ރައްޔިތުންގެ ހައްގުތައް ހިމާޔަތްކުރަން އެންމެ މުހިންމީ ދިވެހިންގެ އިގުތިސާދީ މިނިވަންކަން ކަމަށް އިދިކޮޅު މައި ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ކުރީގެ ޗެއާޕާސަން ފައްޔާޒު އިސްމާއިލް ރޭ ވިދާޅުވެއްޖެ އެވެ.
ރާއްޖޭގެ ވެރިކަމުގެ ވައްޓަފާޅިއަށް ބަދަލުތަކެއް ގެންނަން ޖެހޭ ކަމަށް ވިދާޅުވެ ފައްޔާޒު އާއި ކުރީގެ ރައީސް މުހައްމަދު ނަޝީދު ގެންދަވަނީ "ބޮޑު ބަދަލު" ގެ ނަމުގައި ތައްޔާރުކޮށްފައިވާ ކަރުދާހަކަށް އާންމުންގެ ހިޔާލާއި މަޝްވަރާ ހޯދަމުންނެވެ. އެ މަސައްކަތުގެ ތެރެއިން ދެ ބޭފުޅުން ވެސް މިވަގުތު ތިއްބެވީ އައްޑޫ ސިޓީގަ އެވެ.
ހިތަދޫ އެމްޑީޕީ ހަރުގޭގައި ބޭއްވި "ބޮޑު ބަދަލު" ޖަލްސާގައި ފައްޔާޒު ވިދާޅުވީ ހައްގުތައް ގެއްލުމަށް ސަރުކާރުތަކުން ބޭނުންކުރަން އޮތް އެންމެ ނުރައްކާ ވަސީލަތަކީ ރައްޔިތުންގެ ނިކަމެތިކަން ކަމަށެވެ. އެ ނިކަމެތިކަން ބޭނުންކޮށްގެން ހުދުމުހުތާރު ވެރިން ވެރިކަމަށް އައުމަކީ ނުރައްކާތެރި ކަމެއް ކަމަށް ފައްޔާޒް ވިދާޅުވި އެވެ.
"ހައްގުތައް ހިމާޔަތްކުރުމުގައި އެންމެ މުހިންމު އެއް ކަމަކީ ދިވެހި ރައްޔިތުންގެ އިގުތިސޯދީ މިނިވަންކަން. ހައްގުތައް ގެއްލުމަށް އޮންނަ އެންމެ ނުރައްކާ ވަސީލަތަކީ ހުދުމުހުތާރު ވެރިންނަށް ރައްޔިތުންގެ ނިކަމެތިކަން ބޭނުންކޮށްގެން އެބޭފުޅުން ވެރިކަމަށް އައުން،" 2028 ގައި ބާއްވާ ރިޔާސީ އިންތިހާބަށް އެމްޑީޕީގެ ޓިކެޓުގައި ވާދަކުރައްވާނެކަން އިއުލާންކުރައްވާފައިވާ ފައްޔާޒު ވިދާޅުވި އެވެ.
ފައްޔާޒް ވިދާޅުވީ އޭނާ އާއި ކުރީގެ ރައީސް މުހައްމަދު ނަޝީދު ހުށަހަޅުއްވާފައިވާ ބޮޑު ބަދަލުގެ އެންމެ ބޮޑު އިސްކަމެއް ދީފައިވަނީ ދިވެހިންގެ ފުދުންތެރިކަން އިތުރު ކުރެވޭނެ ގޮތަށް އިގްތިސާދީ މިނިވަންކަން ދިވެހިންނަށް ހޯދައި ދިނުން ކަމަށެވެ.
ދިވެހިންނަށް އިގްތިސާދީ މިނިވަންކަން ހޯދައި ދިނުމަށް ގާނޫނުއަސާސީއަށް ބަދަލުތައް ގެންނަންޖެހޭކަން ފާހަގަކުރައްވާ ފައްޔާޒު ވިދާޅުވީ މިހާރު ފެނިގެންދަނީ ވެރިޔަކަަށް އަންނަ މީހާގެ އެއްވެސް ކަހަލަ ތަސުއްވުރެއް ނެތުމުގެ ސަބަބުން ރާއްޖޭގެ އިގްތިސާދު އެއްކޮށް ފުނޑުފުނޑުވެގެންދާތަން ކަމަށެވެ.
"އެހެންވީމަ އަޅުގަނޑުމެން ހުށަހަޅާ މި ބޮޑު ބަދަލުގައި މުހިންމުކަމެއް ދީފައި މިވަނީ ދިވެހި ރައްޔިތުންގެ ފުދުންތެރިކަން އިތުރު ކުރެވޭނެ ގޮތަކަށް އިގްތިސާދީ މިނިވަންކަން ދިވެހި ރައްޔިތުންނަށް ހޯދައިދިނުން. އެކަން ކުރުމަށްޓަކައި އަޅުގަނޑުމެން އެބަޖެހޭ ގާނޫނުއަސާސީގައި ބަދަލުތަކެއް ގެނެސްގެން އެ ހިމާޔަތްތަކެއް ކުރަން،" ފައްޔާޒް ވިދާޅުވި އެވެ.
"އެނގިވަޑައިގަންނަވާނެ ރައްޔިތުންނަށް ހިމާޔަތް މި ލިބެނީ ރައްޔިތުންގެ އިގްތިސާދީ ފުދުންތެރިކަން މި އަންނަނީ ގައުމުގެ ފުދުންތެރިކަން އައިމަ. ގައުމުގެ އިގްތިސާދު ވަރުގަދަވީމަ. މިއަދު އަޅުގަނޑުމެންނަށް މި ފެންނަނީ ވެރިޔަކަށް އަންނަ މީހާގެ އެއްވެސް ކަހަލަ ވިކުރެއް، ވިސްނުމެއް، ތަސުއްވުރެއް ނެތުމުން މުޅި ދިވެހިރާއްޖޭގައި މިއޮތް އިގްތިސާދު ފުނޑުފުނޑުވެގެން ދާތަން."
ފައްޔާޒް ވިދާޅުވީ ބޮޑު ބަދަލުގެ ތެރެއިން ރައްޔިތުންނާއި ގައުމާ ގުޅޭ ކަންކަމުގައި ގިނަގިނައިން ރައްޔިތުން ކައިރީ އަހާނެ ކަމަށެވެ. އެގޮތުން އޭނާ ވިދާޅުވީ ބޮޑެތި ނިންމާނީ ފެންނަ ނުފެންނަ ވޯޓެއް ނަގައިގެން ނަތީޖާ ނުކުންނަ ގޮތަކުން ކަމަށެވެ.
ނަޝީދާއި ފައްޔާޒް ހުށަހަޅުއްވާފައިވާ ބޮޑު ބަދަލުގެ ތެރޭގައި ހިމެނޭ އެންމެ ބޮޑު ބަދަލަކީ ސަރުކާރާއި ދައުލަތުގެ ވެރިޔަކު އިންތިހާބު ކުރާ ގޮތަށް ނިޒާމު ބަދަލު ކުރުމެވެ. އެބޭފުޅުން ވިދާޅުވީ އެއީ ރިޔާސީ އަދި ބަރުލަމާނީ ނިޒާމެއް ވެސް ނޫން ކަމަށާއި އެއީ ރާއްޖެއަށް ފައްކާކޮށްފައިވާ މުޅިން އާ ގޮތްތަކެއް ކަމަށެވެ.
އެ ބަދަލުތަކުގެ ތެރޭގައި ގާނޫނުއަސާސީގައި އެކަށައަޅާފައިވާ މައިގަނޑު އުސޫލުތައް ރައްކާތެރި ކުރުމަށާއި މިނިވަން މުއައްސަސާތަކާއި ފަނޑިޔާރުގެއަށް މަޖިލީހާއި ވެރިކަން ކުރާ ފަރާތުގެ ބާރު ނުހިންގޭނެ ގޮތަށް ނިޒާމު ބަދަލު ކުރުން ހިމެނެ އެވެ.
މީގެއިތުރުން ސުޕްރީމް ކޯޓުގެ ފަނޑިޔާރުންނާއި މިނިވަން ކޮމިޝަންތަކުގެ މެންބަރުން ވަކި ކުރަން ރައްޔިތުންގެ ރުހުން ހޯދަންޖެހޭ ގޮތަށް ބަދަލުކޮށް، ރައްޔިތުންގެ މަޖިލީހުގައި އަތޮޅުތައް ތަމްސީލު ކުރެވޭނެ ގޮތެއް ހަދައި، މަޖިލިސް މެންބަރުން ރިކޯލް ކުރެވޭނެ މަގު ފަހި ކުރުން ވެސް ބަދަލުތަކުގެ ތެރޭގައި ހިމެނެ އެވެ.
