ދިރާގު މޯލްޑިވްސް ގޭމިން ކޮންކުއެސްޓްގެ ރެޖިސްޓްރޭޝަން ހުޅުވާލައިފި

ދިވެހިރާއްޖޭގައި ބާއްވާ އެންމެ ބޮޑު ގޭމިން މުބާރާތް ކަމުގައިވާ 'ދިރާގު މޯލްޑިވްސް ގޭމިން ކޮންކުއެސްޓް 2026' (ޑީއެމްޖީސީ 2026) ގެ މޮބައިލް ލެޖެންޑްސް: ބޭންގް ބޭންގް (އެމްއެލްބީބީ) އަދި ރޮކެޓް ލީގު ކޮލިފަޔަރގައި ބައިވެރިވުމުގެ ފުރުސަތު ހުޅުވާލައިފި އެވެ. 

ދިރާގު ގޭމާސް ގިލްޑް (ޑީޖީޖީ) އިން އިންތިޒާމުކޮށްގެން ބާއްވާ މި މުބާރާތަކީ ރާއްޖޭގެ ގޭމިން ކޮމިއުނިޓީ އެއްތަނަކުން ބައްދަލުވެ، ވާދަވެރި މާހައުލެއްގައި ހުނަރު ދައްކާލުމަށް ލިބޭ އެންމެ ބޮޑު ފުރުސަތެވެ.

މި އަހަރުގެ މުބާރާތް ކުރިއަށްދާނީ ޖުމްލަ 150,000 ރުފިޔާގެ ބޮޑު ފައިސާގެ އިނާމަކާއެކުގަ އެވެ.

މި އަހަރުގެ ޑީއެމްޖީސީގައި ވެސް މޮބައިލް، ޕީސީ އަދި ކޮންސޯލް ޕްލެޓްފޯމްތަކުގައި ކުޅޭ އެކި ގޭމްތައް ވަނީ ހިމަނައިފަ އެވެ. މީގެ ތެރޭގައި މޮބައިލް ލެޖެންޑްސް: ބޭންގް ބޭންގް، ޕަބްޖީ މޮބައިލް، ރޮކެޓް ލީގު، އެފްސީ26 އަދި ޓެކެން 8 ހިމެނެއެވެ. ކުޅުންތެރިންނަށް ފައިސާގެ އިނާމު ހޯދުމުގެ އިތުރުން، ކޮލިފަޔަރތަކުން ކުރިހޯދައިގެން ޑީއެމްޖީސީގެ މެއިން އިވެންޓުގައި ބައިވެރިވުމުގެ ފުރުސަތު ލިބިގެންދާނެއެވެ.

ކޮލިފަޔާތަކުގެ ތަފްސީލު:

• އެމްއެލްބީބީ: ރެޖިސްޓްރޭޝަން ހުޅުވާލާފައިވަނީ 6 އޮގަސްޓުން 13 އޯގަސްޓް 2026 ގެ ރޭގަނޑު 11:59 އަށެވެ. މި މުބާރާތުގެ ޖުމުލަ އިނާމަކީ 10,000 ރ. އެވެ. އެއީ 1 ވަނަ އަށް 5,000ރ.، 2 ވަނައަށް 3,000ރ އަދި 3 ވަނަ އަށް 2,000ރ. އެވެ.

• ރޮކެޓް ލީގު: ރެޖިސްޓްރޭޝަން ހުޅުވާލާފައިވަނީ 6 އޮގަސްޓުން 13 އޯގަސްޓް 2026 ގެ ރޭގަނޑު 11:59 އަށެވެ. މި މުބާރާތުގެ ޖުމުލަ އިނާމަކީ 5,000ރ. އެވެ. އެއީ 1 ވަނަ: 2,500ރ، 2 ވަނައަށް 1,500ރ އަދި 3 ވަނަ އަށް 1,000ރ އެވެ.

• ޕަބްޖީ މޮބައިލް: ރެޖިސްޓްރޭޝަން ހުޅުވާލާނީ 19 އޮގަސްޓުގަ އެވެ. މި މުބާރާޓުގެ ތަފްސީލު ޑީޖީޖީއިން ވަރަށް އަވަހަށް އިއުލާނުކުރާނެ އެވެ.

މި ކޮލިފަޔަތަކުގައި ބައިވެރިވެ މުބާރާތުގައި ހުނަރު ދައްކާލުމުގެ ފުރުސަތު ރާއްޖޭގެ ކޮންމެ ހިސާބެއްގައި ހުރި ގޭމް ކުޅުންތެރިއަކަށް ވެސް މިހާރު މި ވަނީ ހުޅުވިގެންގޮސްފަ އެވެ. އަދި ބައިވެރިވުމަށް އެއްވެސް ފީއެއް ދައްކާކަށް ނުޖެހޭނެ އެވެ.

ދިވެހިރާއްޖޭގެ އެންމެ ބޮޑު ގޭމިން ޕްލެޓްފޯމް ކަމުގައިވާ ޑީޖީޖީއިން ދަނީ ރާއްޖޭގެ އެކި ކަންކޮޅުތަކުގައި އީ-ސްޕޯޓްސް އާއި ގޭމިން ކޮމިއުނިޓީ ބާރުވެރިކޮށް ކުރިއެރުވުމަށް ގިނަގުނަ މަސައްކަތްތަކެއް ކުރަމުންނެވެ.

މި މުބާރާތާއި ޑީޖީޖީގެ އެހެނިހެން ހަރަކާތްތަކާ ގުޅޭ އެންމެ ފަހުގެ މައުލޫމާތު ޑީޖީޖީގެ ވެބްސައިޓް މެދުވެރިކޮށް ލިބިގެންދާނެއެވެ.

މިދިޔަ އަހަރު ބޭއްވި މުބާރާތުގައި ރާއްޖޭގެ އެކި ކަންކޮޅުތަކުން 1,500 އަށްވުރެ ގިނަ ކުޅުންތެރިން ބައިވެރިވި އެވެ.