯޓް ސްޕީޗާއި، ހަތަރު ޕެނަލް ޑިސްކަޝަނާއި، 8 "އިމްޕެކްޓް ރޫމް" ސެޝަން ކުރިއަށްގެންދިޔަ އެވެ. ކޮންފަރެންސަށް ޖުމްލަ 116 އެބްސްޓްރެކްޓް ހުށަހެޅި، އޭގެ ތެރެއިން 81 އެބްސްޓްރެކްޓް ބަލައިގަނެވުނުއިރު، 25 ފުރިހަމަ ދިރާސާ ކަރުދާސް ލިބިފައިވެ އެވެ. އަދި އެކަޑެމިކް، ސަރުކާރު އަދި ޞިނާޢަތްތަކުން ޖުމްލަ 138 ބައިވެރިން މި ކޮންފަރެންސްގައި ބައިވެރިވި އެވެ.
އިވަލުއޭޝަން ޕެނަލްގެ ފަރާތުން ވާހަކަފުޅު ދައްކަވަމުން، އިވަލުއޭޝަން ކޮމިޓީގެ މެންބަރު ފާތިމަތު ސައީދު ވަނީ، ދިރާސާ ކަރުދާސްތައް ވަޒަންކުރުމުގައި ބެލެވުނު މައިގަނޑު މިންގަނޑުތަކަށް އަލިއަޅުއްވާލައްވާފަ އެވެ. އޭގެ ތެރޭގައި ކޮންސެޕްޓާއި އޮރިޖިނަލިޓީ، މެތޮޑޮލޮޖީ، ލިޓަރޭޗަރ ރިވިއު، ހުށަހެޅުންތެރިކަން އަދި ކަރުދާހުގެ ފެންވަރާއި މައުޟޫޢާ ގުޅޭ މިންވަރު ހިމެނެ އެވެ.
މުޅި ކޮންފަރެންސްގެ ބެސްޓް ޕޭޕާ ޕްރެޒެންޓޭޝަން އެވޯޑް ހާސިލުކުރީ މަރްޔަމް ހުދުނާ ޝަރީފް އެވެ. އޭނާ ހުށަހެޅި ކަރުދާހުގެ ސުރުހީއަކީ "ދަ އިފެކް އޮފް ގްރެޓިޓިއުޑް ޖާނަލިން އޮން ވޯކް އެންގޭގްމެންޓް: އަ ރެންޑަމައިޒްޑް ކޮންޓްރޯލްޑް ޕައިލޮޓް ސްޓަޑީ" އެވެ.
މީގެއިތުރުން ނޮވިސް ރިސާޗް ކެޓަގަރީން ބެސްޓް ޕޭޕާ އެވޯޑް ހާސިލުކުރީ އާއިޝަތު ދީނާ، އާމިނަތު ވަފާ ވަހީދު، ފާތިމަތު އަރަފާ އެވެ. ކެރިއާ ރިސާޗް ކެޓަގަރީން ބެސްޓް ޕޭޕާ ޕްރެޒެންޓޭޝަން ހުށަހެޅީ ޑރ. އެޝްލިން ނިމޯ ޖޫނިއާ، ޑރ. މޮނިކާ އަރޯރާ، ޑރ. ފަޒީލާ އިބްރާހިމް އެވެ.
"ބެސްޓް ޕޭޕާ ޕްރެޒެންޓޭޝަން އެވޯޑް" ހާސިލްކުރި ފަރާތްތަކަށް އެވޯޑާއި ސެޓްފިކެޓް ހަވާލުކޮށްދެއްވީ ވިލާ ކޮލެޖުގެ ޑެޕިއުޓީ ވައިސް ރެކްޓަރ (އެކަޑެމިކް އެންޑް ސްޓޫޑަންޓްސް) ޑރ. އަބްދުﷲ ސާދިގެވެ.
