ހދ. ހަނިމާދޫ ކައިރީގައި އޮންނަ ހދ. ހޮނޑާފުށީގެ ދެކުނު ފަރާތުގައި އެންވެރިކަން ކުރަން އޮތް "ބަހުރު" ނަމަކަށް ކިޔާ މަސްދޯންޏަކުން ގެއްލުނު މީހާ ހޯދަމުންދަނިކޮށް، ހޮނޑާފުށި ގޮނޑުދޮށުން ސަލާމަތުން އޮއްވާ މިއަދު ފެނިއްޖެ އެވެ.
އެމްއެންޑީއެފް އިން ބުނީ އެ މީހާ ގެއްލިގެން ރިޕޯޓު ލިބުނީ ފަތިހު 4:05 ހާއިރު ކަމަށާއި ރިޕޯޓު ލިބުމާއެކު އޭނާ ހޯދުމުގެ މަސައްކަތް ކުރަނިކޮށް ހެނދުނު 5:55 ހާއިރު ފެނުނީ ހޮނޑާފުށި ގޮނޑުދޮށަށް ލައްގާފައި ވަނިކޮށް ކަމަށެވެ.
"ގެއްލުނު މީހާ ފެނިފައިވަނީ މިއަދު ހެނދުނު 05:55 ހާއިރު، ހޮނޑާފުށީ ގޮނޑުދޮށަށް ލައްގާފައި އޮއްވާ، ހޯދުމުގެ މަސައްކަތުގައި އެހީތެރިވަމުންދިޔަ ޑިންގީއަކަށް،" އެމްއެންޑީއެފް އިން ބުންޏެވެ.
އެ މީހާއަށް އަވަސް ފަރުވާ ދިނުމަށް ހދ. ހަނިމާދޫ ސިއްހީ މަރުކަޒަށް ގެންގޮސް ދަނީ ފަރުވާ ދެމުންނެވެ. އޭނާގެ ހާލު ރަނގަޅުވަމުން އަންނަ ކަމަށް ސިއްހީ މަރުކަޒާ ހަވާލާދީ އެމްއެންޑީއެފް އިން ބުންޏެވެ.
މި މީހާ ހޯދުމަށް ކުރިއަށްގެންދިޔަ މަސައްކަތުގައި އެމްއެންޑީއެފް ކޯސްޓްގާޑް ފަސްޓް ސްކޮޑްރަންގެ އުޅަނދުފަހަރުގެ އިތުރުން، އެ ސަރަޙައްދުގައި ހަރަކާތްތެރިވި އާންމުންގެ އުޅަނދުފަހަރުތަކުން ދިން އެހީތެރިކަމަށް އެމްއެންޑީއެފް އިން ވަނީ ޝުކުރު އަދާކޮށްފަ އެވެ.
