މެޑްރިޑް (ޖުލައި 30) - އާޖެންޓީނާގެ ފޯވާޑް، ޖޫލިއަން އަލްވަރޭޒްގެ ސޮއި ހޯދަން އޭނާގެ ކޮންޓްރެކްޓް އޮތް އެތުލެޓިކޯ މެޑްރިޑަށް ނޭނގި ބާސެލޯނާ އިން މަސައްކަތް ކުރަމުން އަންނާތީވެ، އެ ޓީމާ ދެކޮޅަށް އެތުލެޓިކޯ އިން ފީފާ އަށް މައްސަލަ ހުށަހަޅައިފި އެވެ.
މި ފަހަރުގެ ފީފާ ވޯލްޑް ކަޕްގެ ތެރެއިން ދިން އިންޓަވިއުއެއްގައި، އަލްވަރޭޒް ބުނެފައިވަނީ، އެންމެ ރަނގަޅު ގޮތަކަށްވާނީ އޭނާ އެދޭ ގޮތަށް ޓްރާންސްފާގެ ކަންކަން ކުރިއަށްގެންދަން ފުރުސަތު ދިނުމަށް ކަމަށް ބުނެފަ އެވެ. އަލްވަރޭޒް، މިހެން ބުނެފައިވަނީ، ބާސެލޯނާ އިން އޭނާގެ ސޮއި ހޯދަން ޝައުގުވެރިކަން ފާޅުކުރަމުންދިޔަ ދަނޑިވަޅެއްގަ އެެވެ.
ރިޕޯޓްތައް ބުނާގޮތުން، އުމުރުން 26 އަހަރުގެ އަލްވަރޭޒް ހޯދަން ބާސެލޯނާ އިން އެކި ގޮތްގޮތުން މަސައްކަތްކުރަަމުން އަންނައިރު، ތަކުރާރުކޮށް އެތުލެޓިކޯ އިން އަންނަނީ އަންނަ ސީޒަނުގައި އަލްވަރޭޒް ފެންނާނީ އެ ކްލަބުން ކަމަށް ބުނަމުންނެވެ.
މިދިޔަ މަހު ބާސެލޯނާގެ ރައީސް، ޖޮއާން ލަޕޯޓާ ވިދާޅުވީ، އެ ކްލަބުން އަލްވަރޭޒަށް ހުށަހަޅާފައި އޮތް ޕްރޮޕޯސަލް އެތުލެޓިކޯ އިން މަޝްވަރާގެ މޭޒަށް އަންނަން ބޭނުންވަންދެން ދެމި އޮންނާނެ ކަމަށް ބުނެފަ އެވެ. ރިޕޯޓްތައް ބުނާގޮތުން، އެއީ 100 މިލިއަން ޑޮލަރަށް ވުރެން އިތުރު ޑީލެކެވެ.
ގަވާއިދާ ހިލާފަށް އަލްވަރޭޒް ހޯދަން ބާސެލޯނާ އިން ނުފޫޒު ފޯރުވަމުން އަންނާތީވެ، އެތުލެޓިކޯ އިން ފުރަތަމަ މައްސަލަ ހުށަހެޅީ ސްޕެއިންގެ ފުޓްބޯޅަ ފެޑެރޭޝަނަށެވެ. އެކަމަކު، އެ އަށް އެކަށީގެންވާ ހައްލެއް ނުލިބޭތީ، އެތުލެޓިކޯ އިން ފީފާގެ ސަމާލުކަމަށް ވެސް އެކަން ގެނެސްފައިވާ ކަމަށް ސްޕެއިނުގެ ނޫސްތަކުން ވަނީ ރިޕޯޓްކޮށްފަ އެވެ.
މިދިޔަ މަހު، އެތުލެޓިކޯ އިން ވަނީ ރެއާލް މެޑްރިޑުން އަލްވަރޭޒް ގަންނަން ހުށަހެޅި 172 މިލިއަން ޑޮލަރުގެ އޮފާއެއް އަނބުރާ ފޮނުވާލައިފަ އެވެ. އިނގިރޭސި ޕްރިމިއާ ލީގުގެ ޗެމްޕިއަން، އާސެނަލުން ވެސް އަލްވަރޭޒަށް ވަނީ ޝަައުގުވެރިކަން ފާޅުކޮށްފަ އެވެ. އަދި، އާސެނަލުން އޮތީ އެ ޓީމަށް ކުޅޭ ސްވިޑެންގެ ފޯވާޑްް، ވިކްޓަ ޔޯކެރޭޝް ހިމެނޭހެން، އަލްވަރޭޒް ގަންނަން ޓްރާންސްފާ ފީއެއް ދޭ ގޮތަށް ޑީލެއް ހުށަހަޅަން ތައްޔާރަށް ކަމަށް ރިޕޯޓްތައް ބުނެ އެވެ.
ރިވަ ޕްލޭޓް ދޫކޮށް، 2022 ވަނަ އަހަރު ޖެނުއަރީ މަހު، މެންޗެސްޓާ ސިޓީ އަށް އަލްވަރޭޒް ބަދަލުވީ 20 މިލިއަން ޑޮލަރަށެވެ. މީގެ ދެ އަހަރު ކުރިން، 90 މިލިއަން ޑޮލަރަށް އަގު އަރާ ޓްރާންސްފާ ޕެކޭޖެއްގައި އެތުލެޓިކޯ އަށް ބަދަލުވި އަލްވަރޭޒް އެ ކްލަބާ އެކު ކޮންޓްރެކްޓްގައި ހުރީ 2030 ވަނަ އަހަރުގެ ޖޫން މަހުގެ ނިޔަލަށެވެ.
އެތުލެޓިކޯ އަށް ކުޅުނު ދެ ސީޒަނުގައި އޭނާ ވަނީ 106 މެޗުން 49 ލަނޑު ޖަހައި، 17 ލަނޑު ޖަަހަން ފުރުސަތު ތަނަވަސްކޮށްދީފަ އެވެ.
