ބޮސްޓަން، ޔުނައިޓެޑް ސްޓޭޓްސް (ޖޫން 30) - ފީފާ ވޯލްްޑް ކަޕް ފުޓްބޯޅަ މުބާރާތުގެ ގަދަ 32 ޓީމު ކުޅޭ ބުރުން ޖަރުމަނު ކެޓި ކަމުގައި ވިޔަސް، އެ ޓީމުގެ ކޯޗުގެ މަގާމުން އިސްތިއުފާ ދިނުމުގެ އެއްވެސް ވިސްނުމެއް ނެތް ކަމަށް ހޫލިއަން ނާގަލްސްމަން ބުނެފި އެވެ.
ޕެރަގުއޭއާ ދެކޮޅަށް ރޭ ކުޅުނު މެޗުގެ 90 މިނިޓް ހަމަވިއިރު، 1-1 އިން އެއްވަރުވެފައި އޮތް މެޗު އިތުރު ވަގުތުގެ ދެ ހާފަށް ގޮސް ނިމުނުއިރު ވެސް އެ ނަތީޖާ އަށް ބަދަލެއް ނާދެ އެވެ. އިތުރު ވަގުތުގެ ފުރަތަމަ ހާފުގައި ޖަރުމަނުގެ ޑިފެންޑަރު، ޖޮނަތަން ޓާ ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިނުގަންނަން ނިންމި އެވެ. އަދި، މެޗުގެ ނަތީޖާ ޕެނަލްޓީ ޖަހައިގެން ނެރެން ޖެހުނުއިރު، ޓާ އަތުން ޕެނަލްޓީ ނާކާމިޔާބުވި އެވެ. ޕެނަލްޓީގައި ޖަރުމަނު ބަލިވީ 4-3 އިންނެވެ.
އެންމެ ފަހުން ދެ ވޯލްޑް ކަޕްގެ ގްރޫޕް ސްޓޭޖުން ކެޓި ޖަރުމަނު މި ފަހަރުގެ ވޯލްޑް ކަޕްގެ ނޮކައުޓް ފުރަތަމަ މެޗުން ބަލިވެ، މުބާރާތުން ކަޓައި، އަނެއްކާ ވެސް ބައިނަލްއަގުވާމީ ފުޓްބޯޅައިގައި ދަށް މުބާރާތަކާ ކުރިމަތިލާން ޖެހުނީ އެވެ.
"އަހަރެން މި ހުރީ މި ޓީމުގައި. ޖަރުމަނު ފުޓްބޯޅަ ފެޑެރޭޝަން ބޭނުމިއްޔާ އަހަރެން 2028 ނިމެންދެން ހުންނާނެ. އެކަމަކު، އެ މީހުން އަހަރެން ދާން އެދެންޏާ، އެ ގޮތަށް ވެސް މިހުރީ ތައްޔާރަށް،" ރޭގެ މެޗަށް ފަހު ނާގަލްސްމަން ބުންޏެވެ.
"އަހަންނަކީ ޒިންމާތަކުން ރެކިގެން ދުވެ ފިލާނެ މީހެއް ނޫން. އަދިވެސް މި ބުނަނީ، ފެޑެރޭޝަނުން ބޭނުމިއްޔާ އަހަރެން ހުންނާނަން. އެ މީހުން އަހަރެން ހުންނަން ބޭނުމެއް ނެތިއްޔާ، އެ ވާހަކަ އަހަރެން ގާތުގައި ބުނަންޖެހޭ. އަހަރެން މި ހުރީ މަގާމުގައި ކުރިއަށްދާ ގޮތަށް،"
އޭނާ ބުނީ، ފުޓްބޯޅައިގައި ހުރިހާ ކަމަކީ އަމިއްލަ އަތުގައި ކޮންޓްރޯލް އޮންނާނެ ކަންކަމެއް ނޫން ކަމަށެެވެ. އެ ގޮތުން، ޖަރުމަނު ފުޓްބޯޅަ ފެޑެރޭަޝަނުން އަަވަހަށް ކަންކަން އޮތްގޮތް އޭނާ ގާތުގައި ބުނެދޭން ޖެހޭ ކަމަށް ނާގަލްސްމަން ވަނީ ބުނެފަ އެވެ.
"އަހަރެން ބަހައްޓަންޏާ، މިހާރުން ފެށިގެން މަސައްކަތް ފަށާނަން. ނޭޝަންސް ލީގާއި 2028 ގެ ޔޫރޯ އަށް،" ނާގަލްސްމަން ބުންޏެވެ.
ނާގަލްސްމަން އަށް އެންމެ ބޮޑު ފާޑުކިޔުމެއް އަމާޒުވަމުން އަންނަ އެއް ސަބަބަކީ، ރޭގެ މެޗަށް ފަހު، ޖަރުމަނުގެ ކެޕްޓަން، ޔޯސުއާ ކިމިކް ދިން އިންޓަވިއުއެއްގައި މުބާެރާތުަގައި ޖަރުމަނު ކުޅުނު އެއްވެސް މެޗެއްގައި އެ ޓީމުގެ އަސްލު ފެންވަރުގައި ކުޅެން ޖެހޭ ގޮތަށް ނުކުޅެވޭ ކަމަށް ބުނެފައިވުމުންނެވެ.
ޖަރުމަނުން މި ފަހަރުގެ ވޯލްޑް ކަޕް ފެށި މެޗުން އަލަށް ވޯލްޑް ކަޕްގައި ކުޅުނު ކިއުުރުސާއޯ އަތުން 7-1 އިން މޮޅުވިއިރު، ދެ ވަނަ މެޗުގައި ފަހަތުން އަރައި 2-1 އިން އައިވަރީ ކޯސްޓް އަތުން މޮޅުވި އެވެ. އެކަމަކު، ގްރޫޕްގެ ފަހު މެޗުން 2-1 އިން އެކުއެޑޯ އަތްދަށުވެ، ނޮކައުޓް ބުރު ފަށަން ޖެހުނީ އެންމެ ބޭނުންވި ފޯމުގައެއް ނޫނެވެ. އެންމެ ފަހުން، ދެ ވޯލްޑް ކަޕްގައި، 2018 އާއި 2022 ގައި ގްރޫޕް ސްޓޭޖުން ކެޓި ޖަރުމަނުން މި ފަަހަރުގެ މުބާރާތުގައި މި ކެޓީ ނޮކައުޓް ފުރަތަމަ ބުރުގަ އެވެ. އެއީ، އެ ގައުމުގެ ފުޓްބޯޅަ ތާރީހުގައި ފުރަތަމަ ފަހަރަށް ވޯލްޑް ކަޕްގައި ޕެނަލްޓީ ޝޫޓައުޓެއްގައި ބަލިވެގެންނެވެ.
