ވިލާ ކޮލެޖަށް ބައިނަލްއަޤްވާމީ ފަސް ތަރީގެ ރޭޓިންއެއް

ދުނިޔޭގެ ފެންވަރުގައި ޔުނިވާސިޓީތަކާއި ކޮލެޖުތަކުގެ ފެންވަރު ވަޒަންކުރާ އެންމެ މަޝްހޫރު އެއް އިދާރާ ކަމުގައިވާ ކިއުއެސް - ކުއަކުއަރެލީ ސައިމަންޑްސް (QS Quacquarelli Symonds) ގެ "ކިއު.އެސް ސްޓާރސް" ރޭޓިން ނިޒާމުގެ ދަށުން ވިލާ ކޮލެޖަށް އެންމެ މަތީ ދަރަޖަ ކަމަށްވާ 5 ތަރީގެ ރޭޓިންއެއް ލިބިއްޖެ އެވެ.

މިއީ ކިއު.އެސް ސްޓާސް އިން ވިލާ ކޮލެޖުގެ ފެންވަރު ވަޒަންކުރި ދެވަނަ ފަހަރެވެ. އެންމެ ދެ އަހަރު ދުވަހުގެ ކުރު މުއްދަތެއްގެ ތެރޭގައި 4 ތަރިން 5 ތަރިއަށް ކޮލެޖުގެ ރޭޓިން ކުރިއަރައިގެން ދިއުމަކީ ރާއްޖޭގެ މަތީ ތައުލީމީ ދާއިރާގައި ހާސިލުކުރެވުނު ވަރަށް ބޮޑު ތާރީހީ ކާމިޔާބެއް ކަމަށް އެ ކޮލެޖުން ބުންޏެވެ.

މި ރޭޓިން ރަސްމީކޮށް އިއުލާންކޮށްފައިވަނީ އިއްޔެ ހެނދުނު ވިލާ ކޮލެޖުގައި ބޭއްވި "ވީ.ސީ ބްރެކްފަސްޓް" ނެޓްވޯކިން ހަރަކާތުގައެވެ.

މި ރަސްމިއްޔާތުގައި ކިއު.އެސް ސްޓާސްގެ ނަތީޖާ އިއުލާންކޮށްދެއްވައި، ރެކޮގްނިޝަން ސެޓްފިކެޓް ވިލާ ކޮލެޖާ ހަވާލުކޮށްދެއްވީ ރަސްމިއްޔާތުގެ ޝަރަފުވެރި މެހެމާނު، ކިއު.އެސް އިންޑިއާގެ ޗެއާ އަދި ވައިސް ޕްރެޒިޑެންޓް އޮފް ސްޓްރެޓީޖިކް އެންޑް އިންޓަނޭޝަނަލް އެންގޭޖްމަންޓް، ޑރ. އަޝްވިން ފެނާންޑޭޒް އެވެ.

ވިލާ ކޮލެޖުގެ ފަރާތުން މި ޝަރަފުވެރި ސެޓްފިކެޓާ ހަވާލުވެވަޑައިގަތީ ކޮލެޖުގެ ރެކްޓަރ ޑރ. އަހުމަދު އަންވަރާއި ވައިސް ރެކްޓަރ، އެސޯސިއޭޓ ޕްރޮފެސަރ ޑރ. އަލީ ނަޖީބެވެ.

ވިލާ ކޮލެޖުން 5 ތަރި ހާސިލުކުރި މައިގަނޑު ދާއިރާތައް

ކިއު.އެސް ސްޓާރސްގެ ހަރުދަނާ މެތަޑޮލޮޖީގެ ދަށުން ކުރެވުނު އޮޑިޓަށްފަހު، ވަޒަންކުރެވުނު 9 ދާއިރާގެ ތެރެއިން މައިގަނޑު 6 ދާއިރާއަކުން ވިލާ ކޮލެޖުން ވަނީ އެންމެ މަތީ ދަރަޖަ (5 ތަރި) ކަށަވަރުކޮށްފައެވެ. އެއޫ:

• ކިޔަވައިދިނުމުގެ ފެންވަރު
• ދަރިވަރުންނަށް ވަޒީފާގެ ފުރުޞަތު ފަހިކޮށްދިނުން
• އޮންލައިންކޮށް ކިޔަވައިދިނުން
• ބައިނަލްއަޤްވާމީ ގުޅުންތައް
• ހަރުދަނާ ހިންގުން
• ތިމާވެއްޓަށް ކުރާ އަސަރު

"މުޅި ރާއްޖޭގެ މަތީ ތަޢުލީމީ ދާއިރާއަށް ލިބުނު ފަޚުރެއް"

އިއްޔެ ބޭއްވި އިވެންޓުގައި ވިލާ ކޮލެޖުގެ ވައިސް ރެކްޓަރ، ޑރ. އަލީ ނަޖީބު ވިދާޅުވީ ދުނިޔޭގެ އެންމެ އިތުބާރުހުރި އެއް އިދާރާ ކަމަށްވާ ކިއު.އެސް އިން 5 ތަރީގެ އެންމެ މަތީ ރޭޓިންއެއް ލިބުމަކީ، ވިލާ ކޮލެޖުން ފޯރުކޮށްދޭ ތައުލީމުގެ ފެންވަރާއި، މުއައްސަސާގެ ހިންގުން ބައިނަލްއަގުވާމީ މިންގަނޑުތަކުން ބަލައިގަތްކަމުގެ އަލިގަދަ ހެއްކެއް ކަމަށެވެ.

މިއީ ކޮލެޖުގެ ތާރީހީ ކާމިޔާބީއެއްގެ އިތުރުން މުޅި ރާއްޖެއަށްވެސް ލިބުނު ބޮޑު ފަހުރެއްކަން އޭނާ ފާހަގަކުރެއްވިއެވެ.

"ދުނިޔޭގެ އެންމެ އިތުބާރުހުރި އެއް އިދާރާ ކަމަށްވާ ކިއު.އެސް އިން 5 ތަރީގެ އެންމެ މަތީ ރޭޓިންގއެއް ލިބުމަކީ، ވިލާ ކޮލެޖުން ފޯރުކޮށްދޭ ތަޢުލީމުގެ ފެންވަރާއި، މުއައްސަސާގެ ހިންގުން ބައިނަލްއަޤްވާމީ މިންގަނޑުތަކުން ބަލައިގަތްކަމުގެ އަލިގަދަ ހެއްކެއް،" ނަޖީބު ވިދާޅުވި އެވެ. 

ކުރިމަގުގެ އަމާޒު: "އެލަމްނައި މެންޓަރިން އިނިޝިއޭޓިވް"

ކޮލެޖުގެ ކުރިމަގުގެ އަމާޒުތަކާ ގުޅޭގޮތުން ވާހަކަފުޅުދައްކަވަމުން ޑރ. ނަޖީބު ވަނީ ކޮލެޖުގެ އައު އިސްނެގުމެއް ކަމުގައިވާ "އެލަމްނައި މެންޓަރިންގ އިނިޝިއޭޓިވް" ވަރަށް އަވަހަށް ތައާރަފުކުރައްވާނެކަން ވިދާޅުވެފަ އެވެ. 

އިންޑަސްޓްރީގެ ތަޖުރިބާކާރުންނާއި ފަންނީ ބޭފުޅުންނާ ގުޅިގެން ކުރިއަށްގެންދާ މި ޕްރޮގްރާމުގެ މައިގަނޑު މަޤްސަދަކީ، ދަސްވެނިވާ ދަރިވަރުންނަށް ހަމައެކަނި ފަންނީ މައުލޫމާތުގެ ބަދަލުގައި، ވަޒީފާގެ އަމަލީ މާޙައުލުގައި ބޭނުންހިފޭނެ ލީޑަޝިޕް ހުނަރާއި މުހިންމު ސޮފްޓް ސްކިލްސް ދަސްކޮށްދީ މެންޓަ ކުރުމެވެ. މިއީ ޤައުމީ ތަރައްގީއަށް ބޭނުންވާ ގާބިލު ޖީލެއް ބިނާކުރުމަށް އެޅޭ މުހިންމު ފިޔަވަޅެކެވެ.

އިވެންޓުގެ ޝަރަފުވެރި މެހެމާނު ޑރ. އަޝްވިން ފެނާންޑޭޒް ވަނީ ވިލާ ކޮލެޖުން ހޯދި މި ކާމިޔާބީއަކީ މުޅި ދިވެހިރާއްޖެއަށް ލިބުނު ފަހުރެއްކަން ފާހަގަކުރައްވާފަ އެވެ. 

އޭނާ ވިދާޅުވި ގޮތުގައި ކިއު.އެސް ސްޓާސް އަކީ ހަމައެކަނި ޔުނިވާސިޓީ ރޭންކިންއެއް ނޫނެވެ. އެއީ 50 އަށްވުރެ ގިނަ އިންޑިކޭޓަރުގެ މައްޗަށް ބިނާކޮށް، މުއައްސަސާގެ ފެންވަރު 360 ޑިގްރީން ވަޒަންކޮށްދޭ ފުރިހަމަ ނިޒާމެކެވެ.