ލޮސް އެންޖެލްސް، ޔުނައިޓެޑް ސްޓޭޓްސް (ޖޫން 30) - މި ފަހަރުގެ ފީފާ ވޯލްޑް ކަަޕްގެ ގްރޫޕް ޖޭގައީ އަލްޖީރިއާ އާއި އޮސްޓްރިއާ އިން ބައްދަލުކުރި މެޗުގައި، ގަސްދުގައި ފަސޭހަ ނޮކައުޓް ބްރެކެޓަކަށް ދިއުމަށްޓަކައި، ދެ ޓީމުން ރާވައިގެން މެޗު ފިކްސް ކުރިކަމަށް ކުރެވޭ ތުހުމަތައް ބޮޑުވި ނަމަވެސް އެ މެޗުގެ މައްސަލަ ތަހުގީގު ކުރެވޭނެ ޖާގައެއް ނެތް ކަމަށް ފީފާ އިން ކަނޑައަޅައިފި އެވެ.
އަލްޖީރިއާ އިން އިތުރު ވަގުތުގެ ތެރޭގައި ލީޑުނެގި މެޗުގައި، އޮސްޓްރިއާ އިން ފަހު ވަގުތު ލަނޑު ޖަހައި 3-3 އިން އެއްވަަރުކުރި އެވެ. މި ނަތީޖާއާ އެކު މި ދެ ޓީމަށް ވެސް ނޮކައުޓް ބުރުން ޖާގަ ލިބި ފަސޭހަ ބްރެކެޓަކަށް ވަނީ ގޮސްފަ އެވެ. މި ނަތީޖާ އަކީ، އިރާނަށް މުބާރާތުގައި ކުރިއަށްދިއުމަށް އޮތް ފުރުސަތު އެއްކޮށް ބަންދުވާ ސްކޯއެއް ކަމަށްވާއިރު، މިއީ، ގަސްދުގައި ރާވަައިގެން، އިރާން ކަޓުވާލަށް ކުރި ކަމެއްގެ ތުހުމަތު ވެސް ވަނީ އަމާޒުވެފަ އެެވެ.
އަލްޖީރިއާ އާއި އޮސްޓްރިއާ ކުޅުނު މެޗުގެ އިތުރު ވަގުުތު ފެށުނުތަނާ އަލްޖީިރިއާ އިން ލަނޑު ޖެހުމުން، އޮސްޓްރިއާ ކުޅުންތެރިން، އަލްޖީރިއާ ބެންޗަށް ބަލައި، ހިތްހަމަނުޖެހުން ފާޅުކުރިތަން ފެނުނެވެ. އަދި، އޭގެ ފަހުން، އޮސްޓްރިއާ އިން ކުރި އެޓޭކުގައި ގޮސް އެ ޓީމުން އެއްވަރުކުރި ލަނޑު ޖެހީ އިތުރު ވަގުތުގެ ހަ ވަނަ މިނިޓްގަ އެވެ.
އެ މެޗަށް ފަހު، ދެ ޓީމުގެ ކޯޗުންނާ ވެސް ވަނީ މެޗުގެ ނަތީޖާ އަކީ ރޭވިގެން އައި ކަމެއްތޯ ސުވާލުކޮށްފަ އެވެ. އޮސްޓްރިއާގެ ކޯޗު، ރަލްފް ރަންގްނިކް ބުނެފައިވަނީ، ރޭވިގެން ކުރާ ކަމެއްގައި ފަހު ވަގުތު އެ ފެނުނު ޖަޒުބާތީ ކަންތައްތަކެއް ނުފެންނާނެ ކަމަށެވެ. އަދި، ދެ ޓީމަށް ރަނގަޅުވާ ގޮތަކަށް މެޗެއްގެ ނަތީޖާ ނުކުތުމުން، ތަފާތު އެކި ކަހަލަ ވާހަކަތައް ދެކެވޭނެ ކަމަށާއި، އެއީ ހިނގާނެ ކަންކަން ކަމުގައި ރަންގްނިކް ވަނީ ބުނެފަ އެވެ.
ނޮކައުޓް ބުރުގައި އޮސްޓްރިއާ އިން ސްޕެއިނާ ކުޅެން ޖެހޭއިރު، އަލްޖީރިއާ އިން ކުޅޭނީ ސްވިޒަލެންޑާ އެެވެ.
