ލަންޑަން (ޖޫން 5) - އަންނަ ހަފްތާގައި ފަށާ ދުނިޔޭގެ އެންމެ ބޮޑު ފުޓްބޯޅަ މުބާރާތް، ފީފާ ވޯލްޑް ކަޕްގައި ވާދަކުރާ އިނގިރޭސި ގައުމީ ފުޓްބޯޅަ ޓީމުން ޖާގަ ނުލިބުނު މެންޗެސްޓާ ޔުނައިޓެޑްގެ ޑިފެންޑަރު، ހެރީ މެގުއާ، ވޯލްޑް ކަޕް ދުވަސްވަރުގައި، ނެޓްފްލިކްސް ޝޯ އަކަށް އެރުމަށް އެއްބަަސްވެއްޖެ އެވެ.
އެ ގޮތުން، އުމުރުން 33 އަހަރުގެ މެގުއާ އެއްބަސްވެފައިވަނީ، ކުރީގެ ތަރި ގެރީ ލިނަކާ، މި ފަހަރުގެ ވޯލްޑް ކަޕަށް ހާއްސަކޮށް ނެޓްފްލިކްސްއާ އެކު އެއްބަަސްވުމެއް ހަދައިގެން ސްޓްރީމްކުރުމަށް ނިންމާފައިވާ "ދި ރެސްޓް އިސް ފުޓްބޯލް" ޝޯގައި ބައިވެރިވުމަށެވެ. އެކަމަކު، މި ޝޯގައި މެގުއާ ބައިވެރިވަނީ، ސްޓޫޑިއޯ އަށް ގޮސްތޯ ނޫނީ ވީޑިއޯގެ ޒަރިއްޔާއިން ކަމެއް އަދި ޔަގީންވެފައިނުވެ އެވެ.
"ދި ރެސްޓް އިސް ފުޓްބޯލް" ޝޯގައި، ލިނެކާގެ އިތުރުން ބައިވެރިވަނީ، ސީބީއެސްގެ ފުޓްބޯޅަ ކަވަރޭޖްގައި ހަރަކާތްތެރިވާ، މެންޗެސްޓާ ސިޓީގެ ކުރީގެ ޑިފެންޑަރު، މައިކާ ރިޗަޑްސް އާއި އިނގިރޭސި ގައުމީ ޓީމާއި ނިއުކާސަލް ޔުނައިޓެޑްގެ ކުރީގެ ފޯވާޑް، އެލަން ޝިއަރާ އެވެ.
ވޯލްޑް ކަޕް ސްކޮޑުން ޖާގަ ގެއްލުމުން މެގުއާ އަށް ލިބުނީ ޝޮކެއް!
އަންނަ މަހު އެމެރިކާ، ކެނަޑާ އަދި މެކްސިކޯގައި ފަށާ ފީފާ ވޯލްޑް ކަޕް ފުޓްބޯޅަ މުބާރާތަށް އިންގްލެންޑުން ނެގި ސްކޮޑުގައި އޭނާ ނުހިމެނޭކަން އެނގުމުން ލިބުނީ ޝޮކެއް ކަމަށް މެންޗެސްޓާ ޔުނައިޓެެޑްގެ ޑިފެންޑަރު، ހެރީ މެގުއާ ވަނީ ބުނެފައި.
މެގުއާ އަކީ އިންގްލެންޑުން އެންމެ ފަހުން ކުޅުނު ދެ ވޯލްޑް ކަޕާއި ޔޫރޯ ފުޓްބޯޅަ މުބާރާތުގައި ވެސް ގިނަ މެޗުތަކެއްގައި ފުރަތަމަ އެގާރައިގައި ކުޅެފައިވާ ކުޅުންތެރިއެކެވެ.
މެންޗެސްޓާ ޔުނައިޓެޑްގެ ކޯޗުކަމާ މައިކަލް ކެރިކް ހަވާލުވެ އެ ޓީމުން ސީޒަނުގެ ފަހު ބައިގައި ދެއްކި ތަފާތު ރަނގަޅު ކުޅުމުގެ ތެރޭގައި މެގުއާ ވެސް އިސް ރޯލެއް އަދާކޮށްފައިވެ އެވެ.
އެހެން ނަމަވެސް، އިންގްލެންޑްގެ ކޯޗުކަމާ ހަވާލުވެހުރި ޖަރުމަނުގެ ކޯޗު، ތޯމަސް ޓުޗެލް، 26 ކުޅުންތެރިން ހިމެނޭ އިންގްލެންޑްގެ ވޯލްޑް ކަޕް ސްކޮޑު އިއުލާނުކުރުމުގެ ކުރިން، މެގުއާ ނުހިމެނޭކަން، އޭނާ ވަނީ އިންސްޓަގްރާމްގައި ކުރި ޕޯސްޓަކުން ޔަގީންކޮށްދީފަ އެވެ.
އެ ގޮތުން، މެގުއާ ބުނެފައިވަނީ، މި ސީޒަނުގައި ދެއްކުނު ކުޅުމާ އެކު އޭނާ ހުރީ މި ފަހަރުގެ ވޯލްޑް ކަޕްގައި މުހިންމު ދައުރެއް އަދާކޮށް، އިންގްލެންޑަށް ރަނގަޅު ކުޅުމެއް ދެއްކޭނެ ކަމުގެ ޔަގީންކަމާ އެކު ކަމަށެވެ.
"އެކަމަކު، ލިބުނީ ޝޮކެއް. ވަރަށް ދެރަވެފައި މި ހުރީ މި ނިންމުން އައި ގޮތުން. އަހަރެން ހުރިހާ ކުޅުންތެރިންނަށް ވެސް ކާމިޔާބަށް އެދެން،" އިންގްލެންޑަށް 67 މެޗުުން ހަތް ގޯލު ޖަހާފައިވާ މެގުއާ، އިންސްޓަގްރާމްގައި ލިޔެފައިވެ އެވެ.
މީގެ ދެ މަހެއްހާ ދުވަސް ކުރިން ބީބީސީ އަށް ދިން އިންޓަވިއުއެއްގައި ވެސް މެގުއާ ވަނީ ވޯލްޑް ކަޕްގައި ކުޅެން ކެތްމަދުވެފައި ހުރި ކަމަށް ބުނެފަ އެވެ. އެކަމަކު، ސްކޮޑުން ފުރުސަތު ލިބޭގޮތް ނުވީ އެވެ.
އިންގްލެންޑް ސްކޮޑުން މެގުއާ އަށް ޖާގަ ނުލިބޭތީ އޭނާ ޝުއޫރުފާޅުކުރި ގޮތުން ހަައިރާންކަން ލިބުނު ކަމަށް ޓުޗެލް ވަނީ އިންޓަވިއުއެއްގައި ބުނެފަ އެވެ.
