ސްކޮޓްލެންޑްގެ ގްލާސްގޯގައި މިހާރު ކުރިއަށްދާ 23 ވަނަ ކޮމަންވެލްތު ގޭމްސްގެ ތިން ވަނަ ދުވަހު، ކުރިއަށްދިޔަ އިވެންޓްތަކުގައި ރާއްޖޭގެ ގައުމީ ސްވިމިން ޓީމުގެ އަމްނާ ތަޒްކިޔާ މިރުސާދު އާއި މުހައްމަދު ރިހާން ޝިހާމް ގައުމީ ރެކޯޑްތަކެއް އާ ކޮށްފި އެވެ.
މި ދެ ރެކޯޑާ އެކު، މި ފަހަރުގެ ކޮމަންވެލްތު ގޭމްސްގައި ވާދަކުރާ ފެތުންތެރިން މި ވަނީ ޖުމްލަ އެކު، އަށް ގައުމީ ރެކޯޑެއް އާ ކޮށްފަ އެެވެ.
ރިހާން، އިއްޔެ އާ ކުރީ އޭނާ އަތުގައި ކުރިން އޮތް 200 މީޓަރު ބަޓަފްލައި އިވެންޓުގެ ގައުމީ ރެކޯޑެވެ. އެ ގޮތުން، މީގެ ކުރިން 22 ވަނަ ވޯލްޑް އެކުއަޓިކްސް ޗެމްޕިއަންޝިޕްގެ އެ އިވެންޓް، 2 މިނިޓް 25.20 ސިކުންތުން ނިންމައިގެން، ރިހާން ހެދި ރެކޯޑް މި ފަހަރުގެ ކޮމަންވެލްތު ގޭމްސްގައި އާ ކުރީ 2 މިނިޓް 23.94 އިން ނިންމައިގެންނެވެ.
އަންހެނުންގެ 50 މީޓަރު ބެކްސްޓްރޯކް އިވެންޓްގައި ވާދަކޮށް ތަޒްކިޔާ ވަނީ އޭނާ އަތުގައި ކުރިން ވެސް އޮތް ރެކޯޑެއް އާ ކޮށްފަ އެވެ. އެ ގޮތުން، ތަޒްކިޔާ، ތިން ވަނަ އޭޝިއަން ޔޫތު ގޭމްސްގައި މިދިޔަަ އަހަރު އެ އިވެންޓް ނިންމީ، 32.57 ސިކުންތުންނެވެ. އަދި، މިއަދު ކޮމަންވެލްތު ގޭމްސްގައި އެ ރެކޯޑް އާ ކުރީ 31.55 ސިކުންތުން ރޭސް ނިންމައިގެންނެވެ.
ގައުމީ ސްވިމިން ޓިމުން އިއްޔެ ދެން ބައިވެރިވި، އަންހެނުންގެ އިންޑިވިޖުއަލް މެޑްލީ 400 މީޓަރުގެ އިވެންޓްގެ ގައުމީ ރެކޯޑް އޮތް މެރާލް އައިން ލަތީފް ވަނީ މި ފަހަރުގެ ކޮމަންވެލްތު ގޭމްސްގެ އެ އިވެންޓްގައި ވާދަކޮށްފަ އެވެ. މީގެ ކުރިން، 10 ވަނަ ވޯލްޑް އެކުއަޓިކްސް ޖޫނިއާ ޗެމްޕިއަންޝިޕްގައި މެރާލް ވަނީ މި އިވެންޓް 5 މިނިޓް 57.86 ސިކުންތުން ނިންމައިގެން ރެކޯޑް ހަދައިފަ އެވެ. އަދި، މި ފަހަރުގެ ކޮމަންވެލްތު ގޭމްސްގައި މެރާލް އަށް އެ އިވެންޓް ފުރިހަމަަ ކުރެވުނީ، 6 މިނިޓް 03.71 ސިކުންތުންނެވެ.
މި ފަހަރުގެ ކޮމަންވެލްތު ގޭމްސްގައި ކުރިން ރާއްޖޭން އާ ކުރި ގައުމީ ރެކޯޑްތަކަކީ، އަންހެނުންގެ 200 މީޓަރު ފްރީސްޓައިލް އިވެންޓްގައި ވާދަކުރި މެރާލް އައިން ލަތީފް ހެދި ރެކޯޑާއި ހަތަރެއް ގުނަ 100 މީޓަރު ފްރީ ސްޓައިލް އިވެންޓްގައި ވާދަކުރި މިކްސް ރިލޭ ޓީމުން ހެދި ރެކޯޑްގެ އިތުރުން، 50 މީޓަރު ބެކްސްޓްރޯކް އިވެންޓުގައި ވާދަކޮށް، އާން ހެދި ގައުމީ ރެކޯޑާއި 100 މީޓަރު ބްރެސްޓްރޯކް އިވެންޓުގައި ވާދަކޮށް ލޫތު އާ ކުރި ގައުމީ ރެކޯޑެވެ. އަދި،ތަޒްކިޔާ އާ ކުރީ ވިމެންސް ފްރީސްޓައިލް 100 މީޓަރު އިވެންޓުގެ ގައުމީ ރެކޯޑާއި ލޫތު އާ ކުރި، 50 މީޓަރު ބްރެސްޓްސްޓްރޯކް އިވެންޓްގެ ގައުމީ ރެކޯޑް އެވެ.
