އިގުތިސޯދު ތެރޭގައި ހުރި ދިވެހި ރުފިޔާގެ ސާޕްލަސް ލިކުއިޑިޓީ މަދުކުރުމުގެ ގޮތުން ރުފިޔާގެ މިނިމަމް ރިޒާވް ރިކުއާމެންޓް (އެމްއާރުއާރު) މަތިކޮށް، އޮޕަން މާކެޓް އޮޕަރޭޝަންސްތައް ފުޅާކުރަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ނިންމައިފި އެވެ.
އެމްއެމްއޭގެ މަނިޓަރީ ޕޮލިސީއަށް ގެނައި ބަދަލުތަކުގެ ދަށުން ވަނީ، އަންނަ މަހުން ފެށިގެން ބޭންކުތަކުން އެ އިދާރާގައި ބަހައްޓަން ޖެހޭ އެންމެ މަދު މިންވަރު (އެމްއާރުއާރު) 10.5 ޕަސެންޓުން 11 ޕަސެންޓަށް މަތިކުރާނެ ކަމަށެވެ.
އެމްއެމްއޭގެ ބޯޑުން ވަނީ އަންނަ އަހަރު ކޮންމެ ތިން މަހަކުން ރިޒާވުގެ އަދަދު ރިވިއުކުރުމަށް ފަހު، މަތިކުރަމަުން ދާން ނިންމާފަ އެވެ. އެ އިދާރާއިން ބުނީ މަޑުމަޑުން މަތިކުރަމުން ގޮސް އަންނަ އަހަރުގެ ނިޔަލަށް އެމްއާރުއާރު 13 ޕަސެންޓަށް މަތިކުރާނެ ކަމަށެވެ.
އޭގެ އިތުރުން، އެމްއެމްއޭއިން ވަނީ މިދިޔަ އަހަރުގެ ޖުލައި މަހުގެ ތެރޭގައި ފެށި އޯޕަން މާކެޓް އޮޕަރޭޝަން (އޯމޯ) ފުޅާކޮށް، 10 ބޭސިސް ޕޮއިންޓަށް އިތުރުކުރަން ނިންމާފަ އެވެ. މި ބޭސިސް ޕޮއިންޓުތައް އިތުރުކުރުމުގެ ބޭނުމަކީ މި މުއާމަލާތުން ބޭންކުތަކަށް ލިބޭ އިންޓްރެސްޓް އާމްދަނީ އިތުރުކޮށް، އެ ފައިސާ އެމްއެމްއޭގައި ބަހަައްޓަން ބޭންކުތަކުގެ ޝައުގުވެރިކަން އިތުރުކުރުމެވެ.
އެމްއެމްއޭއިން ބުނީ، މިވީ އަހަރެއްހާ ދުވަހުގެ ތެރޭގައި އޯމޯ ހިންގައިގެން ބޭންކިން ނިޒާމުގައި ހުރި ދިވެހި ރުފިޔާ އެކްސެސް ލިކުއިޑީގެ ތެރެއިން 2.7 ބިލިއަން ރުފިޔާ ނަގާފައިވާ ކަމަށެވެ. މިއާ އެކީ ޝޯޓް ޓާމް ލިކުއިޑިޓީ 6.5 ބިލިއަން ރުފިޔާއިން 3.7 ބިލިއަން ރުފިޔާއަށް ކުޑަވެފައިވާ ކަމަށް މަރުކަޒީ ބޭންކުން ބުންޏެވެ.
އެމްއެމްއޭއިން މި ފިޔަވަޅުތައް އަޅާފައި މި ވަނީ ދިވެހި ރުފިޔާގެ އަގު ވަރަށް ބޮޑަށް ދަށްވެ، ކަޅު ބާޒާރުގައި ޑޮލަރުގެ އަގު ރެކޯޑު މިންވަރަކަށް އިތުރުވެފައިވާ ދަނޑިވަޅެއްގަ އެވެ. މިހާރު ކަޅު ބާޒާރުގައި ޑޮލަރެއް ލިބެނީ 21.80ރ. އަށެވެ.
