ޕެންޝަން ފަންޑުން ގަނެފައިވާ ބޮންޑުތަކެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ވިއްކާލައި، އެ ފައިސާ ސަރުކާރުގެ އެހެން ބޮންޑަކަށް އިންވެސްޓުކުރަން ހިންގި މުއާމަލާތް ފުރިހަމަކުރުމާ އެކީ އެމްއެމްއޭގެ ބޮންޑު ދަރަނި 16.3 ބިލިއަން ރުފިޔާއަށް އަރާފައިވާ ކަމަށް އެ އިދާރާގެ ބެލެންސް ޝީޓުން ދައްކައިފި އެވެ.
އެމްއެމްއޭއިން އާންމުކޮށްފައިވާ ޖުލައި މަހުގެ ސްޓޭޓްމަންޓް އޮފް ފައިނޭންޝަލް ޕޮސިޝަން ރިޕޯޓުން އަންގައިދޭ ގޮތުގައި އޭގެ ކުރީ މަސް ނިމުނުއިރު މި އެމްއެމްއޭއިން ސަރުކާރުގެ ބޮންޑުތަކުގައި އިންވެސްޓުކޮށްފައި ހުރި އަދަދު ހުރީ 13.9 ބިލިއަން ރުފިޔާގަ އެވެ. ނިމުނު މަހުގެ ތެރޭގައި މި ބައިން އިތުރުވީ ބޮންޑު މުއާމަލާތުގެ އަގު ކަމަށް ރިޕޯޓު ކުރެވުނު 2.4 ބިލިއަން ރުފިޔާ އެވެ.
މި ފައިސާތައް ސަރުކާރަށް ލިބުނުކަން އެނގެނީ އެމްއެމްއޭގެ ބެލެންސް ޝީޓުގެ ލަޔަބިލިޓީތަކުގެ ބައިގައި، ސަރުކާރާއި ސަރުކާރުގެ އިދާރާތަކުގެ ބެލެންސް ޖޫން މަހުގެ ނިޔަލަށް 143.3 މިލިއަން ރުފިޔާގައި ހުރެފައި، މިދިޔަ މަަސް ނިމުނުއިރު ދެ ބިލިއަން ރުފިޔާއަށް އިތުރުވެފައިވާތީ އެވެ. މިއީ 1.8 ބިލިއަން ރުފިޔާގެ އިތުރުވުމެކެވެ.
އެމްއެމްއޭއިން ސަރުކާރުގެ ބޮންޑުތަކުގައި އިންވެސްޓުކޮށްފަ ހުރި އަދަދު
- 2013 - 3.1 ބިލިއަން ރުފިޔާ
- 2018 - 6.1 ބިލިއަން ރުފިޔާ
- 2023 - 14.5 ބިލިއަން ރުފިޔާ
- 2024 - 14.2 ބިލިއަން ރުފިޔާ
- 2025 - 14 ބިލިއަން ރުފިޔާ
- 2026 (ޕެންޝަން ފަންޑު މުއާމަލާތުގެ ކުރިން - 13.9 ބިލިއަން ރުފިޔާ
- 2026 (ފެންޝަން ފަންޑު މުއާމަލާތުގެ ފަހުން - 16.3 ބިލިއަން ރުފިޔާ
މި މުއާމަލާތާއެކީ އެމްއެމްއޭގެ ދިވެހި ރުފިޔާ އެސެޓުތަކުގެ ޖުމްލަ ވަނީ 15.7 ބިލިއަން ރުފިޔާއިން 18.1 ބިލިއަން ރުފިޔާއަށް އިތުރުވެފަ އެވެ. ބޭރު ފައިސާގެ އެސެޓުތައް ހިމަނައިގެން ޖުމްލަ އެސެޓުތަކާއި ފައިސާ ނޫން އެސެޓުތަކުގެ އަގު ހިމަނައިގެން ޖުމްލަ އެސެޓުތަކުގެ އަގު ހުރީ 31 ބިލިއަން ރުފިޔާގަ އެވެ.
މިދިޔަ މަސް ނިމުނުއިރު ބޮންޑު މުއާމަލާތުން ހޯދި ފައިސާތަކުން ބޮޑު ބަޔެއް ސަރުކާރުން ބޭނުން ނުކޮށް ހުއްޓަސް، މި ފައިސާތައް ބޭނުންކުރުމުން އިގުތިސޯދުގެ ތެރެއަށް މި ފައިސާތައް ވަންނާނެ އެވެ. މި މައްސަލައިގައި ކަންބޮޑުވުން ފާޅުކުރާ މީހުން ބުނަނީ، ދިވެހި ރުފިޔާގެ މި އިތުރުވުމާއެކީ، ދުވަހުންދުވަހަށް އަގު ދަށްވަމުން އަންނަ ދިވެހި ރުފިޔާގެ އަގު އިތުރަށް ދަށަށް ދާން މެދުވެރިވާނެ އެވެ.
