ފަހި ދިރިއުޅުން ކޯޕަރޭޝަނުން އިމާރާތްކޮށް ބަލަހައްޓަމުން ގެންދާ އަމާން ދޯދި ޓަވަރުތައް ހުންނަ ސަރަހައްދުން 670 ޓަނުގެ ކުނި މިއަދު ނަގައިފި އެވެ.
ހައުސިން ޑިވެލޮޕްމެންޓް ކޯޕަރޭޝަނުން އިސްނަގައިގެން ކުރިއަށް ގެންދާ އެ ހަރާކަތުގެ ތެރެއިން މިއަދު ސާފު ކޮށްފައި ވަނީ ދޯދި ޓަވަރުތައް ހުންނަ ސަރަހައްދެވެ. ދޯދި ޓަވަރުތަކުގެ އިތުރުން، ވެސް ހުޅުމާލެ ދެވަނަ ފިޔަވަހީގެ އެކި ސަރަހައްދުތަކުގައި ގިނަ އަދަދެއްގެ ކުނި ޖަމާކޮށްފައި އެބަހުއްޓެވެ.
އެ ސަރަހައްދުތަކަށް އާދަޔާއި ހިލާފަށް ކުނި ޖަމާކުރަން ފެށީ، އަމާން ޓަވަރުތަކަށް މީހުން ބަދަލުވިއިރު، ކުނި އުކޭނެ އެކަށީގެންވާ އިންތިޒާމެއް ކަމާބެހޭ އިދާރާތަކުން ހަމަޖައްސާފައި ނެތުމުން ކަމަށް އެ ސަރަހައްދުގައި ދިރިއުޅޭ އާންމު ރައްޔިތުން ބުނެ އެވެ.
އެޗްޑީސީން އިސްނަގައިގެން ކުރިއަށް ގެންދާ ކެމްޕޭނުގެ ދަށުން މާދަމާ ވެސް ދެވަނަ ފިޔަވަހީގެ އެކި ސަރަހައްދުތައް ސާފުކުރުމަށް ހަމަޖެހިފައިވާ ކަމަށް އެ ކޯޕަރޭޝަންގެ ޑިރެކްޓަރެއްގެ މަގާމުގައި ހުންނަވާ، މަލްޝާ ޝަރީފް ސޯޝަލްމީޑިއާގައި ލިޔުއްވާފައިވެ އެވެ.
އެޗްޑީސީން އިސްނަގައިގެން، ހުޅުމާލެ ދެވަނަ ފިޔަވަހި ސާފު ކުރުމުގެ ކެމްޕޭނެއް ފެށީ ހުޅުމާލޭގައި މަދިރި އާލާ މިންވަރު އިތުރުވަމުންދާ ދިޔުމާ ގުޅިގެން، ހުޅުމާލެ ފޮގު ކުރުމަށް މާލެ ސިޓީ ކައުންސިލުން ނިންމުމާ ގުޅިގެން ސަރުކާރަށް ތާއީދުކުރާ މީހުންނާއި އެމްޑީޕީގެ ބައެއް އެކްޓިވިސްޓުންނާ ސޯޝަލްމީޑިއާގައި ބަދަލުކުރި ބަހުގެ ހަމަލާތަކަށްފަހު އެވެ.
