އަހަރުގެ ފުރަތަމަ ހަ މަސް ނިމުނުއިރު، ޓެކުހާއި ޓެކްސް ނޫން އާމްދަނީތަކުގެ ތެރެއިން ޑޮލަރުން ދައްކަން ޖެހޭ ދާއިރާތަކުން 867 މިލިއަން ޑޮލަރު ސަރުކާރަށް ލިބިފައިވާ ކަމަށް މީރާއިން ހާމަކޮށްފި އެވެ.
މީރާއިން އެންމެ ފަހުން އާންމުކޮށްފައިވާ މަންތުލީ ކަލެކްޝަން ރިޕޯޓުގައިވާ ގޮތުގައި، މިއީ މިދިޔަ އަހަރުގެ ފުރަތަމަ ހަ މަސް ދުވަހުގެ ތެރޭގައި ލިބުނު އާމްދަނީއަށް ވުރެ 76.5 މިލިއަން ޑޮލަރު އިތުރު އަދަދެކެވެ.
ޑޮލަރުން ލިބުނު އާމްދަނީގެ ބޮޑު ބަޔަކީ ޓޫރިޒަމް ޓެކްސްތަކެވެ. ޓެކްސްތަކުން 667 މިލިއަން ޑޮލަރު ލިބިފައިވާއިރު، ޓެކްސް ނޫން އާމްދަނީގެ ގޮތުގައި ލިބުނީ 200 މިލިއަން ޑޮލަރެވެ.
ޖުމްލަކޮށް ބަލާއިރު، އަދިވެސް ޑޮލަރުން ލިބޭ އާމްދަނީގެ ބޮޑު ބަޔެއް ވަންނަނީ ޓޫރިޒަމް ދާއިރާގެ މުދަލާއި ހިދުމަތްތަކުން ނަގާ ޓެކްސް (ޓީޖީއެސްޓީ) އިންނެވެ. މީރާގެ ތަފާސްހިސާބުތަކުން ދައްކާ ގޮތުގައި މި އަހަރުގެ ތެރޭގައި އެ އިދާރާއިން ބަލައިގަތް ޑޮލަރުގެ 50 ޕަސެންޓު ވަނީ ޓީޖީއެސްޓީންނެވެ.
2026 ވަނަ އަހަރުގެ ޖޫން މަހުގެ ނިޔަލަށް ޑޮލަރުން ލިބުނު އާމްދަނީ
- ޓީޖީއެސްޓީ - 431 މިލިއަން ޑޮލަރު
- އިންކަމް ޓެކްސް - 88.1 މިލިއަން ޑޮލަރު
- ގްރީން ޓެކްސް - 79 މިލިއަން ޑޮލަރު
- ޓޫރިޒަމް ލޭންޑް ރެންޓް - 74 މިލިއަން ޑޮލަރު
- އެއާޕޯޓު ޑިޕާޗާ ޓެކްސް - 69.1 މިލިއަން ޑޮަލަރު
- އެއާޕޯޓު ޑިވެލޮޕްމަންޓް ފީ - 69.8 މިލިއަން ޑޮލަރު
- ލޭންޑް އެކުއިޒިޝަން އަދި ކޮންވާޝަން ފީ - 39.8 މިލިއަން ޑޮލަރު
- ލީސް ޕީރިއަޑް އެކްސްޓެންޝަން ފީ - 10.8 މިލިއަން ޑޮލަރު
- ޖޫރިމަނާތަކުން - 1.9 މިލިއަން ޑޮލަރު
ޓީޖީއެސްޓީގެ ގޮތުގައި މީރާއިން ވަނީ 431 މިިލިއަން ޑޮލަރު ބަލައިގެންފަ އެވެ. އަދި، އިރާނު ހަނގުރާމައާ ގުޅިގެން މާޗު މަހުން ފެށިގެން ޓޫރިސްޓުން އަންނަ އަދަދު މަދުވިޔަސް، ޓީޖީއެސްޓީ އާމްދަނީއަށް ހީނަރުކަމެއް ނާދެ އެވެ.
ޓީޖީއެސްޓީ ނަގާފައި ދެން އެންމެ ބޮޑު އާމްދަނީއެއް ލިބުނީ އާމްދަނީން ނަގާ (އިންކަމް) ޓެކްސް އާއި ގްރީން ޓެކްސްއިންނެވެ. ޓެކްސް ނޫން ދާއިރާތަކުގެ ތެރެއިން އެންމެ ގިނައިން ޑޮލަރު ލިބެނީ ރިސޯޓު ކުލިންނެވެ.
އަހަރުންއަހަރަށް ބަލާއިރު ޑޮލަރު އާމްދަނީ އިތުރުވެފައިވާއިރު، އިރާނު ހަނގުރާމައާ ގުޅިގެން ޓޫރިޒަމަށް އައި ލޮޅުމާއެކީ އާމްދަނީއަށް ބޮޑު އަސަރެއް ކުރާނެ ކަމަށް ކުރިން ބެލެވުނެވެ. ނަމަވެސް އޭޕްރިލް މަހާއި މެއި މަހުގެ ތެރޭގައި ޑޮލަރު އާމްދަނީއަށް ކުޑަ ހީނަރުކަމެއް އައުމުގެ އިތުރަށް، މިދިޔަ އަހަރާ އަޅާބަލާއިރު އާމްދަނީއަށް މާ ބޮޑު އަސަރެއް ކުރި ކަމަކަށް ނުދައްކަ އެވެ.
އާމްދަނީ ލިބޭ ވަކިވަކި ދާއިރާތަކަށް ބެއްޔަސް ދައްކަނީ، ހުރިހާ ދާއިރާތަކުން ލިބުނު އާމްދަނީ މިދިޔަ އަހަރަށް ވުރެ އިތުރުވެފައިވާ ކަމަށެވެ.
