އިގުތިސޯދު ހަަމަޖެއްސުމަށް ސަރުކާރުން ކުރަމުންދާ މަސައްކަތްތަކާ އެކުވެސް، ރާއްޖޭގެ އިގުތިސޯދުގެ ކުރިއެރުން އެއް ޕަސެންޓަށް ދަށަށް ދާނެ ކަމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ލަފާކޮށްފި އެވެ.
އައިއެމްއެފްއިން މިކަން ހާމަކޮށްފައި ވަނީ އެ އިދާރާއިން އަހަރަކު އެއް ފަހަރު ކުރިއަށްގެންދާ "އާޓިކަލް IV ކޮންސަލްޓޭޝަން" ގެ ދަށުން، އައިއެމްއެފްގެ ވަފުދުން މި އަހަރު ކުރި ޒިޔާރަތަށް ފަހު ޝާއިއުކުރި ރިޕޯޓުގަ އެވެ.
އިގުތިސޯދުގެ ކުރިއެރުން ދަށް ވާނެ ކަމަށް އައިއެމްއެފްއިން ލަފާކުރި މައިގަނޑު ސަބަބަކީ، ބައިނަލްއަގުވާމީ ހަމަނުޖެހުންތަކާއި ތަކެތީގެ އަގު ބޮޑުވުމުގެ ސަބަބުންނެވެ. އެ ގޮތުން ރާއްޖެއަށް ހުރި ގޮންޖެހުންތަކުގެ ތެރޭގައި މެދުއިރުމަތީގާއި ހިނގަމުންދާ ހަމަނުޖެހުންތަކުގެ ރާއްޖެއަށް ކޮށްފައިވާ އަސަރާއި، ޓޫރިޒަމަށް އައިސްފައިވާ ހީނަރުކަމާއި، ދުނިޔޭގެ ބާޒާރުގައި ހަކަތައިގެ އަގު އުފުލުމާ ގުޅިގެން އިމްޕޯޓު ބިލާއި ސަބްސިޑީ ހަރަދު އިތުރުވުމެވެ.
އައިއެމްއެފްއިން ބުނި ގޮތުގައި ރާއްޖޭގެ އިގުތިސޯދުގެ ވިލުންވެރިކަން ގަދަ ނަމަވެސް ނަމަވެސް، ދައުލަތުގެ ހަރަދުތަކާއި ދަރަނި އަދިވެސް ހުރީ ވަރަށް މަތީގަ އެވެ. މީގެ ސަބަބުން ބޭރުގެ ދަރަނި ނުދެއްކުމުގެ ނުރައްކާ (ޑެޓް ޑިސްޓްރެސް) އަދިވެސް އޮތީ މަތީގަ އެވެ.
މި ގޮންޖެހުންތައް ހުރި ނަމަވެސް، ނިމުނު އަހަރުގެ ތެރޭގައި ހަރަދުތައް ކުޑަކޮށް، އާމްދަނީ އިތުރުކުރަން އެޅި ފިޔަވަޅުތަކުގެ ސަބަބުން ލުޔެއް ލިބުނު ކަމަށް އައިއެމްއެފްއިން ބުންޏެވެ. އޭގެ އިތުރުން، އެކުވެރި ގައުމުތަކުން ލިބުނު އެހީތެރިކަމާއި، ހަނގުރާމައިގެ ލޮޅުމުގެ ކުރިން ޓޫރިޒަމަށް އައި ކުރިއެރުންތަކުގެ ސަބަބުން ބޭރު ފައިސާގެ ރިޒާވު އިތުރުވީ ކަމަށް ވެސް އެ އިދާރާއިން ބުންޏެވެ.
އެންމެ ބޮޑު އެއް ކާމިޔާބުގެ ގޮތުގައި އައިއެމްއެފްއިން ފާހަގަކުރީ، ރާއްޖެއިން ދައްކަން ޖެހޭ ދަރަނިތައް ވަގުތަށް ދައްކަމުން ދިޔުމެވެ.
"ނާޒުކު ހާލަތެއްގައި އޮތް ނަމަވެސް، އިދާރާތަކުން ދަނީ ދަރަނިތައް ދައްކަމުން، މީގެ ތެރޭގައި ސުކޫކާއި ބޮންޑުތަކާއި، ބޭރުގެ ރަސްމީ އިދާރާތަކާއި އަމިއްލަ ފަރާތްތަކުން ނަގާފައިވާ ލޯނުތަކަށް ވަގުތަށް ފައިސާ ދެއްކުން ހިމެނޭ،" އައިއެމެއެފްގައި ވަފުދުގައި އިސްކޮށް ހުންނެވި ޕިޔަޕޯން ސޮޑްސްރިވިބޫން ވިދާޅުވި އެވެ.
އައިއެމްއެފްއިން ވަނީ، މި އަހަރުގެ ގޮންޖެހުންތަކަށް ފަހު ކުރިއަށް އޮތް އަހަރުތަކުގައި އިގުތިސޯދު ރަނގަޅު ވާނެ ކަމުގެ ބޮޑު އުއްމީދެއް އެބައޮތް ކަމަށެވެ. އަދި، އަންނަ އަހަރުގެ ތެރޭގައި އިގުތިސޯދު އަލުން ކުރިއަރަން ފަށާނެ ކަމަށް އައިއެމްއެފްއިން ބުންޏެވެ.
އެ އިދާރާގެ ލަފާކުރުންތަކުން ދައްކާ ގޮތުގައި މެދު ރާސްތާގައި އިގުތިސޯދީ ކުރިއެރުން ހުންނާނީ އެވްރެޖުކޮށް ހަތަރު ޕަސެންޓުގަ އެވެ.
ކުރު މުއްދަތެއްގެ ތެރޭގައި އިގުތިސޯދުގެ ދުވެލި އަލުން ބާރު ވާނެ ކަމަށް ބުނި ނަމަވެސް އައިއެމްއެފްއިން ވަނީ، އިފުތިސޯދީ ހަމަޖެހުން ހިފެހެއްޓުމަށް ޓަކައި، ފިޔަވަޅުތަކެއް އަޅަން އިލްތިމާސްކޮށްފަ އެވެ.
އޭގެ ތެރޭގައި ސަބްސިޑީ ސިޔާސަތު މުރާޖައާކޮށް، ސަބްސިިޑީ ބޭނުންވާ މީހުންނަށް އެކަނި ލިބޭ ގޮތް ހެދުމާއި އިއާދަކުރަނިވި ހަކަތަ ބޭނުންކުރާ މިންވަރު އިތުރުކޮށްގެން ހަކަތައަށް ކުރާ ހަރަދު ކުޑަކުރުން ހިމެނެ އެވެ. އަދި، ސަރުކާރު ކުންފުނިތަކުން މާލިއްޔަތަށް އޮތް ބުރަ ކުޑަކުރަން ކުންފުނިތަކުގެ އޯވަސައިޓް ރަނގަޅުކޮށް، ހިންގުން ހަރަދުނާކުރަން ވެސް ބުނެފައިވެ އެވެ.
އޭގެ އިތުރުން ދިވެހި ފައިސާގެ އަގު ހިފެހެއްޓުމަށް ޓަކައި އޯޕަން މާކެޓް އޮޕަރޭޝަންތައް ކުރިއަށް ގެންދަން ވެސް ވަނީ ލަފާދީފަ އެވެ.
