ސައިޓު ބޭނުންކުރާ މީހުން ހުށަހަޅާ އަގުތައް "ކްރައުޑްސޯސް" ކޮށްގެން ކަޅު ބާޒާރުގައި ޑޮލަރު ގަންނަން ލިބޭ އަގު ފެންނަ "ޔޫއެސްޑީއެމްވީއާރު.ކޮމް" އަށް ރާއްޖޭގެ އައިޕީ އެޑްރެސްތަކުން ނުވަދެވޭ ގޮތަށް ބްލޮކޮށްފި އެވެ.
ޔޫއެސްޑީއެމްވީއާރު ސައިޓު ބޭނުންކުރާ މީހުން އެކްސްގައި ޕޯސްޓުކޮށްފައިވާ ގޮތުގައި މި ސައިޓަށް ކުރިން ވަދެވުނު ނަމަވެސް، މިހާރު ވަދެވެނީ ވީޕީއެން ބޭނުންކޮށްގެން އެހެން ގައުމެއްގެ އައިޕީ އެޑްރެސް ބޭނުންކޮށްގެންނެވެ.
ކަޅު ބާޒާރުގައި ޑޮލަރު ވިއްކާ އަގު އާންމުކޮށް ފެންނަ ވެބްސައިޓަކަށް ނުވަދެވޭއިރު، ޑޮލަރުގެ އަގު ވަނީ ތާރީހުގައި ފުރަތަމަ ފަހަރަށް 22ރ. އަށް ވުރެ މައްޗަށް އަރާފަ އެވެ. މިއަދު ކަޅު ބާޒާރުގައި ޑޮލަރެއްގެ އަގު އުޅެނީ 22.10ރ. އަށެވެ. މިއީ ރަސްމީ ރޭޓަށް ވުރެ 6.68ރ. ނުވަތަ 43.3 ޕަސެންޓު ބޮޑު އަގެކެވެ.
އިގުތިސޯދުގައި ޑޮލަރު ތާށިވެ، ދުވަހުންދުވަހަށް ޑޮލަރުގެ އަގު ބޮޑުވަމުންދާއިރު ސަރުކާރުން ބުނަމުން އަންނަނީ މިއީ އެމްޑީޕީ ސަރުކާރުގައި ފައިސާ ޗާޕުކުރުމާ ގުޅިގެން ހައްލު ނުވެގެން އުޅޭ މައްސަލައެއް ކަމަށެވެ.
ސަރުކާރުން މިހާރު މިހެން ބުނި ނަމަވެސް، ޑޮލަރުން އާމްދަނީ ލިބޭ ޓެކްސް ރޭޓުތަކާއި އެއާޕޯޓު ފީ ބޮޑުކޮށް، ޑޮލަރު މާރުކުރަން މަޖުބޫކުރިއިރު ސަރުކާރުން ބުނީ ކަޅު ބާޒާރުގައި ޑޮލަރު ލިބޭ އަގުތައް ވެސް ތިރިވާނެ ކަމަށެވެ. ނަމަވެސް ކަންކަން ވަމުން ދަނީ ސަރުކާރުން ތަސައްވުރި ކުރި ގޮތާ ދިމާ އިދިކޮޅަށެވެ.
ޑޮލަރުގެ އަގު ބޮޑުވަމުން ދިޔުމާ ގުޅިގެން ކިޔުންތެރިންނަށް އަދާހަމަ މައުލޫމާތު ގެނެސްދިނުމުގެ ގޮތުން އަދަދު ނޫހުން ވެސް ވާނީ ކަޅު ބާޒާރުގައި ޑޮލަރު ވިއްކާ އަގު ޓްރެކްކުރަން ފަށާފަ އެވެ.
މި ނޫހުގެ ވެބްސައިޓުން ފެންނަ މި ޓްރެކަރަކީ 2010 ވަނަ އަހަރުން ފެށިގެން އާކައިވްކޮށްފައި ހުރި ހަބަރުތަކުގައި ހުރި މައުލޫމާތު ބޭނުންކޮށްގެން ކަޅު ބާޒާރުގައި ޑޮލަރު ވިއްކަން ހުރި އަގުތައް ފެންނަ ޓްރެކަރެކެވެ. މި ޓްރެކަރަށް ވަނުމުން ޑޮލަރުގެ ކަޅު ބާޒާރާ ގުޅޭ ހުރިހާ ހަބަރުތަކެއް ވެސް ފެންނާނެ އެވެ.
