އެގްރޯ ނެޝަނަލް ކޯޕަރޭޝަން ލިމިޓެޑުގެ ޑިރެކްޓަރުންގެ ބޯޑަށް ގދ. ތިނަދޫ، ވިނަވި, ޝަޒުހަތު ލަތީފް މިއަދު އައްޔަންކޮށްފި އެވެ.
އެގްރޯ ނެޝަނަލްގެ ބޯޑަށް ޝަޒުހަތު އައްޔަން ކުރީ ޑިރެކްޓަރުންގެ ބޯޑުގެ އެކައުންޓިން އެންޑް ފައިނޭންސިންގެ މެންބަރުކަމަށެވެ.
ޝަޒްހަތު ލަތީފަކީ 2017 ވަނަ އަހަރުން ފެށިގެން ފައިނޭންސް މިނިސްޓްރީގެ ބަޖެޓް އެނަލިސްޓެއްގެ މަގާމު އަދާކުރައްވަމުން ގެންދަވާ ފަރާތެކެވެ. އޭނާ ކުރައްވާ މަސައްކަތްތަކުގެ ތެރޭގައި އަހަރީ ބަޖެޓް އެކުލަވާލުމާއި، ބޭސްލައިން ބަޖެޓް ވަޒަންކުރުމާއި، ހަރަދުތައް ދިރާސާކުރުމާއި، ބަޖެޓް ކޮންޓްރޯލް ކުރުމުގެ އިތުރުން ފިސްކަލް ރިސްކް އެސެސްމަންޓް ހެދުން ހިމެނެ އެވެ.
މީގެ އިތުރުން، ސަރުކާރުގެ އެކި އިދާރާތަކަށް ބަޖެޓާ ގުޅޭ އިރުޝާދު ދެއްވުމާއި، 'ބަޖެޓް ސްޓެޓިސްޓިކްސް ބުކް' އަދި 'ފިސްކަލް ރިސްކް ސްޓޭޓްމަންޓް' ފަދަ މުހިންމު ލިޔުންތައް ތައްޔާރުކުރުމުގައި ވެސް ޝަޒްހަތު މަސައްކަތް ކުރައްވަ އެވެ.
އޭނާ ވަނީ ޔުނިވާސިޓީ އޮފް ބެޑްފޯޑްޝަޔާއިން ފައިނޭންސްގެ ދާއިރާއިން މާސްޓާޒް އޮފް ބިޒްނަސް އެޑްމިނިސްޓްރޭޝަން ހާސިލުކުރައްވާފަ އެވެ. އަދި ޔުނިވާސިޓީ އޮފް ދަ ވެސްޓް އޮފް އިންގްލެންޑުން އެކައުންޓިން އެންޑް ފައިނޭންސްގެ ދާއިރާއިން ބެޗްލާ އޮފް އާޓްސް ވެސް އޭނާ ވަނީ ހޯއްދަވައިފަ އެވެ.
