ޓޫރިޒަމް ވިޔަފާރިތަކާއި ގިނަ އަދަދަކަށް ޑޮލަރު ވަންނަ ވިޔަފާރިތަކަށް ލިބޭ ބޭރު ފައިސާގެ އާމްދަނީގެ ބައެއް މާރުކުރަން މަޖުބޫރުކުރި ފަހުން އެއް ބިލިއަން ޑޮލަރު ބޭންކުތަކަށް މާރުކޮށްފި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ މައުލޫމާތުން ދައްކައިފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ދަށުން ހުށަހެޅި އާރުޓީއައިއެއްގެ ޖަވާބުގައި އެމްއެމްއޭއިން ބުނީ މިދިޔަ އަހަރުގެ ޖެނުއަރީގައި ޑޮލަރު މާރުކުރަން ފެށި ފަހުން މެއި މަހާ ހަމައަށް 959 މިލިއަން ޑޮލަރު މާރުކޮށްފައިވާ ކަމަށެވެ. މިހާތަނަށް މާރުކުރި އަދަދުތަކުން ހިސާބުކުރާއިރު މަހެއްގެ މައްޗަށް އެވަރެޖުކޮށް 56 މިލިއަން ޑޮލަރު ބޭންކުތަކަށް މާރުކުރެ އެވެ. މިއީ ކުރިން އަންދާޒާ ކުރި 40 މިލިއަން ޑޮލަރަށް ވުރެ އިތުރު އަދަދެކެވެ.
އެހެންކަމުން ޖޫން މަހުގެ ތެރޭގައި މާރުކުރި އަދަދާ އެކީ، ބޭރު ފައިސާ މާރުކުރުމުގެ ސިޔާސަތުގެ ދަށުން ބިލިއަނަށް ވުރެ ގިނަ ޑޮލަރު މާރުކޮށްފި އެވެ. އޭގެ ތެރެއިން 651 މިލިއަން ޑޮލަރު މާރުކުރީ މިދިޔަ އަހަރެވެ. މި އަހަރުގެ ފުރަތަމަ ފަސް މަހުގެ ތެރޭގައި މާރުކުރީ 308 މިލިއަން ޑޮލަރެވެ.
ބޭރު ފައިސާއާ ބެހޭ ގާނޫނުގެ ދަށުން އާމްދަނީގެ ވަކި އިންސައްތައެއް ނޫނީ ބޮލަކަށް ޖެހޭ އަދަދު މާރުކުރުމުގެ އިތުރުން، އާމްދަނީ އެއްކޮށް ރާއްޖޭގެ ބޭންކެއްގައި ހުޅުވާފައި ހުންނަ އެކައުންޓަކަށް ޖަމާކުރަން ޖެހެ އެވެ. ވިޔަފާރިތަކުން މި މާއްދާއާ އެއް ގޮތަށް އަމަލުކުރަމުން ދޭތޯ ސުވާލުކުރުމުން އެމްއެމްއޭއިން ސުވާލުގެ އެ ބަޔަށް ޖަވާބެއް ނުދެ އެވެ. ނަމަވެސް އުސޫލުތަކާ އެއްގޮތަށް އަމަލުނުކުރާ ވިޔަފާރިތަކަށް ގާނޫނާއި ގަވާއިދަށް ބޯލެނބުމަށް އިލްތިމާސްކޮށް، ކޮންމެ މަހަކު އެއްފަހަރު ހަނދާންކޮށްދިނުމުގެ ނޯޓިސް ފޮނުވަމުން ގެންދާ ކަމަށް އެ އިދާރާއިން ބުންޏެވެ.
އެމްއެމްއޭ އާއި ސަރުކާރުން ބުނާ ގޮތުން ގިނަ ވިޔަފާރިތަކުން އަންނަނީ މި ގާނޫނާ އެއް ގޮތަށް އަމަލުކުރަމުންނެވެ. އެކަމަކު މިއަދާ ހަމައަށް ގަވާއިދާ ހިލާފުވެގެން އެއްވެސް ބަޔަކާ ދެކޮޅަށް ފިޔަވަޅެއް އަޅާފައި ނެތެވެ. މި ކަން ސާފުކުރަން އެމްއެމްއޭގައި ސުވާލުކުރުމުން އެ އިދާރާއިން ބުނީ އަޅަން ޖެހޭ ފިޔަވަޅުތައް އެޅުމުގެ މަސައްކަތް ކުރަމުންދާ ކަމަށެވެ.
"ކަނޑައެޅިފައިވާ ގާނޫނުތަކާއި ގަވާއިދުތަކާ އެއްގޮތްވާ ގޮތުގެ މަތިން، އަޅަންޖެހޭ ގާނޫނީ ފިޔަވަޅުތައް އެޅުމުގެ މަސައްކަތް މިހާރު ދަނީ ކުރެވެމުން." އެމްއެމްއޭއިން ބުންޏެވެ.
ވިޔަފާރިތަކުން ބޭންކުތަކަށް މާރުކުރާ ޑޮލަރުގެ 90 ޕަސެންޓު އެމްއެމްއޭއަށް ވިއްކަން މަޖުބޫރެވެ. އެމްއެމްއޭއިން ބުނަނީ އެ ބޭންކުން އަންނަނީ ދިވެހި ރުފިޔާގެ އަގު ހިފެހެއްޓުމުގެ ގޮތުން މި ޑޮލަރުތަކުގެ ބޮޑު ބަޔެއް އަނބުރާ ބޭންކުތަކަށް ވިއްކަމުންނެވެ.
ބޭރު ފައިސާ މާރުކުރުމުގެ ސިޔާސަތަކީ ޓޫރިޒަމް ވިޔަފާރިތަކުން ބޭންކިން ނިޒާމަށް ޑޮލަރު ނުވަންނަ މައްސަލަ ހައްލުކޮށް، ޑޮލަރު ތާށި ކަމަށް ހައްލެއް ކަމަށް ބުނެ ތަންފީޒުކުރަން ފެށި ކަމެކެވެ. ސަރުކާރާއި އެމްއެމްއޭއިން ވެސް ބުނީ ޑޮލަރުތަކުގެ ކޮންޓްރޯލް ނަގައިގެން ޑޮލަރުގެ ކަޅު ބާޒާރުގެ މައްސަލަ އާއި ބޮޑު އަގުގައި ޑޮލަރު ގަންނަން ޖެހޭ މައްސަލަ ހައްލުކުރެވޭނެ ކަމަށެވެ.
މިހެން ނަމަވެސް މި ސިޔާސަތަށް އަމަލުކުރަން ފެށިތާ ދޮޅު އަހަރު ވެގެން ދިޔައިރު، ޑޮލަރު ތާށިކަމުގެ މައްސަލަ ހައްލު ނުވެ އެވެ. ސަރުކާރަށް ފާޑުކިޔާ މީހުން ބުނަނީ ސަރުކާރުގެ ސިޔާސަތާ ގުޅިގެން މައްސަލަ އިތުރަށް ގޯސް ވެއްޖެ ކަމަށެވެ.
އަަދަދު ނޫހުން ޓްރެކްކުރަމުން އަންނަ ކަޅު ބާޒާރުގައި ޑޮލަރު ވިއްކާ އަގުތަކުން ދައްކާ ގޮތުގައި މި ސިޔާސަތު އިއުލާންކުރި ދުވަހުން ފެށިގެން މިއަދާ ހަމައަށް އައިއިރު ޑޮލަރުގެ އަގު 19ރ. އިން ދަށަށް ނުދެ އެވެ. މިހާރު ކަޅު ބާޒާރުގައި ޑޮލަރެއް ވިއްކާ އަގު ވަނީ 21ރ. އަށް އުފުލިފަ އެވެ.
