އީރާނާއި އެމެރިކާއާ ދެމެދު ނުސީދާކޮށް ކުރިއަށްގެންދިޔަ މަޝްވަރާތަކުގެ ބުރެއް، މާބޮޑު ކުރިއެރުމެއް ނުލިބި ނިންމާލައިފި އެވެ. މި ބައްދަލުވުންތަކުގައި މައިގަނޑު ގޮތެއްގައި އަލިއަޅުވާލާފައިވަނީ މީގެ ދެ ހަފުތާ ކުރިން އިއުލާންކުރި ވަގުތީ އެއްބަސްވުމުގައި ހައްލުކުރެވިފައިވާ ކަމަށް ބުނި ކަންތައްތަކަށެވެ.
މި މަޝްވަރާތަކުގެ މައުލޫމާތު އެނގޭ މަސްދަރުތަކުން ބުނި ގޮތުގައި، ގަތަރުގެ ދޯހާގައި ދެ ދުވަހުގެ މުއްދަތަށް ކުރިއަށްދިޔަ މި ބައްދަލުވުންތަކުގައި ދެ ގައުމުގެ މަންދޫބުން ބަހުސްކުރެއްވީ ހޯރްމޫޒް ކަނޑުއޮޅީގެ ކަނޑުދަތުރުފަތުރާ ބެހޭގޮތުންނާއި، ކުރީގެ އެއްބަސްވުމުގެ ދަށުން ހިފަހައްޓާފައިވާ އީރާނުގެ ފައިސާ ދޫކޮށްލުމާ ބެހޭގޮތުންނެވެ. މިއީ ކުރީގެ އެއްބަސްވުމުގައި ހިމެނޭ އެންމެ މުހިންމު ދެ މައްސަލަ އެވެ.
ގަތަރުގެ ފޮރިން މިނިސްޓްރީން ބުނި ގޮތުގައި، ދެން އޮންނަ ބައްދަލުވުމެއް ބާއްވާނީ އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ ފަސްދާނުލުމުގެ ރަސްމިއްޔާތަށް ފަހުގަ އެވެ. ޖުލައި މަހުގެ ނުވަ ވަނަ ދުވަހު ޚާމަނާއީ ފަސްދާނުލުމަށް ވަނީ ހަމަޖެހިފަ އެވެ.
ދޯހާގައި ކުރިއަށްދިޔަ މަޝްވަރާތަކާ ގުޅޭ ގޮތުން ގަތަރުގެ ފޮރިން މިނިސްޓްރީގެ ތަރުޖަމާނު އެކްސްގައި ކުރެއްވި ޕޯސްޓެއްގައި ވިދާޅުވީ، ޖޫން މަހު ހަނގުރާމަ ހުއްޓާލުމަށް އެކުލަވާލި މެމޮރެންޑަމާ ގުޅޭ ކަންކަމުގައި "އެދެވޭ ކުރިއެރުންތަކެއް" ލިބިފައިވާ ކަމަށެވެ. އަދި މި މަޝްވަރާތަކަކީ ސްވިޒަލޭންޑުގައި ބޭއްވި ސަމިޓުން ނެރުނު ނަތީޖާތަކުގެ މައްޗަށް ބިނާކޮށް ކުރިއަށްގެންދިޔަ މަޝްވަރާތަކެއް ކަމަށް ވެސް އޭނާ ވިދާޅުވި އެވެ.
ވޮޝިންޓަނުގައި ހުންނަވައި އެމެރިކާގެ ރައީސް ޑޮނަލްޑް ޓްރަމްޕް ނޫސްވެރިންނަށް މައުލޫމާތު ދެއްވަމުން ވިދާޅުވީ، އީރާނުގެ ނިއުކްލިއާ ޕްރޮގްރާމް ހުއްޓުވުމަށް ކުރެވޭ މަސައްކަތްތަކަށް ކުރިއެރުން ލިބެމުންދާ ކަމަށެވެ. މިއީ ފެބްރުއަރީ މަހު އިޒްރޭލާ ގުޅިގެން އޭނާ ހަނގުރާމަ ފެށި މައިގަނޑު ސަބަބެވެ.
ނަމަވެސް، މަޝްވަރާތަކުގެ މައުލޫމާތު އެނގޭ މަސްދަރުތަކުން ބުނާ ގޮތުގައި، ފަންނީ ފެންވަރެއްގައި ކުރިއަށްދިޔަ މި ބައްދަލުވުންތަކުގައި ނިއުކްލިއާ ޕްރޮގްރާމާ ބެހޭ ގޮތުން އެއްވެސް ވާހަކައެއް ދެކެވިފައެއް ނުވެ އެވެ.
އެމެރިކާގެ ނައިބު ރައީސް ޖޭޑީ ވެންސް ވިދާޅުވީ، ނިއުކްލިއާ މައްސަލައާ މެދު ފަހުން މަޝްވަރާ ކުރެވޭނެ ކަމަށެވެ.
ގަތަރުގެ ފޮރިން މިނިސްޓްރީން ބުނި ގޮތުގައި، އެމެރިކާ އާއި އީރާނުގެ މަންދޫބުން ބައްދަލުވުންތައް ބޭއްވީ ވަކިވަކިން، ގަތަރާއި ޕާކިސްތާނުގެ މެދުވެރިން މެދުވެރިކޮށެވެ.
ވައިޓް ހައުސްއިން "މަތީ ފަންތީގެ" މަޝްވަރާތަކެއްގެ ގޮތުގައި ސިފަކުރި މި ބައްދަލުވުންތަކަށް ޓްރަމްޕްގެ ދަނބިދަރިފުޅު ޖެރެޑް ކުޝްނާ އާއި އެމެރިކާގެ މަންދޫބު ސްޓީވް ވިޓްކޮފް އެ ސަރަހައްދަށް ވަޑައިގެންނެވި ނަމަވެސް، އެ ބޭފުޅުން ބައްދަލުވުންތަކުގައި ބައިވެރިވެވަޑައިނުގަންނަވާ ކަމަށް މަސްދަރަކުން ބުންޏެވެ.
އީރާނުގެ ވަފުދުގެ އިސްވެރިޔާ، ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ވިދާޅުވީ މަޝްވަރާތައް މިހާރު ނިމިފައިވާ ކަމަށެވެ. ނަމަވެސް، ދެ ގައުމުގެ ދެމެދުގައި ހުރި ހިޔާލު ތަފާތުވުންތަކަށް އެއްވެސް ހައްލެއް ލިބުނު ކަމެއް ދެ ފަރާތުން ކުރެ އެއްވެސް ފަރާތަކުން ހާމަކޮށްފައެއް ނުވެ އެވެ.
