ދައުލަތުގެ ޑޭޓާ އާއި ރައްޔިތުންގެ ޒާތީ މައުލޫމާތު ބެލެހެއްޓުމަށް ބޮޑެތި ގާނޫނީ ބާރުތަކެއް ހޯމް މިނިސްޓްރީގެ ދަށުން ހިންގާ "މޯލްޑިވްސް ޑިޖިޓަލް ސާވިސް" އަށް ދިނުމަށް ހުށަހަޅާފައިވާ "މޯލްޑިވްސް 2.0 ޑިޖިޓަލް ޓްރާންސްފޮމޭޝަންގެ ބިލު" ގެ ބޭނުމަކީ ރާއްޖޭގެ ވޯޓިން ނިޒާމު އިލެކްޓްރޯނިކް ވޯޓިން (އީ-ވޯޓިން) ނިޒާމަކަށް ބަދަލުކުރުން ކަމަށް ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) ވިދާޅުވެއްޖެ އެވެ.
ގައްދޫ ދާއިރާގެ މެންބަރު މުހައްމަދު އަލީ ހުށަހެޅުއްވި އެ ބިލާއެކު ހޯމް މިނިސްޓްރީގެ ދަށުން ހިންގާ "މޯލްޑިވްސް ޑިޖިޓަލް ސާވިސް" ވެގެންދާނީ ރާއްޖޭގައި އުފެދޭ އެންމެ ބާރުގަދަ އެއް މުއައްސަސާއަށެވެ. އެ ބިލުގެ އިބްތިދާއީ ބަހުސްގައި ވާހަކަ ދައްކަވަމުން ގަޕޯ ވަނީ ބިލާ މެދު ކަންބޮޑުވުން ފާޅުކުރައްވާފަ އެވެ.
"2028 ގައި އޮންނަ ރިޔާސީ އިންތިހާބުގައި އީ-ވޯޓިންއަށް ދިޔުމަށް ހުށަހެޅިފައި އޮތް ބިލެއް ނޫން އެހެން ގޮތެއް މީގެއިން ފެނިގެން ނުދާނެ، އެކަން ކުރުމަށްޓަކައި މި ތައްޔާރުވަނީ،" ސަރުކާރުގެ ނިޔަތާ މެދު ސުވާލު އުފައްދަމުން މަޖިލީހުގެ އެންމެ ތަޖުރިބާކާރު މެންބަރުންގެ ތެރޭގައި ހިމެނިވަޑައިގަންނަވާ ޣަފޫރު ވިދާޅުވި އެވެ.
ޣަފޫރުގެ އެ ތުހުމަތުތައް ޕީއެންސީގެ ފަރާތުން ބަހުސްގައި ވާހަކަ ދެއްކެވި ހުރިހާ މެންބަރުން ދޮގު ކުރެއްވި އެވެ. އަދި އީ-ވޯޓިންއަށް ރާއްޖޭގެ ވޯޓުލުމުގެ ނިޒާމު ބަދަލުކުރަން ސަރުކާރުން މަސައްކަތް ނުކުރާ ކަމަށް ވިދާޅުވި އެވެ. ޣަފޫރު ވިދާޅުވި ގޮތުގައި ސައްހަ ވޯޓަަކުން ސަރުކާރު މޮޅެއް ނުވާނެ އެވެ.
"ސައްހަ ވޯޓެއް ނަގައިގެން އިނގޭ އިންތިހާބެއް ކާމިޔާބު ނުކުރެވޭނެކަން. އެހެންވީމާ އީ-ވޯޓު އެޅުމަށްޓަކައި މި ބިލު ތައްޔާރުކޮށްފައި މިވަނީ، މި އޮތީ ގާނޫނީ ފްރޭމްވޯކެއް އީ-ވޯޓިންއަށް ދާން ތައްޔާރުކުރެވިފައި،" ޣަފޫރު ވިދާޅުވި އެވެ.
ބިލުގައި ބަޔާންކުރާ ވަރަށް ގިނަ ކަންކަމުގެ އިޖުރާއަތްތައް ބަޔާންކުރާނި އެ ބިލުގެ ދަށުން ހަދާ ގަވާއިދުތަކުގައި ކަމަށް ބިލުގެ މާއްދާތަކުގައި ބުނެފައިވެ އެވެ. އީ-ވޯޓިންއަށް ބަދަލުކުރާނީ އެފަދަ ގަވާއިދެއްގެ ދަށުން ކަމަށް ޣަފޫރު ވިދާޅުވި އެވެ.
ޑިޖިޓަލް ޓްރާންސްފޮމޭޝަން ބިލު ފަރުމާކޮށްފައި އޮތްގޮތުން އެ މުއައްސަސާއަށް ފާރަވެރިވެ ޖަވާބުދާރީކުރުވުމުގައި މަޖިލީހުގެ މާ ބޮޑު ދައުރެއް ނެތެވެ. އެ ބިލުގައި ބުނެފައިވާ ގޮތުގައި އެއީ ހޯމް މިނިސްޓްރީގެ ދަށުން ހިނގާ މުއައްސަސާއެކެވެ. އަދި އެ މުއައްސަސާގެ އެންމެހާ ކަންކަމަކާ ބެހޭގޮތުން މަޖިލީހަށް ޖަވާބުދާރީވާނީ ހޯމް މިނިސްޓަރެވެ.
