ރައީސް މުހައްމަދު މުއިއްޒު އަތޮޅުތަކަށް ކުރެއްވި ރަސްމީ ދަތުރުތަކަށް ފާއިތުވި ދެ އަހަރުގެ ތެރޭގައި ގާތްގަނޑަކަށް 14 މިލިއަން ރުފިޔާ ހަރަދުވެފައިވާ ކަމަށް ރައީސް އޮފީހުން ބުނެފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަދަދު ނޫހުން ފޮނުވި ސުވާލުތަކަށް ޖަވާބު ދިނުމަށް ގާނޫނުގައި ބަޔާންކުރާ މުއްދަތު ފަހަނަ އަޅައި ދިޔަތާ އެތައް މަހެއް ފަހުން، ދިން ޖަވާބުގައި ރައީސް އޮފީހުން ބުނެފައި ވަނީ 2024 އިން ފެށިގެން 2026 ގެ ޖެނުއަރީގެ ނިޔަލަށް ކުރެއްވި ދަތުރުތަކަށް ޖުމުލަ 13.93 މިލިއަން ރުފިޔާހަރަދުވެފައިވާ ކަމަށެވެ.
އަހަރުތަކަށް ބަހާލުމުން ހަރަދުތައް ހުރިގޮތް:
- 2024 ވަނަ އަހަރު (9 ދަތުރު): ޖުމުލަ 4.06 މިލިއަން ރުފިޔާ
- 2025 ވަނަ އަހަރު (23 ދަތުރު): ޖުމުލަ 9.87 މިލިއަން ރުފިޔާ
- 2026 ވަނަ އަހަރު (1 ދަތުރު): ޖުމުލަ 773.24 ރ.
ރިޔާސީ އިންތިހާބަށްފަހު މުއިއްޒު އެންމެ ފުރަތަމަ ވަޑައިގަތީ އެމަނިކުފާނަށް އިންތިހާބުގައި އެންމެ ބޮޑު އަޣުލަބިއްޔަތެއް ލިބިވަޑައިގަތް ތ. ގުރައިދޫ ހިމެނޭހެން އެ އަތޮޅުގެ ބައެއް ރަށްތަކަށެވެ. ރައްޔިތުންގެ މަޖިލީހުގެ އިންތިހާބު ބޯމަތިވެފައި އޮއްވައި، 2024 ވަނަ އަހަރުގެ ފެބްރުއަރީ 6 އިން 8 އަށް ކުރެއްވި އެ ދަތުރަށް އެކަނިވެސް 422,090.44 ހަރަދުވި އެވެ.
އޭގެ ފަހުން ހަމަ އެ މަހުގެ 18 އިން 21 އަށް ދެކުނުގެ ތިން އަތޮޅަށް ކުރެއްވި ދަތުރަށް 1.31 މިލިއަން ރުފިޔާ ހަރަދުވެފައިވެ އެވެ. 2024 ވަނަ އަހަރު ކުރެއްވި 9 ދަތުރުގެ ޖުމުލަ ހަރަދަކީ 4.06 މިލިއަން ރުފިޔާ އެވެ.
ރައީސް އޮފީހުން ބުނި ގޮތުގައި 2025 ވަނަ އަހަރަކީ ރައީސް އެންމެ ގިނައިން އަތޮޅުތެރެއަށް ދަތުރުކުރެއްވި އަހަރެވެ. އެ އަހަރު ކުރެއްވި 23 ދަތުރަށް 9.87 މިލިއަނަށްވުރެ ގިނަ ރުފިޔާ ހޭދަވި އެވެ.
މިއަހަރު ނ. އަތޮޅަށް ކުރެއްވި ދަތުރުގެ ހަރަދުގެ ގޮތުން ކޮށްފައިވަނީ އެންމެ 773.24ރ. އެވެ. 2025 ވަނަ އަހަރު ކުރެއްވި ބައެއް ދަތުރުތަކަށްވެސް ހިނގާފައިވަނީ ހައިރާންވާފަދަ ކުދި އަދަދުތަކެކެވެ. މިދިޔަ އަހަރު ޖެނުއަރީގައި ކ. ގުޅިއަށް ކުރެއްވި ދަތުރުގެ ހަރަދަށް 2،500ރ. ހަރަދު ވެފައިވާ ކަމަށް ބުނެފައި ވާއިރު، ނޮވެމްބަރު މަހު ރ. ދުވާފަހަރަށް ކުރެއްވި ދަތުރަށް 1282.93ރ. ހަރަދުވެފައިވެ އެވެ. އަދިި ހަމަ އެމަހު ހަނިމާދޫ އަށް ކުރެއްވި ދަތުރަށް ހަރަދުވީ ކަމަށް ރައީސް އޮފީހުން ބުނެފައި ވަނީ އެންމެ 1600ރ. އެވެ.
ރައީސް މުއިއްޒުގެ ދަތުރުތަކުގައި މިނިސްޓްރީތަކުގެ ވަފުދުތަކާއި، ސަރުކާރު ހިއްސާވާ ކުންފުނިތަކުގެ އިސްވެރިންނާއި ބައެއް މުވައްޒަފުން ބައިވެރިވެފައިވާއިރު، ފުލުހުންގެ ވެރިން ވެސް ބައެއް ދަތުރުތަކުގައި ބައިވެރިވެފައިވެއެވެ.
މި ހަރަދުތަކުގެ އިތުރުން ރައީސްގެ ސަލާމަތާއި ރައްކާތެރިކަމަށް އެމްއެންޑީއެފުން ކުރި ހަރަދު ހިމަނައިގެން ހިސާބުކޮށްފި ނަމަ، ރައީސްގެ ދަތުރުތަކާ ގުޅިގެން ދައުލަތުގެ ބަޖެޓުން ކުރި ހަރަދު 14 މިލިއަން ރުފިޔާއަށް ވުރެ ވެސް ގިނަ ވާނެ އެވެ.
