މި އަހަރު ބޭއްވި ކައުންސިލް އިންތިހާބާ ދިމާކޮށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ގިނަ އަދަދެއްގެ މުވައްޒަފުން އިތުރުކޮށް، މުސާރަ އާއި އިނާޔަތްތަކަށް ކުރާ ހޭދަ ރެކޯޑު މިންވަރަކަށް މައްޗަށް ގޮސްފައިވާކަން ހާމަވެއްޖެ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަދަދު ނޫހުން ހޯދާފައިވާ ތަފާސްހިސާބުތަކުން ދައްކާ ގޮތުގައި އެޗްޑީސީގެ މުވައްޒަފުންގެ އަދަދާއި ހަރަދުތަކަށް މިއަހަރު ވަނީ ވަރަށް ބޮޑަށް އިތުރުވެފަ އެވެ. އޭޕްރީލް 4، 2026, ބޭއްވި ކައުންސިލް އިންތިހާބާ ދިމާކޮށް އެޗްޑީސީއަށް ވެސް އެތައް ސަތާކެ މުވައްޒަފުންނެއް ވެއްދި އެވެ.
ސަރުކާރު ކުންފުނިތަކަށް ނާޖާއިޒު ގޮތުގައި މީހުން ވައްދައި ބޮޑެތި ހަރަދުތައް ކުރަމުންދާ ކަމަށް ބުނެ އިދިކޮޅުގައި އޮތް ދުވަސްވަރު ޕީއެންސީން ވަރަށް ބޮޑަށް ފާޑުކިޔަމުން ދިޔަ ނަމަވެސް، ވެރިކަމާ ހަވާލުވުމަށްފަހު އެޗްޑީސީގެ މުވައްޒަފުންގެ އަދަދު ވަނީ އެމްޑީޕީގެ ސަރުކާރަށް ވެރެ އިތުރުވެފަ އެވެ.
އެޗްޑީސީން ދީފައިވާ މައުލޫމާތުން އެނގޭ ގޮތުގައި 2023 ވަނަ އަހަރުގެ ނޮވެމްބަރު މަހު އެ ކުންފުނީގައި ތިބީ ޖުމުލަ 2,141 މުވައްޒަފުންނެވެ. ނަމަވެސް 2026 ވަނަ އަހަރުގެ ޖޫން މަހުގެ ނިޔަލަށް އެ އަދަދު ވަނީ 2,410 އަށް އުފުލިފަ އެވެ.
މުވައްޒަފުންގެ އަދަދު އިތުރުވުމާ ގުޅިގެން، މުސާރައާއި އިނާޔަތްތަކަށް ކުރާ ހޭދަ ވަނީ މީގެ ކުރިން ދުވަހަކުވެސް ނުކުރާ މިންވަރަށް ބޮޑުވެފައެވެ. 2023 ގެ ނޮވެމްބަރު މަހު މުސާރައަށް 32.7 މިލިއަން ރުފިޔާ ހޭދަވި އިރު، 2026 ވަނަ އަހަރުގެ ޖޫން މަހު އެޗްޑީސީން މުސާރައާއި އިނާޔަތްތަކަށް އެކަނިވެސް 40.8 މިލިއަން ރުފިޔާ ހޭދަކޮށްފައިވެއެވެ.
އެޗްޑީސީން އަހަރަކު މުސާރަ އާއި އިނާޔަތުގެ ޖުމުލަ ހަރަދަށް ބަލާއިރު، 2023 ވަނަ އަހަރު ޖުމުލަ 339.5 މިލިއަން ރުފިޔާ ހޭދަކޮށްފައިވެ އެވެ. ނަމަވެސް 2024 ވަނަ އަހަރު އެ އަދަދު 400.1 މިލިއަން ރުފިޔާއަށް އުފުލިފައިވާއިރު، 2026 ވަނަ އަހަރުގެ ފުރަތަމަ ހަ މަސްދުވަހު އެކަނިވެސް 229.8 މިލިއަން ރުފިޔާ ވަނީ މުސާރައަށް ހޭދަވެފަ އެވެ. މިއީ 2026 ވަނަ އަހަރުގެ ތެރޭގައި މަހަކު އެވްރެޖުން 38.3 މިލިއަން ރުފިޔާގެ ހޭދައެކެވެ. މިއީ 2023 ވަނަ އަހަރާ އަޅާބަލާއިރު މަހެއްގެ މައްޗަށް 10 މިލިއަނަށްވުރެ ގިނަ ރުފިޔާގެ އިތުރުވުމެކެވެ.
ޕީސީބީން މިހާރު ވަނީ ކުންފުނިތަކުގެ މުވައްޒަފުންގެ އަދަދު 33 ޕަސެންޓު މަދުކުރުމަށް އަންގާފަ އެވެ. އެ ނިސްބަތަށް އެޗްޑީސީގެ މުވައްޒަފުންގެ އަދަދު މަދުކުރާނަމަ 795 މުވައްޒަފުން ކަނޑާލަން ޖެހޭނެ އެވެ. އެއާއެކު ކުންފުނީގައި ތިބި ޖުމުލަ މުވައްޒަފުންގެ އަދަދު 1600 އަށް ތިރިވާނެ އެވެ.
