ރައްޔިތުންގެ މަޖިލީހުގެ މެންބަރުންގެ މެޑިކަލް އިންޝޫރެންސާ ގުޅުވައި ނޫސްތަކުގައި އޮޅުވާލައިގެން ވާހަކަތަކެއް ލިޔެފައިވާ ކަމަށް ތުހުމަތުކޮށް އެ މައްސަލައިގައި މިއަދު ބޭއްވި އާންމު ކޮމިޓީގެ ބައްދަލުވުން ސިއްރުކޮށްފި އެވެ.
އެ މައްސަލައާ ގުޅިގެން އޮގަސްޓު ހަތަރެއްގައި ބޭއްވި ކޮމިޓީ ބައްދަލުވުމުގައި ނިންމީ މިވަގުތު މެންބަރުންނަށް މެޑިކަލް އިންޝޫރެންސް ފޯރުކޮށްދެމުން އަންނަ އެލައިޑް އިންޝޫރެންސާ ބައްދަލުކުރުމަށެވެ. ރާއްޖެ އާއި ރާއްޖޭން ބޭރުން ފަރުވާ ހޯދުމުގައި ދަތިތަކާ ކުރިމަތިވާ ކަމަށް އެ ދުވަހުގެ ކޮމިޓީ ބައްދަލުވުމުގައި ބައެއް މެންބަރުން ވިދާޅުވި އެވެ.
"އިންޝޫރެންސްގެ ވާހަކަ މި ކޮމިޓީގައި ކުރިއަށްދިޔައިރުގައި ބައެއް މެންބަރުން ދެއްކި ވާހަކަ، ނޫސްތަކުގައި ރިޕޯޓުކޮށްފައި ހުރީ އަޅުގަނޑުމެން ދެއްކި ގޮތަކަށް ނޫން. އަޅުގަނޑުމެން ދެންނެވީ އަޅުގަނޑުމެންނަށް ލިބޭ އިންޝޫރެންސްގެ ތެރެއިން މެންބަރުންނަށް އިންޝޫރެންސް ކުންފުނިން ހިދުމަތް ފޯރުކޮށްދޭން އެއްބަސްވެފައިވާ ގޮތުގެ މަތީން އިންޝޫރެންސްތަކުގައި ހުރި ދަތިތަކުގެ ވާހަކަ،" މިއަދުގެ ކޮމިޓީ ބައްދަލުވުން ފައްޓަވަމުން މުގައްރިރު ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވި އެވެ.
މިއަދުގެ ކޮމިޓީ ބައްދަލުވުން ސިއްރުކޮށްގެން ކުރިއަށްގެންދިޔުމަށް ހުށަހެޅުއްވީ ފޭދޫ ދެކުނު ދާއިރާގެ މެންބަރު އިބްރާހިމް ދީދީ އެވެ. އޭނާގެ ހުށަހެޅުމަށް ތާއިދު ކުރެއްވީ ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު އެވެ. ކޮމިޓީ ސިއްރު ކުރުމަށް ނެގި ވޯޓު ފާސްވީ މިއަދުގެ ބައްދަލުވުމަށް ހާޒިރުވި މެންބަރުންގެ އިއްތިފާގުންނެވެ.
"ކުރީ ދުވަހު ދެއްކި ވާހަކަ އޮޅުވާލާފައި އެހެން ގޮތަކަށް ލިޔެފައިވާތީ މިއަދުގެ ބައްދަލުވުން ނޫސްވެރިންނާ ނުލައި ސިއްރު ބައްދަލުވުމެއް ގޮތުގައި ކުރިއަށްގެންދަން. އެއީ މި ދައްކަނީ އަނެއްހެން އާންމު ރައްޔިތުންނާ ގުޅުންހުރި އިންޝޫރެންސްގެ ވާހަކައެއް ނޫން، ޕެކޭޖު ބޮޑުކުރާ ވާހަކައެއް ވެސް ނޫން،" ދީދީ ވިދާޅުވި އެވެ.
ކޮމިޓީ ސިއްރުކުރުމަށް ވޯޓު ދިނީ ދީދީ އާއި ސައްތާރުގެ އިތުރުން ހެންވޭރު ދެކުނު ދާއިރާގެ މެންބަރު ހުސައިން އިމްރާން ލަތީފް އާއި ދުވާފަރު ދާއިރާގެ މެންބަރު މުހައްމަދު އަލީ އާއި މާފުށީ ދާއިރާގެ މެންބަރު ހުސައިން ރިޒާ އާދަމް އާއި އަލިފުށީ ދާއިރާގެ މެންބަރު އަބްދުއްލަތީފް އަބްދުއްރަހުމާން އެވެ.
މެންބަރުންގެ މެޑިކަލް އިންޝޫރެންސްގެ މައްސަލައިގައި އަބަދުވެސް އާންމު ރައްޔިތުންގެ ފާޑުކިޔުން އަމާޒުވެ އެވެ. މެންބަރުންނަށް ވަކި ހާއްސަ އިންޝޫރެންސް ސްކީމެއް އޮވެގެން ނުވާނެ ކަމަށް ގިނަ ބަޔަކު ގަބޫލުކުރެ އެވެ.
