ވެންކޫވާ، ކެނަޑާ (ޖުލައި 3) - އަލްޖީރިއާ އަތުން 2-0 އިން މޮޅުވެ، ސްވިޒަލެންޑުން ފީފާ ވޯލްޑް ކަޕް ފުޓްބޯޅަ މުބާރާތުގެ ގަދަ 16 ޓީމު ކުޅޭ ބުރުން ޖާގަ ހޯދައިފި އެވެ.
މިއީ، ފާއިތުވި 90 ވަރަކަށް އަހަރު ތެރޭ ސްވިޒަލެންޑުން ވޯލްޑް ކަޕްގެ ނޮކައުޓް މެޗަކުން މޮޅުވި ފުރަތަަމަ ފަހަރެވެ. އެ ޓީމުން އެންމެ ފަހުން ވޯލްޑް ކަޕްގެ ނޮކައުޓް މެޗަކުން މޮޅުވީ، 1938 ވަނަ އަހަރުގެ މުބާރާތުގަ އެވެ. މީގެ ކުރިން، އެންމެ ފަހުން، ވޯލްޑް ކަޕްގައި ކުޅުނު ތިން ފަހަރު ވެސް ނޮކައުޓް ފުރަަތަމަ މެޗުން ވަނީ ބަލިވެފަ އެވެ.
ސްވިޒަލެންޑުން ގަދަ 16 ބުރުގައި ކުޅެން ޖެހޭނީ، ގަދަ 32 ޓީމު ކުޅޭ ނޮކައުޓް ފުރަތަމަ މެޗުގައި ކޮލަމްބިއާ އާއި ގާނާ ކުޅޭ މެޗުން މޮޅުވާ ޓީމަކާ އެވެ.
ބީސީ ޕްލޭސް ވެންކޫވާ ސްޓޭޑިއަމްގައި ކުޅުނު މެޗު ފަށައިގެން އަލްޖީރިއާ އިން ވަނީ ސްވިޒަލެންޑްގެ ފަހަތަށް ޕްރެޝަރުކޮށްފަ އެވެ. އެކަމަކު، އެ ޓީމަށް ރަނގަޅަށް ހަމަލާތަކެއް ނުއުފެއްދިގެން އުޅެނިކޮށް ސްވިޒަލެންޑުން ވަނީ ލިބުނު ފުރުސަަތެއްގެ ބޭނުންހިފައި ލަނޑު ޖަހައި، ލީޑުނަގައިފަ އެވެ.
މެޗުގެ 10 ވަނަ މިނިޓްގައި، ސްވިޒަލެންޑްގެ ޖޯހަން މަންޒަމްބީ ދިން ބޯޅައަކުން މި ލަނޑު ޖެހީ ބްރީލް އެމްބޯލޯ އެވެ. އުމުރުން 20 އަހަރުގެ މަންޒަމްބީ އަރިމަތިން ބޯޅަ ހިފައިގެން އަރައި، ގޯލު ކުރިމަައްޗަށް ހުރަސްކޮށްލުމާ އެކު، ރަނގަޅު ތަނަށް އަރައި ހުރި އެމްބޯލޯ ވަނީ ގޯލުގެ ތެރެއަށް ފޮނުވާލައިފަ އެވެ.
ފުރަތަމަ ހާފުގެ ބާކީބައިގައި، ސްވިޒަލެންޑުން ދެ ވަނަ ލަނޑެއް ޖެހޭތޯ ބެލިއިރު، މަދުން ނަމަވެސް އަލްޖީރިއާ އިން ނަތީޖާ ހަމަަހަމަ ކުރެވޭތޯ އެޓޭކްތަކެއް ވަނީ ކޮށްފަ އެވެ. އެކަމަކަު، އޭގެއިން މަސައްކަތެއް ކާމިޔާބުނުވެދިޔައިރު، ދެ ވަނަ ހާފު ފެށުނުތަނާހެން ސްވިޒަލެންޑުން ދެ ވަނަ ލަނޑު ޖެހި އެވެ.
އެ ގޮތުން، ސްވިޒަލެންޑުގެ ދެ ވަނަ ލަނޑު، މެޗުގެ 46 ވަނަ މިނިޓްގައި ކާމިޔާބުކުރީ ޑޭން އެންޑޯއީ އެވެ. މިއީ، އަލްޖީރިއާގެ ޑިފެންސްތެރެއިން ދޫވި ބޯޅައެއް ހޯދައި، އެންޑޯއި ގޯލުގެ ތިރީ ކަނަށް ބޯޅަ ފޮނުވާލައިގެން ޖެހި ގޯލެކެވެ.
