އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަން އިންތިހާބާއި ދާއިރާގެ އިންތިހާބު މިވަގުތަށް ފަސްކޮށްލަން ފެނިވަޑައިގަންނަވާކަމަށް ވިދާޅުވެ އެކަމާމެދަށް ވިސްނެވުމަށްއެ ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) ގައުމީ މަޖިލީހުގެ މެންބަރުން ކިބައިން އެދިވަޑައިގަންނަވައިފި އެވެ.
އެމްޑީޕީގެ ގައުމީ މަޖިލީހުގެ ވަޓްސްއަޕް ގްރޫޕަށް ގަޕޯ ފޮނުއްވި މެސެޖެއްގައި ވިދާޅުވީ ޗެއާޕާސަން އިންތިހާބު ލަސްކޮށް، ޕާޓީ ހިންގުމަށް ލީޑާޝިޕްގައި މަޝްވަރާކޮށްގެން އޭނާ ނުހިމަނައި ކޮމިޓީއެއް އެކުލަވާލުމަށެވެ.
"އަޅުގަނޑު މި ހުށައަޅަނީ ޕާޓީގެ ހިންގުމަށްޓަކައި އިސްފަރާތްތައް ވާހަކަދައްކާ އިންޓަރީމް އެރޭންޖްމަންޓެއް (އަޅުގަނޑު ނުހިމަނާ) ދިއުމަށް. އަދި އެކަން ގައުމީ މަޖްލިސް އަށް ހުށައަޅާ ފާސްކުރުމަށް،" އޭނާ ވިދާޅުވި އެވެ.
ގަޕޯގެ ހިޔާލަކީ ޗެއާޕާސަން އިންތިހާބު ރިޔާސީ ޕްރައިމަރީއަށްފަހު ބޭއްވުމެވެ. އޭނާ ވިދާޅުވީ ޗެއާޕާސަން އިންތިހާބާއި ދާއިރާތަކުގެ އިންތިހާބު މިވަގުތު ބާއްވައިފިނަމަ ޕާޓީ ތެރޭގައި މަސްލަހަތު ގެއްލި އޭގެ ސަބަބުން ސަރުކާރު ޖަވާބުދާރީކުރުމުގެ މަސައްކަތަށް ހުރަސް އެޅޭނެ ކަމަށް ގަބޫލުކުރައްވާ ކަމަށެވެ.
"ސީފީ އިންތިހާބާ ދާއިރާގެ އިންތިހާބް އާބެހޭ ގޮތުން އަޅުގަނޑަށް ފެންނަ ގޮތަކީ ރިޔާސީ ޕްރައިމަރީ އަށްފަހު ބޭއްވުމަށެވެ . މި ދެ އިންތިހާބް މިވަގުތު ބާއްވައި ފިނަމަ ޕާޓީގެ އެތެރޭގެ މަަސްލަހަތު ގެއްލި އޭގެ ސަބަބުން ސަރުކާރު ޖަވާބު ދާރީކުރުގެ މަސައްކަތައް ހުރަސް ތަކެއް ކުރިމަތި ވާނެ،" އޭނާ ވިދާޅުވި އެވެ.
މީގެއިތުރުން ގަޕޯ ވިދާޅުވީ ސަރުކާރުން މި އަހަރު ޕާޓީއަށް ލިބެންޖެހޭ އެއްވެސް ފައިސާ ލިބިފައިނުވާތީ، ޕާޓީ ހިންގުމަށާއި އިންތިހާބު ބާއްވަން އެއްވެސް ފައިސާއެއް މިވަގުތު ނެތް ކަމަށެވެ.
ޣަފޫރުގެ ހުށަހެޅުއްވުމާ ގުޅިގެން ޕާޓީގެ ލީޑާޝިޕްގައި ހިމެނިވަޑައިގަންނަވާ ބޭފުޅުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
އެމްޑީޕީން ޗެއާޕާސަން އިންތިހާބު ބާއްވަން ނިންމާފައިވަނީ ޖޫން 12، ގަ އެވެ. އެ އިންތިހާބުގައި ވާދަކުރައްވާކަން އިއުލާންކޮށްފައިވަނީ ކުރީގެ ރައީސް މުހައްމަދު ނަޝީދު އަދި ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އެވެ.
