ލޮސް އެންޖެލްސް، ޔުނައިޓެޑް ސްޓޭޓްސް (ޖުލައި 3) - އޮސްޓްރިއާގެ މައްޗަށް 3-0 އިން ކުރިހޯދައި، ސްޕެއިނުން 16 އަަހަރު ތެރޭ ފީފާ ވޯލްޑް ކަޕްގެ ނޮކައުޓް ބުރުގައި ހޯދި ފުރަތަަމަ މޮޅާ އެކު، މި ފަހަރުގެ މުބާރާތުގެ ގަދަ 16 ބުރުން ޖާގަ ހޯދައިފި އެވެ.
ސްޕެއިނުން 2010 ވަނަ އަހަރު ފީފާ ވޯލްޑް ކަަޕްގެ ޗެމްޕިއަންކަން ހޯދި ފަހުން، މުބާރާތުގެ ނޮކައުޓް މެޗަކުން މޮޅެއް ނުވެ، ތިން ވޯލްޑް ކަޕް ނިންމާލަން ޖެހުނެވެ.
އެ ގޮތުން، 2014 ވަނަ އަހަރުގެ ވޯލްޑް ކަޕްގެ ގްރޫޕް ސްޓޭޖުން ކެޓިއިރު، 2018 ވަނަ އަހަރުގެ ނޮކައުޓް ފުރަތަމަ މެޗުން ވަނީ ޕެނަލްޓީ ޖަހައިގެން ރަޝިއާ އަތުން ބަލިވެފަ އެވެ. އަދި، މީގެ ހަތަރު އަހަރު ކުރިން، 2022 ވަނަ އަހަރުގެ ވޯލްޑް ކަޕްގެ ނޮކައުޓްގެ ފުރަތަމަ މެޗުން ސްޕެއިން ވަނީ މޮރޮކޯ އަތުން ޕެނަލްޓީ ޖަހައިގެން ކަޓައިފަ އެވެ.
ލޮސް އެންޖެލްސް ސްޓޭޑިއަމްގައި މިރޭ ކުޅުނު މެޗުގައި ސްޕެއިނުން ވަނީ ފުރަތަަމަ ހާފުގައި ކޮންްޓްރޯލް ނަަގައިފަ އެވެ. ސްޕެއިނަށް މެޗުގައި ލީޑުނަގައިދޭން މާކް ކުކުރޭއާ ޖެހި ގޯލެއް ވަނީ ޕައު ކުބަރްސީ ކުރި ފައުލަކާ ގުޅިގެން ބަލައިނުގަންނަން ނިންމައިފަ އެވެ.
މެޗުގެ 36 ވަަނަ މިނިޓްގައި، ސްޕެއިނުން ލީޑުނެގީ މިކޭލް އޮޔާޒަބާލް ޖެހި ގޯލުންނެވެ. މިއީ، ކުކުރޭއާ ދިން ބޯޅައަކުން އޮޔާޒަބާލް ޖެހި ގޯލެކެވެ. މިއީ، ސްޕެއިނުގެ ފުރަތަމަ އެގާރައިގައި ހިމެނިގެން ކުޅުނު 16 މެޗުން އޭނާ ޖެހި 16 ގޯލެވެ. ފުރަތަމަ ހާފު ނިމުމުގެ ކުރިން ސްޕެއިނުން ދެ ވަނަ ގޯލު ޖެހުމާ ފިޔަވަޅަކަށް ގާތަށް ޖެހިލި އެވެ. އެ ގޮތުން، އަލެކްސް ބައޭނާ ޖެހި ހިލޭ ޖެހުމެއް އަމާޒުވީ ހުރަސްދަނޑިއަށެވެ. އޭގެ ރީބައުންސުން ލަމީން ޔަމާލަށް ޖެހި ޝޮޓް އޮސްޓްރިއާގެ ކީޕަރު، އަލެންސަންޑަ ޝާލްގާ މަތަކޮށްފަ އެވެ.
ސްޕެއިނުން ދެ ވަނަ ހާފުގައި ވެސް ކުޅެން އަރައި އެޓޭކަށް ގިނަ ވަގުތު ބޯޅަ ގެންދިއުމުގެ ނަތީޖާ އަކަށްވީ 66 ވަނަ މިނިޓްގައި ބައޭނާ ނެގި ހުރަހަކުން ޕެޑްރޯ ޕޯރޯ، އޭރިއާތެރެއިން އަރައި ބޮލުން ގޯލަށް ފޮނުވާލުމެވެ.
އޭގެ ފަހުން، ޔަމާލް ގޯލަށް ފޮނުވާލަން ޖެހި ބޯޅަ އެއް ރޮނގުމަތިން ސަލާމަތްކުރީ އޮސްޓްރިއާގެ ކެޕްޓަން، ޑޭވިޑް އަލަބާ އެވެ. އޭގެ ފަހުން އޮޔާޒަބާލް ވަނީ އިތުރު ލަނޑެއް ޖަހައިފަ އެެވެ.
މިއީ، 72 އަހަރުގެ ތެރޭ އޮސްޓްރިއާ އިން ވޯލްޑް ކަޕް ނޮކައުޓް ބުރުގައި ކުޅުނު ފުރަތަމަ މެޗެވެ. އަނެއްކޮޅުން، ސްޕެއިނުން އޮސްޓްރިއާ ބަލިކޮށް، ގަދަ 16 ގައި ނުކުންނަން ޖެހޭނީ ޕޯޗުަގަލް އާއި ކްރޮއޭޝިއާ ކުޅެގެން މޮޅުވާ ޓީމަކާ އެވެ.
