ޓެކްސަސް، ޔުނައިޓެޑް ސްޓޭޓްސް (ޖުލައި 4) - ޕެނަލްޓީ ޖަހައިގެން އޮސްޓްރޭލިއާ ބަލިކޮށް މިސްރުން ފީފާ ވޯޅްޑް ކަޕް ފުޓްބޯޅަ މުބާރާތުގެ ގަދަ 16 ޓީމުގެ ބުރަށް ދަތުރުކޮށްފި އެވެ.
މެޗުގެ ފުރިހަަމަ ވަގުތާއި އިތުރު ވަގުތުގެ ދެ ހާފް ނިމުނީ 1-1 އިން އެއްވަރުވެގެންނެވެ. ނަތީޖާ ނެރެން ޖެހުނީ ޕެނަލްޓީ ޖަހާށެވެ. ޕެނަލްޓީގައި މިސްރު މޮޅުވީ 4-2 އިންނެވެ. މިއީ، ވޯލްޑް ކަޕްގެ ނޮކައުޓް މެެޗެއްގައި އެފްރިކާގެ ޗެމްޕިއަންކަން ހަތް ފަހަރު ހޯދި މިސްރުން ކުޅުުނު ފުރަތަމަ ފަހަރެވެ. ފުރަތަމަ މެޗުން ވެސް އެ ޓީމުން ވަނީ މޮޅުވެފަ އެވެ.
މިސްރުން ރަނގަޅު ފޯމެއްގައި ފެށި މި މެޗުގައި 13 ވަނަ މިނިޓްގައި ލީޑުނެގި އެވެ. މިއީ، ކަރެމް ހަފޭޒް ދިން އޭރިއާތެރެއަށް ނެގި ހުރަހަކުން އިމާމް އަޝޫރު ބޮލުން ޖެހި ލަނޑެކެވެ. މިއީ، މި ފަހަރުގެ ވޯލްޑް ކަޕްގައި އަޝޫރުގެ ދެ ވަަނަ ލަނޑުގެ އިތުރުން، މި ފަހަރުގެ ވޯލްޑް ކަޕްގައި ފެނިގެންދިޔަ 250 ވަނަަ ގޯލެެވެ.
ފުރަތަމަ ހާފުގައި ލީޑުގައި އޮވެ ނިންމާލި މިސްރަށް ދެ ވަަަނަ ހާފު ފަށައިގެން މާ ގިނައިރުތަކެއް ވަންދެން ލީޑުގައި އޮވެވޭ ގޮތެއްނުވި އެވެ. އެއީ، ދެ ވަނަ ހާފު ފަށައިގެން، 10 މިނިޓް ތެރޭ މުހައްމަދު ހާނީ އަތުން ބައިކޮޅަށް ވަން ގޯލުން އޮސްޓްރޭލިއާ އިން ނަތީޖާ ހަމަހަމަ ކުރި އެެވެ. މިއީ، އޮސްޓްރޭލިއާގެ ހިލޭޖެހުމެއް ހުއްޓުވަން އުޅުމުގެ ތެރޭގައި ބައިކޮޅަށް ވަން ގޯލެކެވެ.
އޭގެ ފަަހުން، ނަތީޖާ ނެރެން ދެ ވަނަ ހާފުގެ ބާކީ ބަޔާއި އިތުރު ވަގުތުގެ ދެ ހާފުގައި ދެ ޓީމުން ކުރެން އެއް ޓީމަކަށް ވެސް ލަނޑެއް ޖެހޭ ގޮތެއްނުވި އެވެ.
ނަތީޖާ ނެރެން ޕެނަލްޓީ ޖަހަން ޖެހުނުއިރު، އޮސްޓްރޭލިއާ އަށް ހަތަރު ޕެނަލްޓީގެ ތެރެއިން ވައްދާލެވުނީ ދެ ޕެނަލްޓީ އެވެ. ފުރަތަމަ ޕެނަލްޓީ އެ ޓީމުގެ ކެޕްޓަން، ހެރީ ސޯޓާ އަތުން ބޭކާރުވިއިރު، ހަަތަރު ވަނަ ޕެނަލްޓީ، ލޫކަސް ހެރިންޓަން ފޮނުވާލުމުން އަމާޒުވީ ހުރަސްދަނޑިއަށެވެ. އޮސްޓްރޭލިއާ އިން ޕެނަލްޓީ ކާމިޔާބުކުރީ، ޖެކްސަން އާވިން އާއި އަންވަރު މަބީލް އެވެ.
މިސްރުން މެޗުން މޮޅުވީ، ހަަތަރު ޕެނަލްޓީ ވެސް ވައްދާލައިގެންނެވެ. އެ ޓީމުން ޕެނަލްޓީތައް ޖެހީ، މަަހުމޫދު ސަބޭރު، ރަމީ ރާބިއާ، މުހައްމަދު ސަލާހު އަދި ހަސަން އަބްދެލްމަގީދު އެވެ.
މި ނަތީޖާއާ އެކު، މި ފަހަރުގެ ވޯލްޑް ކަޕުގައި ކުޅުނު އޭޝިއާގެ ހުރިހާ ޓީމެއް ކެޓީ އެވެ.
މި މޮޅާ އެކު، މިސްރުން ގަދަ 16 ބުރުގައި ކުޅޭނީ، ގަދަ 32 ޓީމުގެ ބުރުގައި އެންމެ ފަހުގެ ޗެމްޕިއަން، އާޖެންޓީނާ އާއި ކޭޕް ވާޑް ކުޅެގެން މޮޅުވާ ޓީމަކާ އެވެ.
