ސްކޮޓްލެންޑްގެ ގްލާސްގޯގައި މިހާރު ކުރިއަށްދާ 23 ވަނަ ކޮމަންވެލްތު ގޭމްސްގެ ތިން ވަނަ ދުވަހު، ކުރިއަށްދިޔަ އިވެންޓްތަކުގައި ރާއްޖޭގެ ގައުމީ ސްވިމިން ޓީމުގެ އަމްނާ ތަޒްކިޔާ މިރުސާދު އާއި ލޫތު މުހައްމަދު ހުސެއިން ގައުމީ ރެކޯޑްތަކެއް އާ ކޮށްފި އެވެ.
މި ދެ ރެކޯޑާ އެކު، މި ފަހަރުގެ ކޮމަންވެލްތު ގޭމްސްގައި ވާދަކުރާ ފެތުންތެރިން މި ވަނީ ޖުމްލަ އެކު، ހަ ގައުމީ ރެކޯޑެއް އާ ކޮށްފަ އެެވެ.
އިއްޔެގެ އިވެންޓްތަކުގައި، ތަޒްކިޔާ އާ ކުރީ ވިމެންސް ފްރީސްޓައިލް 100 މީޓަރު އިވެންޓުގެ ގައުމީ ރެކޯޑެެވެ. މި އިވެންޓްގައި ތަޒްކިޔާ ރެކޯޑް އާ ކުރީ، 1 މިނިޓް 02.74 ސިކުންތުން ރޭސް ނިންމައިގެންނެވެ. މީގެ ކުރިން ވެސް މި ރެކޯޑް އޮތީ ތަޒްކިޔާ އަތުގަ އެވެ. އެއީ، އޭޝިއަން އޯޕަން ސްކޫލް އިންވިޓޭޝަނަލް މުބާރާތުގައި، 1 މިނިޓް 03.67 ސިކުންތުން އިވެންޓް ނިންމައިގެންނެވެ.
މިއަދުގެ 50 މީޓަރު ބްރެސްޓްސްޓްރޯކް އިވެންޓްގައި ލޫތު ރެކޯޑް ހެދީ 31.54 ސިކުންތުން ރޭސް ނިންމައިގެންނެވެ.
މީގެ ކުރިން ވެސް މި ރެކޯޑް އޮތީ ލޫތު އަތުގަ އެވެ. އެއީ، 10 ވަނަ ވޯލްޑް އެކުއަޓިކްސް ޖޫނިއާ މުބާރާތުގައި، 31.81 ސިކުންތުން އިވެންޓް ފުރިހަމަކޮށްގެންނެވެެ.
މި ފަހަރުގެ ގޭމްސްގައި ކުރިން ރާއްޖޭން އާ ކުރި ގައުމީ ރެކޯޑްތަކަކީ، އަންހެނުންގެ 200 މީޓަރު ފްރީސްޓައިލް އިވެންޓްގައި ވާދަކުރި މެރާލް އައިން ލަތީފް ހެދި ރެކޯޑާއި ހަތަރެއް ގުނަ 100 މީޓަރު ފްރީ ސްޓައިލް އިވެންޓްގައި ވާދަކުރި މިކްސް ރިލޭ ޓީމުން ހެދި ރެކޯޑްގެ އިތުރުން، 50 މީޓަރު ބެކްސްޓްރޯކް އިވެންޓުގައި ވާދަކޮށް، އާން ހެދި ގައުމީ ރެކޯޑާއި 100 މީޓަރު ބްރެސްޓްރޯކް އިވެންޓުގައި ވާދަކޮށް ލޫތު އާ ކުރި ގައުމީ ރެކޯޑެވެ.
ކޮމަންވެލްތު ގޭމްސްގައި މިއަދު ފެތުމުގެ އިވެންޓްތަކުގެ އިތުރުން، ރާއްޖޭގެ އެތުލީޓުން އެތުލެޓިކްސް އިވެންޓްތަކުގައި ވެސް ވާދަކުރާނެ އެވެ. މިއަދު އިވެންޓް އޮތް އެތުލީޓުންނަކީ، އަހްނާ ނިޒާރު، ޒިވާ މޫސާ ޝަފީއު، އައިޝަތު ޝަބާ ސަލީމް އަދި ހަސަން ސާއިދު އެވެ.
