އިދިކޮޅު އެމްޑީޕީގެ ގައުމީ މަޖިލިސް ބައްދަލުވުމެއް މިރޭ ބާއްވަން ތާވަލުކޮށްފި އެވެ.
އެމްޑީޕީން ބުނީ މިރޭ ގައުމީ މަޖިލިސް ބޭއްވުމަށް ހަމަޖެހިފައިވަނީ 9:00 ޖަހާއިރު ފަންކްޝަން ފައިވްގައި ކަމަށެވެ.
އަދަދު އަށް އެނގިފައިވާ ގޮތުގައި މިރޭ އެމްޑީޕީގެ ގައުމީ މަޖިލިސް ބާއްވަނީ އެ ޕާޓީގެ ކޮންގްރެސްއާ ގުޅޭގޮތުންނެވެ. މިގޮތުން ކޮންގްރެސް ބާއްވާ ދުވަހަކާ ގުޅޭގޮތުން މިރޭ މަޝްވަރާ ކުރަން ވަނީ ހަމަޖެހިފައި ކަމަށް މައުލޫމާތު ލިބިފައިވެ އެވެ.
މީގެއިތުރުން ގޮފިތައް އެކުލަވާލުމުގެ ގަވާއިދަށް ވެސް ބައެއް އިސްލާހުތަކެއް މިރޭ ބާއްވާ ގައުމީ މަޖިލީހުގެ ބައްދަލުވުމަށް ހުށަހަޅަން މަސައްކަތް ކުރަމުންދާކަން އެނގިފައިވެ އެވެ.
އެމްޑީޕީގެ ކޮންގްރެސް މި އަހަރު މެދުތެރޭގައި ބޭއްވުމަށް އެ ޕާޓީގެ ގައުމީ މަޖިލީހުން ފާސްކުރީ މިދިޔަ އަހަރުގެ އޮގަސްޓް މަހުގެ ތެރޭގަ އެވެ. ބެލެވޭ ގޮތުގައި އެ ޕާޓީގެ ކޮންގްރެސް ބާއްވާނީ އަންނަ ސެޕްޓެމްބަރު މަހުގެ ތެރޭގަ އެވެ.
އެމްޑީޕީގެ ކޮންގްރެސްގައި އެ ޕާޓީގެ އަސާސީ ގަވާއިދަށް އިސްލާހުތަކެއް ގެންނާނެ ކަމަށް ބެލެވެ އެވެ. އެންމެ ފަހުން އެމްޑީޕީގެ ކޮންގްރެސްއެއް ބޭއްވީ 2022 ގައި މާލޭގަ އެވެ.
