ހޮނިހިރު ދުވަހު ހޮރްމޫޒް ކަނޑުއޮޅިން ދަތުރުކުރި ޕެނަމާގެ ދިދަ ނަގާފައިވާ އުޅަނދަކަށް ޑްރޯން ހަމަލާއެއް ދިނުމާ ގުޅިގެން، އެމެރިކާއިން އީރާނަށް އާ ހަމަލާތަކެއް ދީފި އެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނި ގޮތުގައި، އީރާނުގެ އެކި ސަރަހައްދުތަކަށް މި ހަމަލާތައް ދީފައިވަނީ ބައިނަލްއަގުވާމީ ވިޔަފާރި އުޅަނދުފަހަރަށް އަމާޒުކޮށް އީރާނުން "މެދުނުކެނޑި ދެމުންދާ ހަމަލާތަކަށް" ރައްދު ދިނުމުގެ ގޮތުންނެވެ.
މި ހަމަލާތަކުގެ ބަދަލުހިފުމުގެ ގޮތުން، ކުވެއިތާއި ބަހްރޭންގައި ހުރި އެމެރިކާގެ އިންފްރާސްޓްރަކްޗާތަކަށް މިސައިލާއި ޑްރޯން ހަމަލާ ދީފައިވާ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ދައުލަތުގެ މީޑިއާ މެދުވެރިކޮށް ނެރުނު ބަޔާނެއްގައި ބުނެފައިވެ އެވެ.
ދެ ގައުމުގެ ދެމެދުގައި ބަދަލުކުރެވުނު މި ހަމަލާތަކަށް ފަހު، އެމެރިކާ އާއި އީރާނުން ވެސް ވަނީ އެއް ގައުމުން އަނެއް ގައުމަށް ހަމަލާ ހުއްޓާލުމުގެ އެއްބަސްވުމާ ހިލާފުވެފައިވާ ކަމަށް ތުހުމަތުކޮށްފަ އެވެ.
ސެންޓްކޮމް އިން ނެރުނު ބަޔާނެއްގައި ބުނެފައިވަނީ، ހަމަލާ ހުއްޓާލުމުގެ އެއްބަސްވުމަށް އިހުތިރާމް ކުރުމުގެ ފުރުސަތު އީރާނަށް ދެވުނު ކަމަށެވެ.
އައިއާރުޖީސީގެ ބަޔާނުގައި ބުނެފައިވަނީ، އީރާނުގެ އައްސޭރިފަށުގައި ހުރި ފަސް މަރުކަޒަކަށް އެމެރިކާއިން ހަމަލާދީފައިވަނީ "ގަވާއިދާ ހިލާފުވި އުޅަނދަކަށް އައިއާރުޖީސީގެ ކަނޑުގެ ސިފައިން ހުރަސްއެޅި ކަމަށް ބުނެ ދެއްކި ބަހަނާއެއްގެ ދަށުން" ކަމަށެވެ.
މީގެ އިތުރުން، އައިއާރުޖީސީން ބުނީ ބަދަލުހިފުމުގެ ގޮތުން ކުވެއިތުގައި ހުންނަ އަލީ އަލް-ސާލިމް ބޭސް އަދި ބަހްރޭންގެ ޕޯޓް ސަލްމާންގައި އޮންނަ އެމެރިކާގެ ފަސްވަނަ ފްލީޓްގެ އަށް މަރުކަޒަކަށް ބެލިސްޓިކް މިސައިލާއި ޑްރޯން ހަމަލާދީ އެ ތަންތަން "ސުންނާފަތިކޮށްލާފައިވާ" ކަމަށެވެ.
