ހއ. ހޯރަފުއްޓަށް މަރުވެފައި އޮތް 30 ފޫޓުގެ ބޮޑުމަހެއް މިއަދު ލައްގައިފި އެވެ.
ހޯރަފުށީ ކައުންސިލުން ބުނީ ބޮޑުމަސް ލެއްގީ ފަޅު ތެރެއަށެވެ. އެ މަސް ވަނީ ގޮނޑުދޮށަށް ނެގުމަށް އަތިރިމަތީގައި ވަޅުލާފަ އެވެ.
"ހއ. ހޯރަފުށި ހުޅަނގު ފަރުމައްޗަށް ލައްގާފައިވާ 30 ފޫޓުގެ ބޮޑުމަސް ކައުންސިލާއި، ހޯރަފުށީ ޕޮލިސް، އެމްއެންޑީއެފް ނޮދަން އޭރިއާ ކޮމާންޑްގެ އިތުރުން އެމްޓީސީސީ ހޯރަފުށީ ސައިޓްގެ އެހީތެރިކަމާއެކު ގޮނޑުދޮށަށް ނެގުމަށްފަހު މިހާރު ވަނީ ވަޅުލާފަ،" ކައުންސިލުން ބުނެފައިވެ އެވެ.
ހޯރަފުއްޓަށް ލެއްގީ ކޮން ބާވަތެއްގެ ބޮޑުމަހެއް ކަމެއް ކައުންސިލުން ހާމައެއް ނުކުރެ އެވެ.
ރަށްރަށަށް ބޮޑުމަސް ލެއްގުމަކީ ރާއްޖޭގައި އާންމުކޮށް ވެސް ދިމާވާ ކަމެކެވެ. އެގޮތުން މި ފަހުގެ އަހަރުތަކުގެ ތެރޭގައި ސ. ހިތަދޫ، ހއ. ތަކަންދޫ، ބ. ފެހެންދޫ، ތ. ހިތާދޫއަށް ވަނީ ބޮޑުމަސް ލައްގައިފަ އެވެ.
ފަހުގެ ތާރީހެއްގައި އެންމެ ބޮޑު، ބޮޑުމަސް ލެއްގީ ލ. ކަޅައިދުއަށެވެ. މީގެ 15 އަހަރު ކުރިން 2011 ވަނަ އަހަރު ކަޅައިދުއަށް ލެއްގީ 70 ފޫޓުގެ ބޮޑުމަހެކެވެ. އެމަހުގެ ފުޅާމިނުގައި ވެސް 30 ފޫޓު ހުއްޓެވެ.
