ޑޮލަރުގެ މައްސަލަ ހައްލުނުވެއްޖެއްޔާ ކުރިއަށް އޮތް ދުވަސްތަކުގައި ޑޮލަރެއްގެ އަގު 30ރ. އަށް އަރާނެ ކަމަށް މީގެ ކުރިން ސަރުކާރުގެ އެކި މަގާމުތަކާއި ވޯލްޑް ބޭންކްގައި މަސައްކަތް ކޮށްފައިވާ އަހްމަދު ޒުހޫރު ވިދާޅުވެއްޖެ އެވެ.
އަދަދު އަށް ދެއްވި އިންޓަވިއުއެއްގައި ޒުހޫރު ވިދާޅުވީ ސަރުކާރުން ބޭކާރު ހަރަދު ކުރަމުންދާ ވަރަށް ޑޮލަރަށް އޮތް ޕްރެޝަރު ދާނީ ބޮޑުވަމުން ކަމަށާއި އެކަމަށް އެޑްރެސް ނުކޮށް ހެޔޮ ބަދަލުތަކެއް ނުގެނެސްފިނަމަ ކުރިއަށް އޮތް މުސްތަގުބަލުގައި ޑޮލަރުގެ އަގު 30ރ. އަށް އަރާނެ ކަމުގެ ޔަގީންކަން ދޭ ކަމަށެވެ.
"ބޭކާރު އެތައް ހަރަދުތަކެއް ކުރަމުން މިދަނީ. އެ ހަރަދުތައް ކޮށްގެންނެއް ޑޮލަރަށް މިއޮތް ޕްރެޝަރެއް ކުޑައެއް ނުކުރެވޭނެ. އެއީ ރައްޔިތުން ގެނެސްގެން އުޅޭ ޕްރެޝަރެއް ނޫން. އެއީ އަހަރެމެންގެ ގައުމުގެ ދައުލަތާ ހަވާލުވާ ސަރުކާރުތަކުގެ އިރެސްޕޮންސިބަލްކަމުގެ ސަބަބުން ވެގެން އުޅޭ ކަމެއް މިއީ،" ޒުހޫރު ވިދާޅުވި އެވެ.
"އެހެންވީމަ ދައުލަތާ ހަވާލުވެގެން ތިބި ބަޔަކު މި މަސައްކަތް ރަނގަޅަށްކޮށް، ހަދަންޖެހޭ ރިސާޗްތައް ހަދައި، މިކަމަށް މިހުރިހާ ފްރަންޓަކުން ހެޔޮ ބަދަލު ގެންނަން ބޭނުންވެއްޖެ ކަމަށްވަންޏާމުން ހެޔޮ ބަދަލު އަންނާނެ، އެހެން ނޫނިއްޔާމުން ކައިރި މުސްތަގުބަލުގައި ޑޮލަރުގެ ރޭޓް 30ރ. އަށް މައްޗަށް ދާނެ ކަމުގެ ޔަގީންކަން އަޅުގަނޑު ދެން."
ޑޮލަރުގެ މައްސަލަ ހައްލުކުރަން ދައުލަތުގެ ބަޖެޓު ކުރިއަށް އޮތް އަހަރު 40 ޕަސަންޓު ކުޑަކުރަން ޖެހޭ ކަމަށް ޒުހޫރު ވިދާޅުވި އެވެ. އޭނާ ވިދާޅުވީ އޭގެ ސަބަބުން ޑޮލަރަށް އޮތް ޕްރެޝަރު ކުޑަވެ ޑޮލަރު ރޭޓަށްވެސް ހެޔޮ ބަދަލެއް އަންނާނެ ކަމަށެވެ.
"ކުރިއަށް އޮތް ކައިރި މުސްތަގުބަލެއްގައި ޑޮލަރަށް ޕްރެޝާ ރިލީޒްކުރަން ބޭނުން ކަމަށްވަންޏާމުން މި އަންނަ އަހަރު ދިވެހިރާއްޖޭގެ ބަޖެޓް 40 ޕަސަންޓް ކުޑަވާންޖެހޭ. އަދި ދެން އަންނަ އަހަރުގައިވެސް ކުޑަވާންޖެހޭ. އޭގެ މާނައަކީ 70 ބިލިއަނުގައި ހުރި ބަޖެޓް 35 ބިލިއަނަށް ނުވަތަ 40 ބިލިއަނަށް ނުވަތަ 50 ބިލިއަނާ ހިސާބަށް ތިރިނުކޮށެއް ޑޮލަރަށް މިއޮތް ޕްރެޝަރެއް ކުޑައެއް ނުވާނެ،"
ޒުހޫރު ވިދާޅުވީ މި ސަރުކާރު ވެރިކަމަށް އައި ފަހުން ޑޮލަރަށް ވަރަށް ސްޓްރެސް ސިގްނަލްތަކެއް ދެމުންދާކަން ކަމަށެވެ. އެގޮތުން ވިޔަފާރިތަކުން ޑޮލަރު މާރުކުރަން މަޖުބޫރުކުރުމާއި ކޮންމެހެންވެސް ޑޮލަރު ހޯދައިގެން ދަރަނި ދައްކައި އެކަންވެސް ސަރުކާރުން ހާމަކުރަމުންދާ ކަމަށް އޭނާ ވިދާޅުވި އެވެ.
މީގެއިތުރުން ޒުހޫރު ވިދާޅުވީ ރާއްޖޭގައި ފައިސާ ދައުރުވާ މިންވަރު އިންތިހާއަށް އިތުރުވަމުންދިޔައިރު ގައުމުން ޑޮލަރު ބޭރުވާ މިންވަރު ދިޔައީ އިތުރުވަމުން ކަމަށެވެ.
ސަރުކާރަށް ޑޮލަރުގެ އަގު އުފުލޭ މިންވަރު ދަށްނުކުރެވި މިހާރު ޑޮލަރެއްގެ އަގު އުޅެނީ 22.90ރ. އަށެވެ. އެ އަގު ކުރިއަށް އޮތް ދުވަސްތަކުގައި އިތުރުވެގެންދާނެ ކަމަށް ތަޖުރިބާކާރުން ލަފާކުރެ އެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައަޅާފައިވާ ރަސްމީ ރޭޓަށް ވުރެ ބޮޑު އަގުގައި ޑޮލަރު ވިއްކާ މީހުންނާއި ވިޔަފާރިތައް ބޮޑެތި އަދަދުތަކުން ޖޫރިމަނާ ކުރެވޭ ގޮތަށް ބޭރު ފައިސާއާ ބެހޭ ގާނޫނު ބަދަލުކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީން މިހާރު ވަނީ ފާސްކޮށްފަ އެވެ.
