ކުރިއަށް އޮތް 20 އަހަރުގެ ތެރޭ ރަސްމާލޭގައި ދެ ލައްކަ މީހުން އާބާދުކުރުމުގެ އަމާޒުގައި އެ ރަށުގެ މާސްޓާޕްލޭން ތައްޔާރުކޮށްދޭނެ ބަޔަކު ހޯދުމަށް ކޮންސްޓްރަކްޝަން މިނިސްޓްރީން މިއަދު އިއުލާންކޮށްފި އެވެ.
ރަސްމާލެ ހިއްކުމުގެ މަޝްރޫއު ފެށީ ޑިސެމްބަރު 18، 2023، ގަ އެވެ. ސަރުކާރުން ބުނީ ފުށިދިއްގަރު ފަޅުން 1،153 ހެކްޓަރުގެ ބިން ހިއްކާނެ ކަމަށެވެ. ނަމަވެސް ކޮންސަލްޓަންޓުން ހޯދުމަށް ކުރި އިއުލާނުގައި ހިމަނާފައިވާ ޓީއޯއާރުގައި ވާ ގޮތުން އެ ރަށަކީ 1،010 ހެކްޓަރުގެ ރަށެކެވެ.
އެ ޕްރޮޖެކްޓުގެ މައިގަނޑު އަމާޒަކީ ކުރިއަށް އޮތް 20 އަހަރުގެ ތެރޭގައި ދެ ލައްކަ މީހުންނަށް ރަސްމާލޭގައި ދިރިއުޅެވޭނެ ގޮތް ހެދުން ކަމަށް ބުނެފައިވެ އެވެ. އޭގެ އިތުރުން، ރަސްމާލޭގެ ކަރަންޓު ގްރިޑަކީ މައިގަނޑު ގޮތެއްގައި އިއާދަކުރަނިވި ހަކަތައިން އޮޕަރޭޓުކުރާ ގްރިޑަކަށް ވާން ޖެހެ އެވެ.
ހަމައެހެންމެ، ރަސްމާލޭގެ އެތެރޭގެ ދަތުރުފަތުރުގެ ނިޒާމަކީ ކާބަން-ނިއުޓްރަލް ނިޒާމަކަށް ހެދުމަކީ ވެސް ސަރުކާރުގެ އަމާޒެކެވެ. މޫސުމީ ބަދަލުތަކުންނާއި ކާރިސާތަކުން ކުރިމަތިވާ ގޮންޖެހުންތަކުން އަރައިގަތުމުގެ ގާބިލުކަން އިތުރުކޮށް، ދިގު މުއްދަތަކަށް ދިރިއުޅެވޭނެ ރައްކާތެރި ރަށެއްގެ ގޮތުގައި ރަސްމާލެ ތަރައްގީކުރަން މާސްޓަޕްލޭންގައި ހިމަނަން ޖެހެ އެވެ.
އެ މިނިސްޓްރީން ބީލަމަށް ކުރިމަތިލުމަށް ދީފައިވާ ސުންގަޑިއަކީ ޖުލައި 13، ގެ ހެނދުނު 10:00 އެވެ. އެ މަސައްކަތް ކުރަން ހޮވަން ހަމަޖެހިފައިވަނީ ދިވެހި ކުންފުންޏެކެވެ.
އެ މަސައްކަތުގެ ދަށުން ރަސްމާލޭގެ ލޭންޑް ޔޫސް ޕްލޭން ވެސް ތައްޔާރުކުރަން ޖެހެ އެވެ. އެ ޕްލޭންގައި ރެޒިޑެންޝަލް، ކޮމާޝަލް، ސިވިކް، އިންޑަސްޓްރިއަލް، ކަލްޗަރަލް އަދި ރެކްރިއޭޝަނަލް ޒޯނުތައް ހިމަނަން ޖެހެ އެވެ. އަދި ޒޯނިން ގަވާއިދުތައް ހެދުމާއި، އިމާރާތްތަކުގެ އުސްމިނާއި ސަބްޑިވިޝަން ސްޓޭންޑާޑްތައް ކަނޑައެޅުމަކީ ވެސް ކޮންސަލްޓަންސީ ދޭ ބަޔަކު ކުރަން ޖެހޭ މަސައްކަތެކެވެ.
މަސައްކަތުގެ ޓައިމްލައިންގައި ވާ ގޮތުން ދެ ހަފްތާ އާއި ތިން ހަފްތާގެ މުއްދަތުގެ ތެރޭ ލޭންޑް ޔޫސް ޕްލޭނާއި ޑްރާފްޓް މާސްޓާޕްލޭން ހުށަހަޅަން ޖެހެ އެވެ. އަދި މަސައްކަތް ހަވާލުކުރާތާ ހަ ހަފްތާ އާއި އަށް ހަފްތާގެ ތެރޭގައި ފައިނަލް މާސްޓަޕްލޭން ހުށަހަޅަން ޖެހެ އެވެ.
އަށް މަސްދުވަހުގެ ތެރޭގައި ހިއްކައި ނިންމާނެ ކަމަށް ވައުދުވެގެން މީގެ ދެ އަހަރާއި ހަ މަސްދުވަސް ކުރިން ފެށި މަޝްރޫއު ނިންމަން ރައީސް މުހައްމަދު މުއިއްޒު އިއްޔެ ފަސްވަނަ ތާރީހެއް ދެއްވި އެވެ. އެއީ މި އަހަރުގެ ނިޔަލަށެވެ.
