ލޮސް އެންޖެލްސް، ޔުނައިޓެޑް ސްޓޭޓްސް (ޖޫން 29) - އިތުރު ވަގުތުގެ ތެރޭގައި ސްޓެފަން އިސްޓަކިއޯ ޖެހި ގޯލުން 1-0 އިން ދެކުނު އެފްރިކާ ބަލިކޮށް، ކެނަޑާ އިން ފީފާ ވޯލްޑް ކަޕް ފުޓްބޯޅަ މުބާާރާތުގެ ގަދަ 16 ޓީމުގެ ބުރުން ޖާގަ ހޯދައިފި އެވެ.
މި ފަހަރުގެ ވޯލްޑް ކަޕާ ކުރިމަތިލިއިރު، ދެ ވޯލްޑް ކަޕްގައި ކުޅެ، ވޯލްޑް ކަޕެއްގައި ޕޮއިންޓެއް ވެސް ލިބިފައިނެތް، ކެނަޑާ އިން ނޮކައުޓް ބުރަށް ދަތުރުކުރީ ގްރޫޕްގެ ދެ ވަނަ ޓީމުގެ ގޮތުގަ އެވެ. އެހެންވެ، އެ ގައުމު ވެސް ގުޅިގެން، ތިން ގައުމުގެ މެދުގައި، ހޯސްޓްކުރާ މި ފަހަރުގެ ވޯލްޑް ކަޕްގައި އެ ޓީމުން ގަދަ 32 ޓީމުގެ ބުރުގައި ދެކުނު އެފްރިކާއާ ދެކޮޅަށް ކުޅުނު މެޗު ކުޅެން ޖެހުނީ، އެމެރިކާގަ އެވެ. މިއީ، ވޯލްޑް ކަޕްގެ ހޯސްޓެއް ގައުމުން ބޭރުގައި ކުޅެން ޖެހުނު ފުރަތަމަ މެޗެެވެ.
ކެނަޑާ އިން މި ފަހަރުގެ ވޯލްޑް ކަޕް ފެށި މެޗުގައި ބޮސްނިއާއާ 1-1 އިން އެއްވަރުކުރިިއިރު މިއީ، ވޯލްޑް ކަޕްގައި ލިބުނު ފުރަތަމަ ޕޮއިންޓެވެ. ދެ ވަނަ މެޗުގައި 6-0 އިން ގަތަރު ބަލިކޮށް، ކެނަޑާގެ ތާރީހުގައި ވޯލްޑް ކަޕްގައި ފުރަތަމަ މޮޅު ހޯދި އެެވެ. އެކަަމަކު، ގްރޫޕްގެ ފަހު މެޗުން ސްވިޒަލެންޑް އަތުން 2-1 އިން ބަލިވެ، ކެނަޑާ އަށް އަމިއްލަ ގައުމުގައި ނޮކައުޓް މެޗު ކުޅުމުގެ ފުުރުސަތު ގެއްލުނީ ގްރޫޕްގެ ދެ ވަނަ އަށް ދިއުމުންނެެވެ.
ދެކުނު އެފްެރިކާއާ ދެކޮޅަށް މިރޭ ކެނަޑާ އިން ކުޅުނު މެޗުގެ 90 މިނިޓާ ހަމައަށް ގޯލެއް ނުފެނި އޮތްއިރު، ކެނަޑާގެ ހަމައެކަނި ލަނޑު ޖެހީ އިސްޓަކިއޯ އެވެ. އޭރިއާ ރޮނގުކައިރިން ލިބުނު ފުރުސަތެއްގައި އިސްޓަކިއޯ ޖެހި ބޯޅަ އަމާޒުވީ ގޯލުގެ ތިރީ ކަަނަށެވެ.
މި މެޗު ފެށިއިރު، ޓީމުގެ ކެޕްޓަން ބޭންޑް އަޅައިގެން ކުޅެމުންދިޔައީ އިސްޓަކިއޯ އެވެ. އެކަމަކު، ދެ ވަނަ ހާފުގައި އަލްފަންސޯ ޑޭވިސް ކުޅެން އެރުމާ އެކު، އޭނާއާ ކެޕްޓަން ބޭންޑް ހަވާލުކުރީ އެވެ. މިއީ، ކެނަޑާގެ ކެޕްޓަން، ޑޭވިސް އަނިޔާ އިން ރިކަވާވެ، މި ފަހަރުގެ ވޯލްޑް ކަޕްގައި ކުޅުނު ފުރަތަމަ މެޗެވެ.
އަނެއްކޮޅުން، މިއީ، ކެނަޑާ އެކޭ އެއްގޮތަށް ދެކުނު އެފްރިކާ އިން ވެސް ވޯލްޑް ކަޕްގެ ނޮކައުޓް ބުރެއްގައި ކުޅުނު ފުރަތަމަ މެޗެވެ. އެ ޓީމުން މެޗުގެ ބޮޑުބައިގައި ކެނަޑާ ހުއްޓުވައި، ރަނގަޅު އެޓޭކްތަކެއް ކުރުމަށް ކުރިއަށް ޖެހިގެން ވެސް މަސައްކަތްކުރި އެވެ. އެކަމަކު، މެޗުގެ ފަހު ވަގުތު ކޮޅުގައި ފަހަތުން ހެދުނު ގޯހަކާ އެކު މެޗު ގެއްލި، މުބާރާތުން ވަކިވާން ޖެހުނީ އެވެ.
ކެނަޑާ އަށް މެޗުގައި ކުރިން ލަނޑު ޖަހަން ލިބުނު ފުރުސަތުތަކަށް ބަލާއިރު، އެ ޓީމުގެ ފޯވާޑް، ޓަނީ އޮލުވަސޭއި ޖެހި ޝޮޓެއް ދެކުނު އެފްރިކާގެ ކީޕަރު، ރޮންވެން ވިލިއަމްސް މަތަކުރި އެވެ. އަދި، ކެނަޑާގެ ޕްރޮމިސް ޑޭވިޑް ޖެހި ޝޮޓެއް ވަނީ ދަނޑިކައިރިން ގޮސްފަ އެވެ.
ދެކުނު އެފްރިކާ ކޮޅަށް ކެނަޑާ އިން ލަނޑު ޖެހީ، އިތުރު ވަގުތުގެ ފަސް މިނިޓް ތެރޭ ފަހަތަށް ޖެހިގެން، އެއްވަރުކޮށް އިތުރު ވަގުތުގެ ދެ ހާފަށް މެޗު ގެންދަން ބޭނުންވާ ގޮތަށް ކުޅެމުން ދަނިކޮށެވެ. އިތުރު ވަގުތުގެ ދެ ހާފަށް ނުގޮސް ކެނަޑާ އަށް މި މެޗުން މޮޅެއް ހޯދައިދިން ގޯލު އިސްޓަކިއޯ ޖެހިއިރު، މިއީ، ފާއިތުވި ދެ އަހަރެއްހާ ދުވަސްތެރޭ ގައުމީ ޓީމަށް އޭނާ ޖަހައިދިން ފުރަތަމަ ގޯލެވެ.
ދެކުނު އެފްރިކާ މި ފަހަރުގެ ވޯލްޑް ކަޕްގައި ބަލިވީ މުބާރާތް ބާއްވާ ތިން ގައުމުގެ ތެރެއިން ދެ ގައުމު އަތަުންނެވެ. އެއީ، މުބާރާތް ފެށި މެޗުގައި މެކްސިކޯ އަތުން 2-0 އިންނާއި ގަދަ 32 ޓީމުގެ ބުރުގައި ކެނަޑާ އަތުންނެވެ.
ކެނަޑާ އިން ގަދަ 16 ބުރުގައި ވާދަކުރާނީ، މޮޮރޮކޯ އާއި ނެދަލެންޑްސް ކުޅޭ މެޗުން މޮޅުވާ ޓީމަކާ އެވެ.
