ހިއުމަން ރައިޓްސް ކޮމިޝަން (އެޗްއާރްސީއެމް) ގެ މެންބަރެއްގެ ދައުރު ހަމަވާތީ އެ މަގާމަށް ކުރިމަތިލުމުގެ ފުރުސަތު ރައީސް އޮފީހުން އިއްޔެ ހުޅުވާލައިފި އެވެ.
ރައީސް އޮފީހުން ބުނީ އެޗްއާރްސީއެމްގެ މެންބަރަކަށްވުމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ ރަސްމީ ބަންދު ދުވަސްތައް ފިޔަވައި، އެހެނިހެން ދުވަސްތަކުގައި ހެނދުނު 8:30 އިން ފެށިގެން މެންދުރު 12:00 އަށް ރައީސް އޮފީހުން ކަމަށެވެ.
އެޗްއާރްސީއެމްގެ މެންބަރުކަމަށް ކުރިމަތިލުމުގެ ފުރުސަތު ހުޅުވާލީ އޮގަސްޓް 10، ވާ ހޯމަ ދުވަހުގެ މެންދުރު 12:00 ޖެހުމުގެ ނިޔަލަށެވެ.
އެޗްއާރްސީއެމްގެ މެންބަރުންގެ ތެރެއިން ދައުރު ހަމަވަނީ ސަމާއު އަހްމަދު ނަޖީބުގެ އެވެ. އޭނާއަކީ މިދިޔަ އެމްޑީޕީގެ ވެރިކަމުގައި އައްޔަނުކޮށް ދައުރު ހަމަނުވެ ހުންނެވި ހަމައެކަނި މެންބަރެވެ. އެ ކޮމިޝަނުގައި މިވަގުތު ތިއްބެވި ބާކީ މެންބަރުންނަކީ މި ސަރުކާރުން އައްޔަނު ކުރެއްވި ބޭފުޅުންނެވެ.
އެޗްއާރްސީއެމްގެ ރައީސަކީ ޑރ. އާއިޝަތު ރަމީލާ ކަމަށްވާއިރު، ނައިބުރައީސަކީ މުހައްމަދު ޝަފީގު މަހްމޫދު އެވެ. މެންބަރުންގެ ގޮތުގައި ތިއްބެވީ އިސްމާއީލް ހަބީބު އަބްދުއްރަހީމް އާއި އަހްމަދު މަގްސޫމް އެވެ.
