އިރާނު ހަނގުރާމައާ ގުޅިގެން މެދުއިރުމަތިން ރާއްޖެ އަންނަ ފްލައިޓުތައް ހުއްޓާލުމާއި ހަނގުރާމައާ ގުޅިގެން ރިސޯޓުތަކަށް އޮންނަ ޑިމާންޑު ދަށްވުމާ އެކީ ޓޫރިސްޓުން މަދުވެ، ޑޮލަރުން ލިބުނު އާމްދަނީ މި އަހަރުގެ ތެރޭގައި ފުރަތަމަ ފަހަރަށް 100 މިލިއަނުން ދަށަށް ގޮސްފި އެވެ.
ދައުލަތުގެ ޓެކްސް އިދާރާ، މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން އާންމުކޮށްފައިވާ މިދިޔަ މަހުގެ ޓެކްސް ކަލެކްޝަން ރިޕޯޓުގައިވާ ގޮތުގައި އެ މަހު ޔޫއެސް ޑޮލަރުން ލިބުނީ 88.5 މިލިއަން ޑޮލަރެވެ. މިއީ މިދިޔަ އަހަރުގެ މެއި މަހު ޓެކުހާއި ޓެކްސް ނޫން އާމްދަނީތަކުން ލިބުނު އަދަދަށް ވުރެ 16.1 މިލިއަން ޑޮލަރު މަދު އަދަދެކެވެ.
މިދިޔަ މަހާއި އޭގެ ކުރީ މަހު ޑޮލަރުން ލިބުނު އާމްދަނީ އޭގެ ކުރީ އަހަރަށް ވުރެ މަދުވިޔަސް، މި އަހަރުގެ ފުރަތަމަ ފަސް މަހުގެ ތެރޭގައި ލިބުނު ޑޮލަރުގެ އަދަދު ކުރީ އަހަރަށް ވުރެ 47 މިލިއަން ޑޮލަރު އިތުރެވެ. ސަބަބަކީ މި އަހަރުގެ މާޗު މަހުގެ ތެރޭގައި ދައުލަތަށް ލިބުނު ރެކޯޑު އާމްދަނީ އެވެ.
މާޗު މަހު 205.1 މިލިއަން ޑޮލަރު ލިބިފައިވާއިރު، މިއީ ރެކޯޑު އަދަދެކެވެ. އަދި، އެއް މަސް ދުވަހުގެ ތެރޭގައި 200 މިލިއަން ޑޮލަރަށް ވުރެ ބޮޑު އަދަދެއް ލިބުނު ހަމައެކަނި މަހެވެ.
ޔޫއެސް ޑޮލަރުން މީރާއިން ބަލައިގަތް އާމްދަނީ 2026
- ޖެނުއަރީ - 180.4 މިލިއަން ޑޮލަރު
- ފެބްރުއަރީ - 126.8 މިލިއަން ޑޮލަރު
- މާޗު - 205.1 މިލިއަން ޑޮލަރު
- އޭޕްރިލް - 120.7 މިލިއަން ޑޮލަރު
- މެއި - 88.5 މިލިއަން ޑޮލަރު
ދައުލަތަށް ލިބޭ އާމްދަނީ އާއި ޓޫރިޒަމާ ގުޅިލާމެހިފައިވާއިރު، ކުރިއަށް އޮތް ދުވަސްތަކުގެ ތެރޭގައި ވެސް ޓޫރިސްޓުން އަންނަ އަދަދު އިތުރު ނުވާ ނަމަ އާމްދަނީއަށް އަސަރު ކުރާނެ އެވެ.
ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، އިއްޔެގެ ނިޔަލަށް 981،976 ޓޫރިސްޓުން އައިސްފި އެވެ. މިދިޔަ އަހަރު އެ ދުވަސް އައިއިރު އެއް މިލިއަން ޓޫރިސްޓުން ހަމަވެއްޖެ އެވެ.
ދައުލަތަށް ޑޮލަރުން ލިބޭ އާމްދަނީ ހީނަރުވެގެން އުޅޭއިރު، ޓޫރިޒަމަށް އައި ލޮޅުމާ ގުޅިގެން އިގުތިސޯދުގެ ތެރޭގައި ދައުރުވާ ޑޮލަރުގެ އަދަދު ވެސް މަދުވެއްޖެ އެވެ. ބޭންކް އޮފް މޯލްޑިވްސް (ބީއެމްއެލްއިން) ރުފިޔާ ކާޑުތަކަށް ހަރުކަށި ލިމިޓުތަކެއް ކަނޑައެޅީ ވެސް ޑޮލަރު ތާށިިކަމުންނެވެ.
