އިދިކޮޅު އެމްޑީޕީގެ ޗެއާޕާސަންގެ މަގާމަށް މީހަކު އިންތިހާބު ކުރަން މިހާރު އިއުލާނު ކޮށްފައިވާ އިންތިހާބު ފަސްކުރުމާ ދެކޮޅު ކަމަށް އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއިލް ވެސް މިރޭ ހާމަ ކުރައްވައިފި އެވެ.
ޖޫން 12، ގައި ބާއްވަން ނިންމާފައިވާ އިންތިހާބު ފަސް ކުރަން ހުށަހެޅުއްވީ ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ އެވެ. އިންތިހާބު ފަސް ކުރަން ބޭނުންވެވަޑައިގަންނަވަނީ އެތެރޭގެ މަސްލަހަތު ހިމާޔަތް ކުރަން ކަމަށް އޭނާ ވިދާޅުވެ އެވެ. އަދި އިންތިހާބު ބާއްވަން ބޭނުންވާ ފައިސާ ވެސް ޕާޓީގައި ނެތް ކަމަށް އޭނާ ވިދާޅުވި އެވެ.
އެކަމާ ގުޅޭ ގޮތުން ފައްޔާޒް މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ އިންތިހާބަށް ބޭނުންވާ ފައިސާ ހޯދޭނެ ކަމަށާއި އިންތިހާބު ލަސްކުރަންޖެހޭ އެއްވެސް ސަބަބެއް ނެތް ކަމަށެވެ.
"އިންތިހާބު ލަސްކުރާން ޖެހޭ އެއްވެސް ސަބަބެއް ނެތް. ފައިސާ ވެސް ހޯދޭނެ. އިންތިހާބު އަވަސްކުރަންވީ،" ފައްޔާޒް ވިދާޅުވެފައިވެ އެވެ.
އިންތިހާބު ފަސްކުރަން ބޭނުންވެވަޑައިނުގަންނަވާ ކަމަށް އެ އިންތިހާބުގައި ވާދަ ކުރައްވަން ނިންމަވާފައިވާ މީކާއީލް އަހުމަދު ނަސީމް ވެސް ވަނީ ވިދާޅުވެ އެވެ.
"ޕާޓީގެ ޗެއާޕާސަން އިންތިހާބު ލަސްކުރަން އުޅޭ އުޅުމަކީ އަޅުގަނޑު ވެސް އަދި މިޕާޓީގެ އެއްވެސް މެންބަރެއް ވެސް ބަލައިގަންނާނެ ކަމެއް ނޫން. ޕާޓީން އިއުލާނުކޮށްފައިވާ ތާވަލާ އެއްގޮތަށް އިންތިހާބު ކުރިއަށް ގެންދަންޖެހޭ. ވަކި ބަޔަކަށް ފައިދާވާ ގޮތަށް އިންތިހާބާ ނުކުޅުއްވާ، ކޮމިޓީއިން ނިންމާފައިވާ ނިންމުމަށް އިހްތިރާމް ކުރައްވާ. އަޅުގަނޑާއި އަޅުގަނޑުގެ ޓީމު މިތިބީ އިންތިހާބަށް ފުރިހަމައަށް ތައްޔާރަށް،" އޭނާ ވިދާޅުވި އެވެ.
މީކާއީލްގެ އިތުރުން އެ އިންތިހާބުގައި ވާދަ ކުރައްވާނޭ ކަމަށް މިހާތަނަށް އިއުލާނު ކުރައްވާފައި ވަނީ ކުރީގެ ރައީސް މުހައްމަދު ނަޝީދެވެ.
ޣަފޫރު މިރޭ ހުށަހެޅުއްވީ ރިޔާސީ ޕްރައިމަރީއަށްފަހު ޗެއާޕާސަންގެ އިންތިހާބު ބޭއްވުމަށެވެ. އެއީ ޕާޓީގެ އެތެރޭގެ މަސްލަހަތު ހިމާޔަތްކޮށް، ސަރުކާރު ޖަވާބުދާރީ ކުރުވުމުގެ މަސައްކަތް މެދުނުކަނޑާލައި ކުރިއަށްގެންދަން ކަމަށް އޭނާ ވިދާޅުވި އެވެ.
"ސީފީ އިންތިހާބާއި ދާއިރާގެ އިންތިހާބާ ބެހޭ ގޮތުން އަޅުގަނޑަށް ފެންނަ ގޮތަކީ ރިޔާސީ ޕްރައިމަރީ އަށްފަހު ބޭއްވުމަށް. މި ދެ އިންތިހާބު މިވަގުތު ބާއްވައި ފިނަމަ ޕާޓީގެ އެތެރޭގެ މަަސްލަހަތު ގެއްލި އޭގެ ސަބަބުން ސަރުކާރު ޖަވާބުދާރީ ކުރުމުގެ މަސައްކަތައް ހުރަސްތަކެއް ކުރިމަތިވާނެ،" އޭނާ ވިދާޅުވި އެވެ.
"އަޅުގަނޑު މި ހުށައަޅަނީ ޕާޓީގެ ހިންގުމަށްޓަކައި އިސްފަރާތްތައް ވާހަކަދައްކާ އިންޓަރީމް އެރޭންޖްމަންޓެއް (އަޅުގަނޑު ނުހިމަނާ) ދިއުމަށް. އަދި އެކަން ގައުމީ މަޖްލިސް އަށް ހުށައަޅާ ފާސްކުރުމަށް."
