ޕެރިސް (ޖުލައި 22) - ފްރާންސްގެ ގައުމީ ފުޓްބޯޅަ ޓީމުގެ ކޯޗުކަން ޒިނެދިން ޒިދާނަށް ދިނުމަށްޓަކައި، އޭނާގެ މުސާރަ ހަމަޖެއްސުމަށް ފްރާންސް ސަރުކާރުން ހާއްސަ ހުއްދައެއް ނަގަން ޖެހުނު ކަމަށް ފްރާންސްގެ މަޝްހޫރު ނޫހެއް ކަމަށްވާ ލެކިއުޕޭ އިން ރިޕޯޓްކޮށްފި އެވެ.
ސާދަ އަހަރަށް ފަހު ފްރާންސް ކޯޗުކަމުން ޑިޑިއޭ ޑެޝޯމްޕްސް ވަކިވީ، ދާދި ފަހުން އެމެެރިކާ، މެކްސިކޯ އަދި ކެނަޑާގައި ކުރިއަށްދިޔަ ފީފާ ވޯލްޑް ކަޕް ފުޓްބޯޅަ މުބާރާތަށް ފަހު އެވެ. އެ މުބާރާތުގެ ސެމީ ފައިނަލުން ފްރާންސް ކެޓީ މުބާރާތް ކާމިޔާބުކުރި ސްޕެއިން އަތުންނެވެ. އަދި، ތިން ވަނަ ހޮވި މެޗުން ފްރާންސް ވަނީ އިންގްލެންޑް އަތުން ވެސް ބަލިވެފަ އެވެ.
މި ފަހަރުގެ ވޯލްޑް ކަޕާ ކުރިމަތިލިއިރު ވެސް މިއީ ޑެޝޯމްޕްސްގެ ފަހު މުބާރާތް ކަން ވަނީ އިއުލާނުކޮށްފަ އެވެ. ފްރާންސުން ޑެޝޯމްޕްސް އަށް ފަހު، އެ ޓީމު ހަވާލުކޮށްފައި މި ވަނީ، 1998 ވަނަ އަަހަރު އެ ޓީމަށް ވޯލްޑް ކަޕް ކާމިޔާބުކޮށްދިން ގޯލު ޖެހި ޒިދާންއާ އެވެ. ޒިދާނަށް ވަނީ، 2030 ވަނަ އަހަރުގެ ޖުލައި މަހުގެ ނިޔަލަށް އޮތް ކޮންޓްރެކްޓެއް ދީފަ އެވެ.
ރިޕޯޓްތައް ބުނާގޮތުން، ޒިދާނަށް އެ ކޮންޓްރެކްޓް ދިނުަމަށްޓަކައި، ފްރާންސްގެ ސްޕޯޓްސް މިނިސްޓްރީން ވަނީ އެ ގައުމުގެ ކުޅިވަރު ޕޮލިސީ އަށް ބަދަލެއް ގެންނަން ޖެހިފަ އެވެ. އެ ގޮތުން، އެ ގައުމުގެ ކުޅިވަރު ޕޮލިސީ ބުނާގޮތުން، އެއްވެސް ކުޅިވަރެއްގެ ހެޑް ކޯޗަކަށް ދޭ މުސާރައެއް އަހަރަކަށް ބަލާއިރު، ފަސް މިލިއަން ޑޮލަރަށް ވުރެން މަތި ވެގެންނުވާނެ އެވެ. އެ ގޮތުން، އެންމެ ފަހުން، ޑެޝޯމްޕްސް ހުރި ކޮންޓްރެކްޓްގައި ވެސް އޭނާ އަށް ބޯނަހާ އެކު އަހަރަކަށް ޖެހެނީ، ގާތްގަނޑަކަށް ހަތަރު މިލިއަން ޑޮލަރެވެ.
އެކަމަކު، ލެކިއުޕޭ ނޫހުން ރިޕޯޓްކުރާ ގޮތުގައި، ޒިދާނަށް ބޯނަހާ އެކު އަހަރަކަށް ފަސް މިިލިއަން ޑޮލަރަށް ވުރެން އިތުރަށް މުސާރައިގެ ގޮތުގައި ލިބޭނެ އެވެ.
ކޯޗިން ކެރިއަރުގައި ޒިދާން ވަނީ ދެ ފަހަރެއްގެ މަތިން ރެއާލަށް ކޯޗުކޮށްދީފަ އެވެ. އެއީ، 2016-2018 އާއި 2019 އިން 2021 އަށެވެ. އޭނާ ރަސްމީކޮށް އެހެން ޓީމަކާ އަދި ހަވާލުވެފައި ނުވި ނަމަވެސް، ބައެއް ކްލަބްތަކުގެ ސެޝަންތަކުގައި، ކޮންސަލްޓަންޓެއްގެ ގޮތުގައި މަސައްކަތްކޮށްފައިވެ އެވެ.
މީގެ ކުރިން، ސްޕެއިނުގެ މީޑިއާތަކުން ރިޕޯޓްކުރީ، ޒިދާން، ކޯޗިން އަށް އެނބުރި އަންނަން ވިސްނަނީ ދެ ޓީމެއްގެ ހުށަހެޅުމެއް ލިބިއްޖެނަމަ އެވެ. އެއީ، ރެއާލް މެޑްރިޑް ނޫނީ ފްރާންސް ގައުމީ ފުޓްބޯޅަ ޓީމެވެ. އޭގެ ތެރެއިން، އޭނާ އެންމެ ބޭނުންވެފައި ހުރި ފްރާންސްގެ ވަޒީފާއާ މި ވަނީ ހަވާލުވެފަ އެވެ.
