އެމެރިކާއަށް 250 އަހަރު ފުރުން ފާހަގަކުރުމުގެ ގޮތުން، ރައީސް ޑޮނަލްޑް ޓްރަމްޕްގެ ފޮޓޯ ހިމެނޭހެން ފަރުމާކޮށްފައިވާ ލިމިޓެޑް އެޑިޝަން އާ ޕާސްޕޯޓެއް ޓްރަމްޕްގެ ސަރުކާރުން ދައްކާލައިފި އެވެ.
ހުކުރު ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވަނީ ޕާސްޕޯޓުގެ އާ ސޮފްހާތަކުގެ ފޮޓޯއެއް ހިއްސާކުރައްވާފަ އެވެ. އެ ސޮފްހާތަކުން ފެންނަނީ އެމެރިކާގެ މިނިވަންކަމުގެ ބަޔާން (ޑެކްލަރޭޝަން އޮފް އިންޑިޕެންޑެންސް) ފަހަތުން ފެންނަ އިރު، "ރެޒޮލިއުޓް ޑެސްކް" ގައި ދެއަތް ބާއްވައިގެން ޓްރަމްޕް ހުންނަވާ ފޮޓޯއެކެވެ.
އެމެރިކާގެ ސްޓޭޓް ޑިޕާޓްމަންޓުން ބުނި ގޮތުގައި، މި ޕާސްޕޯޓުތައް ލިބެން ފަށާނީ ޖުލައި މަހުގެ ހަ ވަނަ ދުވަހުން ފެށިގެންނެވެ. އަދި މި ޕާސްޕޯޓު ދޫކުރާނީ ވަކި އަދަދަކަށް ކަމަށް ވެސް އެ އިދާރާއިން ބުންޏެވެ.
މިއީ ފެޑަރަލް އިމާރާތްތަކާއި، ވެބްސައިޓްތަކާއި އަދި ރަސްމީ ލިޔެކިޔުންތަކުގައި ރައީސް ޓްރަމްޕްގެ ނަމާއި ސޫރަ ހިމެނުމަށް ކުރައްވަމުން ގެންދަވާ މަސައްކަތްތަކުގެ ތެރެއިން އެންމެ ފަހުން ނިންމެވި ނިންމެވުމެވެ.
ވައިޓް ހައުސްއިން މި ޕާސްޕޯޓަށް ދީފައިވާ ނަމަކީ "ޕޭޓްރިއަޓް ޕާސްޕޯޓް" ނުވަތަ ގައުމީ ލޯބި ރަމްޒުކޮށްދޭ ޕާސްޕޯޓެވެ.
މި އާ ޕާސްޕޯޓު މިވަގުތު ލިބެނީ ވަރަށް މަދު ބަޔަކަށް ކަމަށާއި، މިއީ ހަމައެކަނި އެމެރިކާގެ ރައްޔިތުންނަށް ދޫކުރާ ލިޔުމެއް ކަމަށް ސްޓޭޓް ޑިޕާޓްމަންޓުން ބުނެ އެވެ.
ސްޓޭޓް ޑިޕާޓްމަންޓުން ބުނި ގޮތުގައި، މި ޕާސްޕޯޓު ހޯދުމަށް އޮންލައިންކޮށް ނުވަތަ މެއިލް މެދުވެރިކޮށް ހުށައެއް ނޭޅޭނެ އެވެ. މި ޕާސްޕޯޓު ބޭނުންވާ ފަރާތްތަކުން ވޮޝިންޓަން ޑީސީގައި ހުންނަ ޕާސްޕޯޓް އެޖެންސީއަށް އަމިއްލައަށް ހާޒިރުވެ، އެޕޮއިންޓްމަންޓެއް ހޯދަން ޖެހޭނެ އެވެ.
އެމެރިކާގައި މިހާރު ބޭނުންކުރާ ޕާސްޕޯޓުތަކުގައި ހިމެނެނީ ހަނދަށް އިންސާނުން ދިޔަ މަންޒަރާއި، "ސްޓެޗޫ އޮފް ލިބަޓީ" ފަދަ އެމެރިކާގެ ތާރީހާއި ގައުމީ ރަމްޒުތައް ދައްކުވައިދޭ މަންޒަރުތަކެވެ.
